Ohatu longitha omayambidhidho tu kwathele miilonga yelongelokalunga lyetu nosho wo okugandja omakwatho kaantu yomehangano lyetu. Ohatu longo iilonga mbika, molwaashoka oyo unene yi li elalakano lyetu, ano okukwathela aantu ya ninge aalongwa yaKristus Jesus. — Mateus 28:19, 20.

 Ihatu longitha nando omayambidhidho tu yambapaleke yalwe. Ihatu futu aakuluntugongalo nenge aayakuligongalo, na Oonzapo dhaJehova ihadhi futwa, opo dhi ka uvithe egumbo negumbo. Aantu mboka haya longo miitayimbelewa yetu nosho wo mboka haya longo koombelewa dhetu oonene, mwa kwatelwa mboka ye li iilyo yOlutuwiliki, ihaya futwa.

•   Okunyanyangidha: Ohatu toloka, ohatu pilinta, ohatu tumu Oombiimbeli omamiliyona nosho wo iileshomwa yilwe yopaMbiimbeli omumvo kehe, ihe kapu na ngoka ha pulwa a futile iinima ayihe mbika. Sha faathana, kepandja lyetu lyokointaneta, jw.org nosho wo mopolohalama yo-JW Library, ohaku kala iileshomwa yetu yopaelektronika, naantu ohaye yi lesha oshali.

•   Okutunga nokwoopalekulula: Ohatu tungu nokwoopalekulula omahala getu gelongelokalunga muuyuni awuhe, opo tu kwathele omagongalo getu ga kale ge na omahala ge li nawa, moka haya gongala ya longele Kalunga. Ohatu ningi wo sha faathana, ngele tashi ya kiitayimbelewa nosho wo koombelewa dhokutoloka. Iilonga oyindji mbika ohayi longwa po kaaiyambi, shoka sha ningitha opo ku longithwe oshimaliwa oshishona.

•   Etonatelo: Iilonga yetu koombelewa dhetu oonene, kiitayimbelewa, koombelewa dhokutoloka nosho wo mbyoka hayi longwa kaatonateli aayendi, ohayi ambidhidhwa nomayambidhidho ngoka haga gandjwa kiilonga yetu yomuuyuni awuhe.

•   Okuuvitha: Oonzapo ihadhi futwa sha, sho hadhi uvitha onkundana ombwanawa nenge sho tadhi longo yalwe “oohapu dhaKalunga.” (2 Aakorinto 2:17) Nonando ongawo, sha faathana niilonga mbyoka ya li hayi longwa kAakriste yomethelemumvo lyotango, aauvithi ya hogololwa noya dheulwa mboka haya yamba po ethimbo lyawo olindji miilonga yokuuvitha, ohaya ambidhidhwa nomalukalwa noniipumbiwa yonkalamwenyo. — Aafilippi 4:16, 17; 1 Timoteus 5:17, 18.

•   Okulonga: Iigongi yetu iishona niinene, ohayi ambidhidhwa nomayambidhidho gopashimaliwa. Shimwe ishewe, ohatu nyanyangidha iikwamawi nuuvidio wa kankamena kOmbiimbeli. Otu na wo oosikola ndhoka hadhi dheula aakuluntugongalo nosho wo aalongi yethimbo lyu udha, opo ya kale ya pyokoka miinakugwanithwa yawo shi vulithe nale.

•   Okukwathela miiponga yopaunshitwe: Ohatu gandja iikulya, omeya nomagumbo kwaamboka ya dhengwa kiiponga yopaunshitwe naambyoka hayi etithwa kaantu. Shika ihatu shi ningile owala “mboka tu li nayo meitaalo limwe,” ihe naamboka wo kaaye shi Oonzapo. — Aagalati 6:10.