Kpale mɛ aba falanga ti kɔdɔrɔ na dɛ̃ngɔ gbanda lá kɔi?
Na ya akɔdɔrɔ ndɛ̃ ndɛ̃ ndɛ̃, azi ndo tɔmbɔgɔ na lo mɛ aba kpale ti falanga ka kɔdɔrɔ mɛ ala da, ta sãnga ma ala ndo hũ ya, ta kpale ni ndo nɔ nɔ na mbilimbili ma. Pɛnɔ ni tindó kpengbani na ngoi ti ngã ti COVID-19, sɔngɔ bɛ ni alengbindó ndo zu na lo mɛ ya, ta ala ndo si gigi ma, ala zanga aye mɛndɛ̃ ti ngbondoni, wa ta ala ngandó na ayɔrɔ ti nɛngɔ ya ala sara na tɛrɛ la ma. Kanda ta ni dundó ngaso na lo tɛ awa ngenza ma, ni fandó ɔngbi ti kpengbani mɛ na popo tɛ awa ngenza ná awa yɛlɛ.
Pɛnɔ ti tɛ nga na mangɔ ti angele ti aye na wɛngɔ gbanda lá kɔi? Ĩi, ni na wɛngɔ. Ngbangɔ kambisa ye mɛ Nzapa na lingɔ so onzingɔ akpale niko zu.
Pɛnɔ mɛ aba kpale ti falanga mɛ Nzapa na onzingɔ
Pɛnɔ: Ta azi alonga lɛkɛngɔ kpale ti falanga ti kɔdɔrɔ tɛ la ya, akokisa gwɛ̃ tɛ azi zu ma.
Ye mɛ Nzapa na lingɔ: Nzapa na hãngɔ lo-lengɔ gbia tɛ azi wa lo na kpãngɔ Lo-lengɔ Gbia tɛ lo nvɛ̃ni. Ngbangɔ ndo ili ni ya, Lo-lengɔ Gbia tɛ Nzapa. Ni na dungɔ ka ndozu, wa ni na lengɔ gbia na ndo lɛ sese zu.—Danyele 2:44; Matie 6:10.
Nzɔ̃ kpale mɛ ni na hɛ̃ngɔ: Na lo mɛ ya, Lo-lengɔ Gbia tɛ Nzapa na lengɔ gbia na ndo lɛ sese zu ko, ni na tambwisangɔ kpale na ndenge kɔi ti nzɔ̃ni nvɛ̃ni. Ta azi na hũngɔ pɛnɔ ti yɛlɛ nga na zangangɔ falanga ma. (Nzembo 9:7-9, 18) Na se lɛ hũngɔ pɛnɔ ko, ala na lingɔ kwa, ala na luangɔ nzɔ̃ kpale na lo ni, wa ndoni kɔi na ndasewa tɛ la, ala na sepalangɔ na dungɔ lɛ ngɛ̃́ ti nzɔ̃ni nga ti dengɔ bɛ. Ngbangɔ ko kapa ya: ‘Ala na kĩngɔ ada wa ala na dungɔ ka da, ala na lungɔ yaka ti vinyo wa ala na tɛngɔ lé kɛkɛ ni. Ta ala na kĩngɔ da ti nɛngɔ ya, zo mɛndɛ̃ adu da ma; ta ala na lungɔ lé tɛ ti nɛngɔ ya, zo mɛndɛ̃ atɛ ma.’—Yisaya 65:21, 22.
Pɛnɔ: Ta azi lengbi ti gbanzingɔ aye mɛ ndo hɛ̃ la pɛnɔ nga na aye mɛ ndo li ya ala zanga aye mɛ ala na gwɛ̃ ni ma
Ye mɛ Nzapa na lingɔ: Na lége ti Lo-lengɔ Gbia tɛ lo ko, Nzapa na hãngɔ aye zu mɛ ndo li ya, azi du na mbɛtɔ nga na aye mɛ ndo li ya ala zanga siriri.
Nzɔ̃ sulu mɛ ni na hɛ̃ngɔ: Na gbɛ Lo-lengɔ Gbia tɛ Nzapa ko, ta azi na tengbingɔ na apɛnɔ mɛ ndo lo na ndo zangangɔ aye mɛ ala na gwɛ̃ ni ma. Ato, gwɛ̃, zangangɔ tɛ ná asiɔ ngã na tingɔ aye ti gã. (Nzembo 46:9; 72:16; Yisaya 33:24) Nzapa kokapa ya: “Azi tɛ mbi na dungɔ ka ndo ti siriri mɛ ta zo kɔi lengbi ti dungɔ na mbɛtɔ ma, nga ka ndo ti wɔngɔ na tɛrɛ mɛ azanga pɛnɔ.”—Yisaya 32:18.
Pɛnɔ: Awa zugbu nga na azi mɛ ndo gi bo nzɔ̃ kpale tɛ la nvɛ̃ni ndo li kpale ti zangangɔ mbilimbili tɛrɛ azi mɛndɛ̃.
Ye mɛ Nzapa na lingɔ: Azi mɛ na dungɔ ka gbɛ Lo-lengɔ Gbia tɛ Nzapa ko, ala na mandangɔ se ti fangɔ songo na azi mɛndɛ̃ na se lɛ gingɔ bo nzɔ̃ kpale tɛ la nvɛ̃ni.—Matie 22:37-39.
Nzɔ̃ sulu mɛ ni na hɛ̃ngɔ: Na gbɛ Lo-lengɔ Gbia tɛ Nzapa ko, azi zu na fangɔ songo nga ma songo mɛ Nzapa ndo du na ni, songo mɛ ‘ta ndo gi bo nzɔ̃ kpale tɛ lo nvɛ̃ni ma.’ (1 Kɔrinto 13:4, 5) Ngbangɔ pa ya: “Ta ala na lingɔ ye kɔi ti siɔni ma, ta ala na gbɛ̃ngɔ ye kɔi ka ndo ngomba tɛ mbi mɛ santo ma; na lo mɛ ya, lɛ sese na sĩngɔ na hĩngangɔ ndo tɛ Yehova a, nga ma se mɛ ngu ndo sĩ na ni kaya tɛ.”—Yisaya 11:9.
Ngbangɔ kambisa ya, e na olo na ngoi ti ndani wa angbã dã Nzapa na ozingɔ apɛnɔ zu mɛ aba kpale ti zangangɔ falanga nga ma se mɛ lo ko kapa ni. b (Nzembo 12:5) Uzu ti nɛngɔ ya, kpale ni ali tɛrɛ lo ko, awangɔ ti ya Ngbangɔ alengbi ti zangɔ e ya, e nwɔ apɛnɔ mɛ ndɛ e ndo tengbi na ni na lo ti zangangɔ falanga. Na ndakisa ba bɛli tɛnɛ mɛ “Se du ya, ta mɔ na falanga gba ma, ye mɛ mɔ lengbi ti lingɔ nɛ?” bere “Kotalela mbongo na ndenge ebongi.”
a Yehova du bɛta ili Nzapa mɛ alo kaya Ngbangɔ.—Nzembo 83:18.
b Ti nɛngɔ ya mɔ hĩnga nda mɛ ayɔ ya mɔ kpã bɛ mɔ na ndo Ngbangɔ ko, ba tɛnɛ mɛ “Biblia—Buku oyo ebongi kotyela motema.”
