Soolya wa Anapwa Aka
NICK yoowo onakhala o Oregon, E.U.A. ooloca: “Woopaceryani wa eyaakha ya 2014, kaapacerya waakuxa anapwa aka eeli akhaani wi keece mu epooma yeeyo kaakhalaaka. Ntoko yookhovelela aya, Anamoona a Yehova yaawo yaakhala va epooma, yaaneemela ni ikarinya saya sa soolaleeryiwa. Awo yaanawarela phaama, nave moonthamwene yaanaaxeleliha oothene yaawo yaavira.
“Anamoona a Yehova yaale yaari ooreera murima ohiya pahiru ni achu nyenya tho ni anapwa aka. Nihiku nimoha, Elaine, yoowo eemenle waacamela va ekarinya, aahaavaha ipolaxa anapwa aka yaale. Emanle weereya yeela, vaavaa naacamelaahu ekarinya, anapwa yaanachuna oya weiwo yaariwo Anamoona a Yehova wi yaavahe ipolaxa.
“Saavira miyeeri vakhaani. Anapwa yaanapuha ipolaxa saya, nave miyaano kaanahakalala ochekula vakhaani ni Anamoona a Yehova. Nyenya miyaano nkaachuna ochekula vancipale ni yaawo. Kiiha kirino iyaakha opwaha 70, nave kaanakhwa minikwa wa yeeyo Anamoona a Yehova yaaroromelaaya. Nthowa na osarasareya murima ni ekerexa ya Aprotestanti, kaahoona okhala waphaama omuhuserya Piipiliya mukhataaka.
“Moovira wa elukuluku, kaawoona Anamoona a Yehova akina a mmakupa oohiyanahiyana yaawo yaakhala vapooma, yeemenle ni ikarinya saya. Awo ilukuluku soothene yaari oonthamwene. Awo tho yaanaakhula makoho aka orweela Mpiipiliyani nave eyo yaahikeeriha waaroromelaxa yaawo.
“Nihiku nimoha, Elaine aakikoha, ‘Apwanne munnaroromela wi axinama yoovaha yoorweela wa Muluku?’ Miyaano kaahimwaakhula, ‘Aai, Miyaano kinnaroromela!’ Elaine aakaalakhanyerya Isaiya 11:6-9. Voocharela, kaanachuna ohuserya vooloca sa Piipiliya, nyenya nlelo nkaachuna waalakhanya echu vyakala ya Anamoona a Yehova.
“Mmahiku oocharela, kaasiveliwa vancipale ochekula ni Elaine vamoha ni aiyawe, Brent. Awo yaakiceenyerya omwaalakhanya Mateu ophiyerya Saweriwa T’arummwa wi kiiwexexe yeeyo enavolowelavo okhala Mukristu eeparipari. Mwawiihiiha miyaano kaaheerano. Ehivinrevo elukuluku yincipale, kaaheemererya omuhuserya Piipiliya ni Brent vamoha ni Elaine. Yaari elimwi ya 2016.
“Nkaacompela yoohuserya aka Piipiliya esumana ti esumana nave kaanaphiya mmithukumano sa Anamoona a Yehova. Kaaniisoona okhala ooreeliheya ni oohakalala moorweela wa ohuserya yeeyo Piipiliya onaloceiye. Elukuluku vakhaani ohoolo waya, kaapatisiwa ntoko Namoona a Yehova. Vano kirino iyaakha 79 nave kinnathamalela vancipale nthowa nawi koophwanya malapelo eeparipari. Yehova ookireeliha moorweela wa okikeriha mu emusi awe ya alapeli awiiveleela.”
