Maria du ta Nzapa?

Gbinya ti ya Ngbangɔ

Ipɔ, ta Ngbangɔ tɛnɛ ya Maria du ta Nzapa ma, wa ta ni pa nga ya awakristo lengbi ti vɔrɔngɔ Maria ma. a Wa e ba aye mɛndɛ̃:

Ta Maria tɛnɛndó bɛ fãni kɔi ya ni du ta Nzapa ma. Ngbangɔ tɛnɛ ya lo dũndó “Nyi Nzapa,” kanda ta Nzapa nvɛ̃ni ma.—Marko 1:1; Luka 1:32.
Ta Yezo tɛnɛndó bɛ fãni kɔi ya Maria du ta Nzapa, bere ya azi lengbi ti vɔrɔngɔ lo ma. Kanda lo lonzindó wali kɔi mɛndó gonda kumba mɛ Maria na ni ti dungɔ ta lo na tɛnɛ mɛ: “Dengɔ bɛ ati na zo kola ndoma tɛnɛ tɛ Nzapa, ndoma nga nyɔ lo!”—Luka 11:27, 28.
Tɛnɛ mɛ “Ta Nzapa” nga na “Theotokos” (Zo mɛ dũ Nzapa) ta kaya Ngbangɔ ma.
Kaya Ngbangɔ ta tɛnɛ mɛ “Gbia wali ti ndozu” ndo fa Maria ma, kanda ni ndo fa nzapa wali kɔi ti nvɛ̃nɛ mɛ aya Izraɛlɛ mɛndó dɔ Nzapa zia ndo vɔrɔ lo. (Yirimia 44:15-19) “Gbia wali ti ndozu” niko alengbindó ti dungɔ Ishtar (Astarte), nzapa wali tɛ azi ti Babilonɛ.
Ta awakristo ti siɛklɛ ti uzu avɔrɔndó Maria bere ahɛ̃ londó ndima mɛ aɔ nyɔ kpɔ̃ni ma. Zo kɔi ti istwarɛ tɛnɛndó ya awakristo ti siɛklɛ ti uzu ndo “kɛ̃ndó vɔrɔngɔ ngbilondo, wa ala ndo kɛ̃ ngandó hɛ̃ngɔ Maria ndima mɛ aɔ nyɔ kpɔ̃ni ti nɛngɔ ya, ta sambela tɛ la du kwɛ kɔi na sambela tɛ nzapa wali mɛndó ndo vɔrɔ lo ma.”—In Quest of the Jewish Mary.
Ngbangɔ tɛnɛ ya ta Nzapa na ebandeli ma, wa ta lo nga na suka ma. (Nzembo 90:1, 2; Yisaya 40:28) Na lo mɛ ya ta lo na ebandeli ma ko, ta mama tɛ lo lengbi nga ti dungɔ da ma. Bɛngɔ oko katɛ, ta Maria lengbi ngandó ti yɔngɔ Nzapa ka ya lo ma, na lo mɛ ya Ngbangɔ tɛnɛ ya abɛse du ndozu ko, ta ndo lengbi na Nzapa ma.—1 Bakonzi 8:27.

Maria du ta Yezo kanda ta lo du ta “Nzapa ma”

Maria du zo ti Yuda, mɛ adũ lo ka ndasewa tɛ gbia Davidi. (Luka 3:23-31) Nzapa fandó nzɔ̃ bɛ gba ka mbage tɛ lo na lo ti loyengɔ mɛndó lo na ni, nga na lo mɛ ya lo ndo fɔ̃ ndó tɛrɛ lo na Nzapa. (Luka 1:28) Nzapa pɔnandó lo ti nɛngɔ ya lo du ta Yezo. (Luka 1:31, 35) Maria na kɔ lo Yozefu dũ ngandó ayangambi mɛndɛ̃.—Marko 6:3.

Abɛse du ya Ngbangɔ tɛnɛ ya Maria tindó wa kalasi tɛ Yezo ko, ta ni tɛnɛ tɛnɛ mɛndɛ̃ na lo tɛ lo ma.—Awa Pangɔ Kwa 1:14.

Nda mɛ azi mɛndɛ̃ ndo hũ Maria ya lo du ta Nzapa nɛ?

Abandandó hũngɔ aye mɛ ndo fa ya azi banda vɔrɔngɔ Maria na siɛklɛ ti siɔ N.E. Na ngoi niko ndó ko, sambela ti Katolikɛ tindó sambela tɛ leta ti lo-lɛngɔ gbia ti Roma. Ni lindó ya apaganɔ gba ati awakristo. Asambela bandandó yengɔ tɛnɛ ti trinite mɛ ta Ngbangɔ tɛnɛ tɛnɛ ni ma.

Tɛnɛ ti trinite atondó azi ti sambela gba ya ala tɛnɛ ya, se du ya Yezo dundó Nzapa ko, Maria lengbi ti dungɔ ta Nzapa. Na bulu ti 431 N.E., na bombi kɔi ti sambela mɛ ali ka Efɛzɛ ndó la atɛnɛ yangondo ya Maria du “Ta Nzapa.” Bo na pɛ bombi niko la sambela tɛ Maria amu ndo. Na lo mɛ ya apaganɔ gba abandandó tingɔ awakristo, yɛkɛ yɛkɛ alimɔ na angbilondo tɛ Maria abandó mungɔ ndo tɛ anzapa tɛ la ti awe mɛ ndo hɛ̃ andasewa, nga mabere Artemis mɛndó azi ti Roma ndo ili lo ya Diana nga na Isis.

Na bulu ti 432 N.E., Papɛ Sixte III hɛ̃ndó nyɔ ya akĩ da nzapa kɔi ka Roma na lo ti ndima tɛ “Ta Nzapa.” Akĩ nindó dã na tempelo kɔi mɛndó la gba, mɛ akĩ ni na lo ti ndima tɛ nzapa kɔi ti wali ti Roma mɛ ndo ili lo ya Lucine mɛ ndo li ya adũ ayangambi. Wa sungɔ mbɛti kɔi tɛnɛndó na lo ti da nzapa niko ya, ni du “ye mɛ ngbã tee ndɛ, mɛ ndo fa se mɛ sambela tɛ Maria amu ndo ti sambela ti kota ta, nzapa wali tɛ apaganɔ, na ngoi mɛ sambela tɛ awakristo ti ila gɛgɛrɛ ali ka Roma.”—Mary—The Complete Resource.

a Asambela gba ndo pa ya, Maria du ta Nzapa. Ngoi mɛndɛ̃ ala ndo ili lo ya “Gbia wali ti ndozu” bere Theotokos, tɛnɛ ti grɛki mɛ ndo fa ya “Zo mɛ dũ Nzapa.”