Maria Magdalena okwa li omulanduli gwaJesus Kristus omudhiginini. Edhina lye Magdalena, otashi vulika lyu ulika kondoolopa Magdala (tashi vulika Magadan), ndjoka ya li popepi nEfuta lyaGalilea. Otashi vulika pu na oshikando shimwe Maria a li ha zi hoka.

Maria Magdalena oye gumwe gwomaakiintu yontumba mboka ya li ye ende pamwe naJesus nonaalongwa ye, noku ya ambidhidha painiwe. (Lukas 8:1-3) Sho Jesus a dhipagwa, Maria naye opo a li. Oye wo gwomwaamboka ya li ya mono Jesus tango konima sho a yumudhwa. — Markus 15:40; Johannes 20:11-18.

•  Mbela Maria Magdalena okwa li ombwanda?

•  Mbela Maria Magdalena okwa li “omuyapostoli gwomaayapostoli”?

•  Mbela Maria Magdalena okwa li omukulukadhi gwaJesus Kristus?

•  OoMaria yangapi ya popiwa mOmbiimbeli?

Ombiimbeli inayi popya kutya Maria Magdalena okwa li ombwanda. Shoka ya popya kombinga ye osho kutya muye omo mwa li mwa tidhwa oompwidhuli heyali kuJesus. — Lukas 8:2.

Openi lela pwa ziilila edhiladhilo lyokutya ye okwa li ombwanda? Uule womathelemimvo konima yeso lye, aantu yamwe oya kala taya ti kutya oye wo omukiintu inaa tumbulwa kedhina (tashi vulika ombwanda) ngoka a li a theta oompadhi dhaJesus nomahodhi ge noku dhi kukutika nomafufu ge. (Lukas 7:36-38) Nonando ongawo, kapu na Enyolo tali ambidhidha edhiladhilo ndyoka.

Aawe. Ongeleka yaKatoolika ohayi ithana Maria “Omusimanekwa Maria Magdalena” nosho wo “omuyapostoli gwomaayapostoli,” oshoka oye omuntu gwotango a li a lombwele aayapostoli kutya Jesus okwa yumuka. (Johannes 20:18) Ihe shoka inashi mu ningitha a kale omuyapostoli. MOmbiimbeli kamu na wo omadhina ngoka. — Lukas 6:12-16.

Ombiimbeli oya li ya pu okunyolwa lwopehulilo lyethelemumvo lyotango E.N. lwaampo. Konima yomimvo omathele, aawiliki yomongeleka oya li ya tokola okupa Maria Magdalena ondondo yi ikalekelwa noyopombanda. Opu na iinyolwa mbyoka ya li ya nyolwa momumvo 100-300, mbyoka kaayi li oshitopolwa shOmbiimbeli, ya popya kutya aayapostoli yamwe yaJesus oya li ya sile ondumbo Maria. Omahokololo ngoka kage li paushili, oshoka inaga kankamena kOmanyolo.

Aawe. Ombiimbeli oye shi yelitha nawassss kutya Jesus ka li a hokana. *