WANGƆ 6
Dangɔ bɛ tɛ Nzapa na ndo sese adu nɛ?
1. Nzɔ̃ pa na lo tɛ awa kwáni la nɛ?
Ngoi mɛ ndó Yezo si ka Betania dã na Yeruzalɛmɛ ko, kwa lo Lazaro akpindó ali bi siɔ. Yezo gwendó ka ndo sɛndɛ ndo ni kɔi na Malata na Maria, ayata wa kwáni. Ta aningandó ma azi ga butu butu. Dengɔ bɛ tɛ Malata na Maria ndó ngasia ngoi mɛ Yezo so na nyita la Lazaro nɛ?—Di Yoanɛ 11:21-24, 38-44.
Malata piandó hĩnga nzɔ̃ pa na lo tɛ awa kwáni. Lo hĩngandó ya Yehova na songɔ awa kwáni ya, ala du na lɛ ngɛ̃́ fani mɛ ndɛ̃́ ge lɛ sese.—Di Yobo 14:14, 15.
2. Ngoi mɛ zo ndo kpi wɛ ko lo ndo ti ngasia?
Nzapa pandó hɛ̃́ Adamu ya: “Mɔ du butu mɔ nga na diringɔ ka ya butu.”—EBANDELI 3:19.
Ali azi na butu. (Ebandeli 2:7; 3:19) Ta e du anyingɔ mɛ ndo du ka ya tɛrɛ ti mi ma. A li e na tɛrɛ ti mi, ta ye kɔi ka ya tɛrɛ e ndo ngbã na lɛ ngɛ̃́ na pɛ kwá ma. Ngoi mɛ e ndo kpi ko, bɔngɔ li e ndo kpi nga, bingangɔ li tɛ e ndo wɛ. Ni la ta Lazaro tɛnɛndó tɛnɛ mɛ aba hĩngangɔ ndo tɛ awa kwáni ma, na lo mɛ ya ta wa kwáni ndo hĩnga ndo ma.—Di Nzembo 146:4; Mosakoli 9:5, 6, 10.
Nzapa ndo gia azi ka ya wá na pɛ kwá? Oko la Ngbangɔ pa ya ta zo mɛ kpi ndo hĩnga ndo ma ko, adu yango ya hangɔ ko ndó aha na azi ya lifɛlo ti wá dazu adu kota nvɛ̃nɛ mɛ ndo guru Nzapa. Kɔdɛ ti zɔrɔngɔ azi ka ya wá ndo sĩ na bɛ lo.—Di Yirimia 7:31.
Ba video Se zo kpi ko, ye mɛ ndo si na lo nɛ?
3. Awa kwáni alengbi ti tɛnɛngɔ tɛnɛ na e?
Ta awa kwáni ndo tɛnɛ tɛnɛ ma, ta ala ndo má nga ndo ma. (Nzembo 115:17) Kanda ambɛni aangɛlo adu siɔni, ala lengbi nga ti tɛnɛngɔ tɛnɛ na azi ma bere awa kwáni nvɛ̃ni. (2 Petro 2:4) Yehova kɛ̃ kasa kasa lo ti tɛnɛngɔ tɛnɛ na awa kwáni.—Di Kolimbola Mibeko 18:10, 11.
4. Azi mɛ na songɔ na?
Amiliɔ tɛ azi mɛ ndó akpili na diringɔ lɛ la ngɛ̃́ ge lɛ sese. A bɛ se ambanga zi mɛ ta ala hĩngandó Nzapa ma, mɛ ndó awa lingɔ siɔ kpale nga na songɔ.—Di Luka 23:43; Awa Pangɔ Kwa 24:15.
Azi mɛ aso, ala lengbi ti mandangɔ bɛta lo tɛ Nzapa, fangɔ loyengɔ ka tɛ Yezo nga na mangɔ nyɔ̃ lo. (Suma 20:11-13) Ala ko la adiri lɛ la ngɛ̃́ la ndo li nga nzɔ̃ ye ko, ala na dũngɔ na dengɔ bɛ ti kaka ge lɛ sese.—Di Yoanɛ 5:28, 29.
5. Ye mɛ songɔ kwá a fa na e na lo tɛ Yehova nɛ?
Nzapa li ya e lɛndɛrɛ tengbingɔ na awa kwáni na tongɔ mɛ ndó lo to nyĩ lo ya lo kpi na lo tɛ e. Ni la songɔ kwá ndo fa e na songo tɛ Yehova nga na kota nzɔ̃ bɛ tɛ lo. Ngoi mɛ awa kwáni aso wɛ ko, zo mɛ mo ye tengbingɔ na lo uzu na?—Di Yoanɛ 3:16; Roma 6:23.
