Ekonakono limwe ndyoka lya ningwa moAmerika olyu ulike kutya oopelesenda 80 dhaagundjuka ohadhi galikana, ihe oopelesenda owala 40 hadhi galikana esiku kehe. Otashi vulika aagundjuka yamwe hayi ipula taya ti: ‘Mbela egalikano oshinima ngaa sha simana nenge oshinima owala shoku tu uvitha nawa?’

•  Egalikano oshike?

•  Mbela Kalunga oha pulakene ngaa komagalikano getu?

•  Otandi vulu okugalikana kombinga yashike?

•  Shoka oomakula haya ti

Egalikano olyo omukalo gwokupopya nOmushiti gwiinima ayihe. Mbela shono osha hala okutya ngiini? Nonando Jehova oku vule aantu kokulekule, “ke li kokule nomuntu nando ogumwe.” (Iilonga 17:27) Ombiimbeli otayi tu lombwele tayi ti: “Hedheni kuKalunga, ye nota hedha kune.” — Jakob 4:8.

Ongiini to vulu okuhedha kuKalunga?

• Omukalo gumwe ogwo okupitila megalikano, oshoka uuna to galikana, nena oto popi naKalunga.

• Omukalo omukwawo omokukonakona Ombiimbeli, shaashi Kalunga oha “popi” nangoye okupitila muyo.

Okugalikana nokukonakona Ombiimbeli, otaku vulu oku ku kwathela wu kale wu na ekwatathano lyopothingo naKalunga.

Omumati gwedhina Jeremy okwa ti: “Okupopya naJehova ngoka e li Omukombandambanda, osho uuthembahenda uunenenene mboka tse aantu tu na.”

Omukadhona gwedhina Miranda okwa ti: “Uuna tandi lombwele Jehova shoka shi li momutima gwandje okupitila megalikano, ohandi kala ndu uvite ndi li popepi naye.”

Nonando owi itaala kutya Kalunga oko e li shili noho galikana kuye, otashi vulika shi kale oshidhigu okukala wa tompwa kutya oha pulakene lela komagalikano goye. Ombiimbeli otayi ti kutya ‘ohu uvu omagalikano.’ (Episalomi 65:2) Otayi tu lombwele nokuli tu ‘mu tsike iimpwiyu yetu ayihe.’ Omolwashike mbela? ‘Oshoka oye omusilishimpwiyu gwetu.’ — 1 Petrus 5:7.

Dhiladhila kwaashika: Mbela oho kongo ethimbo wu popye nookuume koye kopothingo esiku kehe? Oto vulu wo okuninga oshinima sha faathana naKalunga. Oto vulu okupopya naye aluhe okupitila megalikano, to tumbula edhina lye, Jehova. (Episalomi 86:5-7; 88:9) Ombiimbeli otayi tu ladhipike tu kale hatu ‘galikana aluhe.’ — 1 Aatessalonika 5:17.

Omumati gwedhina Moises okwa ti: “Egalikano olyo oonkundathana pokati kandje naTate yetu gwomegulu, moka handi vulu oku mu mbumbulila ashihe shoka shi li momutima gwandje.”

Omukadhona gwedhina Karen okwa ti: “Ngaashi owala handi popi nameme nenge nakuume kandje nda manguluka, osho wo handi popi naJehova.”

Ombiimbeli otayi ti: “Oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo.” — Aafilippi 4:6.

Mbela ovelise ndjino otayi ti kutya oto vulu okugalikana kombinga yomaupyakadhi goye? Eeno! Ombiimbeli oya popya wo tayi ti: “Uudhigu woye u fala kOmuwa, oye te ku popile.” — Episalomi 55:22.

Itashi ti kutya ethimbo kehe tatu galikana otu na owala okukala tatu popi omaudhigu getu. Omukadhona gwedhina Chantelle okwa ti: “Itandi ka kala kuume kaJehova omwaanawa, ngele ethimbo kehe tandi galikana kuye, otandi mu pula owala ekwatho. Tango ondi na oku mu pandula, noshinima shono osho ndi na okupopya unene megalikano.”

Dhiladhila kwaashika: Iinima yini wa pandula monkalamwenyo yoye? Iinima itatu yini ye ku ningilwa nena, wa hala oku yi kwatela megalikano wu pandule Jehova?

Omukadhona gwedhina Anita okwa ti: “Niinima nokuli iishona, ngaashi uuna wa mono okangala okawanawa, otayi vulu oku ku inyengitha wu pandule Jehova megalikano.”

Omumati gwedhina Brian okwa ti: “Dhiladhila kombinga yoshinima shontumba shoka wa mona meshito she ku kumitha nenge ovelise yontumba mOmbiimbeli ye ku guma komutima, e to pandula Jehova.”