Aevanzile ndo tɛnɛ tɛnɛ tɛ kɔli kɔi mɛ ili lo la Yoanɛ mɛ wa hɛ̃ngɔ batisimɔ, lo pandó nzɔ̃ pa ti Lo-lengɔ Gbia tɛ Nzapa ka kɔdɔrɔ ti Yudea. Tɛnɛ mɛ Ngbangɔ tɛnɛ na lo tɛ Yoanɛ adu biani? E ba akpale mɛ:

•   Ngbangɔ pa ya: “Yoanɛ wa hɛ̃ngɔ batisimɔ asi ka bɛ ndo mɛ ka sese ti Yudea, lo pa tɛnɛ tɛ Nzapa hɛ̃ azi: Lo pa hɛ̃ la ya: “Ale ĩ gbinya bɛ ĩ, ta sanga ma, Nzapa adoli so lɛngɔ gbia ndo ĩ.” (Matie 3:1, 2) E na aye mɛ ndo fa ya, tɛnɛ ni du biani? Ĩi.

   Kɔli kɔi ti istware mɛndó na dungɔ lɛ ngɛ̃́ na siɛklɛ ti uzu mɛ ando ili lo ya, Flavius Josèphe atɛnɛndó tɛnɛ mɛ aba kɔli kɔi mɛ ili lo “Yoanɛ, mɛ ahɛ̃ lo ili tɛ wa hɛ̃ngɔ batisimɔ” lo du zo mɛndó lo “sa ngunu bɛ azi Yuda ya, ala li aye ti mbilimbili” ti nɛngɔ ya, “ala du na mangbi na Nzapa” wa “ala mu batisimɔ.”—Histoire ancienne des Juifs, livre XVIII.

•   Ngbangɔ tɛnɛ ya, Yoanɛ lonzindó Erode Antipasi mɛndó lo du Gbia ti kɔdɔrɔ ti Galile ná ti Perea. Erode ndo tɛnɛndó ya, lo du zo ti Yuda mɛ ndo tɔndɔ andia tɛ Moizɛ. Kanda Yoanɛ apandó hɛ̃ Erode ya, lo li siɔni na ndenge mɛ lo mu Erodiadi mɛ ya nyita lo. (Marko 6:18) Ta adu bo Ngbangɔ kɔi lá atɛnɛ tɛnɛ ti kpale niko ma azi mɛndɛ̃ ahĩnga nga tɛnɛ ni.

   Zo kɔi ti istware na ili tɛ Josèphe atɛnɛndó ya, Antipasi “[mundó] Erodidia mabere ya lo” wa na “ge ge ge zu lo pa hɛ̃ lo ya, ani dungbi.” Erodiadi yendó, wa lo ziandó kɔ lo ti nɛngɔ ya, lo du na Erode.

•   Ngbangɔ pa ya, “Azi gba mɛ ka Yeruzalɛmɛ, na ala mɛ ka sese ti Yudea, nga na ala mɛ ka sese mɛ ka tɔ̃ ngu mɛ ili ni la Yurdɛnɛ, ndoga ndo ka tɛ Yoanɛ, la Yoanɛ ahɛ̃ la batisimɔ ka ya ngu ti Yurdɛnɛ.”—Matie 3:5, 6.

   Josèphe mɛ zo ti istware ayendó tɛnɛ mɛ, lo su ndó ya, “azi gba ndo gwendó ti bangɔ Yoanɛ na lo mɛ ya, tɛnɛ tɛ lo ndo gbɔ̃ndó bɛ la.”

 Afa yangondo ya, kɔli mɛndó na dungɔ lɛ ngɛ̃́ na siɛklɛ ti uzu ndo yendó ya, Yoanɛ mɛ wa hɛ̃ngɔ batisimɔ ndó na dungɔ lɛ ngɛ̃́ biani. Elengbi nga ti yengɔ lo ni.