Ta kota ngɔngɔ bere lá, dé na ngu alengbi ti gbanzingɔ e gwengɔ bombi tɛ e ma. A bɛ se e ndo tengbi na akpengba lo ti ya du nga na nzɛ̃ngɔ na pɛ kwa ko, na lo nɛ la Atɛmwɛ tɛ Yehova ndo li kpengbani ti bombingɔ tɛrɛ la na afɔ̃ la awa Kristo nɛ?

Adu nzɔ̃ lo tɛ e nvɛ̃ni. Apɔstrɔ Polo sundó ya “ale ĩ ndo da bɛ ĩ na afɔ̃ ĩ,” lo tɛnɛ ndó so na lo tɛ azi mɛ e na ala ka ya bombi kɔi. (Aebreo 10:24, NW) Tɛnɛ niko alengbi ya ‘zo da bɛ lo pii na lo tɛ fɔ̃ lo,’ ni fa ya, zo na zo ahĩnga fɔ̃ lo na seni. Ni la tɛnɛ tɛ apɔstrɔ asa nguru bɛ e ya e ndo da bɛ e na afɔ̃ e. Ngoi mɛ e ndo hĩnga anda sewa tɛ awa Kristo mɛ ndɛ na seni ko, e na hĩngangɔ ya ala mɛ ndɛ ndo tengbi na kpengba lo kwɛ́ kɔi na e ala nga na zangɔ e ya e nwɔ̃ akpengba lo ni.

Ni ndo kpengba na Yengbingɔ tɛ e. Ka bombi tɛ e ko, e ndo bombi tɛrɛ e na azi mɛ adu akwa e nvɛ̃ni, ta bo azi mɛ e hĩnga lɛ la ma. Mbɛni ngoi mɛ ndɛ ko, e ndo gere na ngoi tɛ e ti sepalangɔ ndoni kɔi. Mbana gɛrɛ mɛ e ndo lwa nɛ? Ni ndo za e ti hĩngangɔ ase liye tɛ ayata e ti nzɔ̃ni, ala ndo sepala nga na se liye tɛ e, ni ndo kpengba nga na songo tɛ e. Ni la, ngoi mɛ afɔ̃ e ndo tengbi na kpengba lo ko, e ndo du dã ti zangɔ ala na lo mɛ ya eti akwa. (Masese 17:17) Se edu ndoni kɔi na ayata kwɛ́ ti ya bombi tɛ e ko, e na fangɔ ya “e ndo da bɛ e na afɔ̃ e.”​—1 Kɔrinto 12:25, 26, NW.

Esa ngunu bɛ mɔ ya mɔ sala akwa mɛ ndo li se bɛ Nzapa. Mɔ na lwangɔ ala ma wo ma ka popo tɛ Atɛmwɛ tɛ Yehova. Se mɔ ye ta mɔ zi lége hɛ ye mɛ ndɛ agbanzi mɔ na gangɔ bombi tɛ e ma.

• Ndani nɛ adu nzɔ̃ lo tɛ e nvɛ̃ni ya e ndo bombi tɛrɛ e ka ya bombi nɛ?

• Mɔ lengbi ti gangɔ bombi tɛ e la wa?