Ombiimbeli oya hunganeka kutya momasiku gahugunina otaku ke ya omalega (omikithi ndhoka hadhi taandele, mwa kwatelwa omikithi dhekomba). (Lukas 21:11) Omikithi ndhoka inadhi za kuKalunga dho kadhi shi egeelo lya za kuye. Masiku Kalunga ota ka longitha Uukwaniilwa we wu hulithe po omikithi adhihe, mwa kwatelwa nodhekomba.

•  Mbela Ombiimbeli oya hunganeka kombinga yomikithi dhekomba?

•  Mbela opu na esiku Kalunga a longithile uuwehame a geele aantu?

•  Mbela omikithi dhekomba ndhoka dhi li ko kunena egeelo lya za kuKalunga?

•  Mbela omikithi dhekomba onadhi ka hule po ngaa?

•  Omanyolo ngoka taga popi kombinga yuuwehame

Ombiimbeli inayi hunganeka kondandalunde omikithi ngaashi o-COVID-19, o-AIDS nenge eshikisha lyaSpania. Ihe oya hunganeka kombinga ‘yomalega.’ (Lukas 21:11; Ehololo 6:8) Iiningwanima mbika oyi li endhindhiliko ‘lyomasiku gahugunina’ nenge tu tye ‘lyehulilo lyuuyuni.’ — 2 Timoteus 3:1; Mateus 24:3.

Ombiimbeli oya popya kutya Kalunga okwa li a longitha uuwehame a geele aantu, ihe opoompito owala oonshona. Pashiholelwa, okwa li e etele aantu yamwe oshilundu. (Numeri 12:1-16; 2 Aakwaniilwa 5:20-27; 2 Ondjalulo 26:16-21) Nonando ongawo, shika kasha li sha gumu aantu mboka kaaye na shi ya ninga. Pehala lyaashono, iiningwanima mbyoka oya li egeelo lyaamboka ya li inaaya hala okuvulika kuKalunga.

Hasho nando. Aantu yamwe ohaya ti kutya Kalunga ota longitha omikithi dhekomba nosho wo uuwehame wulwe a geele aantu kunena. Ihe Ombiimbeli itayi ambidhidha nando omapopyo ngoka. Omolwashike mbela?

Etompelo limwe olyo kutya aapiya yaKalunga yamwe, kutya nduno oomboka ya li ko pethimbo lyonale nenge oyokunena, oya kala nokukwatiwa kuuwehame. Pashiholelwa, omulumentu omudhiginini, Timoteus, naye okwa li e na ‘uuwehame wontumba.’ (1 Timoteus 5:23) Nonando ongawo, Ombiimbeli inayi popya kutya uuwehame mboka owa li endhindhiliko kutya ina hokiwa kuKalunga. Sha faathana, kunena aapiya yaKalunga yamwe aadhiginini, ohaye ehama nenge tu tye ohaya kwatiwa komikithi. Olundji, shoka ohashi ya ningilwa, molwaashoka tashi vulika ya li pehala lya puka nopethimbo lya puka. — Omuuvithi 9:11.

Shimwe ishewe, Ombiimbeli otayi longo kutya ethimbo lyaKalunga lyokugeela aakolokoshi, inali thika natango. Pehala lyaashono, ngashingeyi otu li ‘pethimbo lyehupitho,’ ano ethimbo ndyoka Kalunga ta hiya aantu ayehe ya hedhe popepi naye noya hupithwe. (2 Aakorinto 6:2) Omukalo gumwe moka he shi ningi, okupitila miilonga yokuuvitha etumwalaka ewanawa, ano ‘elaka etoye lyOshilongo’ muuyuni awuhe. — Mateus 24:14.

Eeno. Ombiimbeli oya hunganeka kutya monakuyiwa yi li popepi, kapu na ngoka ta ka tya otandi ehama. Kohi yelelo lyUukwaniilwa we, Kalunga ota ka hulitha po uuwehame awuhe. (Jesaja 33:24; 35:5, 6) Ota ka hulitha po okumona iihuna, uuwehame nosho wo eso. (Ehololo 21:4) Shimwe ishewe, ota ka yumudha oonakusa, opo ya vule okunyanyukilwa uukolele huka kombanda yevi, muuyuni uupe. — Episalomi 37:29; Iilonga 24:15.

Ehololo 6:8: “Ngame onda mono ko okakambe okakwaya. Omukayili gwako oye ngoka e na edhina Eso, Oshaasi noshe mu landula. Mbika iyali oya pewa oonkondo dhokupangela . . . nokudhipagitha aantu . . . komalega.”

Shoka tali ti: Ehunganeko kombinga yaakayili yuukambe yane mboka ya popiwa mEhololo, otali ulike kutya omikithi dhekomba odha li tadhi ka holoka pethimbo lyetu.