Wakhala wi munnaavya ekano wi mvoothe othanana, munahaala ophwanya miruku soohiyana hiyana—ikina soophara muteko opwaha ikina. Akhweya ti nthowa nawi, ntoko elociwaaya mmwaha ovirale, muchu ti muchu onathanana mmukhalelo woohiyana. Echu eni emukhaviherye muchu mmoha heni ephare muteko wa muchu mukina.

Naamwi hiiha, wookhalavo ohoolela yoowo waakhavihenrye ancipale. Wiiliwiili onalociwa ni yaale anavaha ikano wa anaamukhwele, nave ohoolela wa malakiheryo yaawo onnooniherya wi teeparipari nave wi annaphwanyeya mu liivuru akhalai amiruku, Piipiliya.

• Alipa ootholathola akina aathokororya wi ekano eyo ti yoochuneya wi muchu avoothe oothanana. Ilukuluku ikina, akhweya munamuchuna okhala meekhinyu. Akhweya munamukhala oonyeenyeya ni yaawo aneererya wookhaviheryaani. Eyo enneereya.

• Muhuupuwele wi munaphwanela okhalaka ni akina ilukuluku soothene, nto muhikhalekexa mukhatiinyu. Opwaha soothene, munahaala ochuna nikhaviheryo naya omwaahiyu. Mwaaleele akina mwaphaama echu munachunaanyu mweelukuluku aya ni echu muhinachunaanyu.

• Mwawiiwanana ni soothowa sanyu, mphimelele elukuluku ya okhala ni achu akina ni ya okhala mukhatiinyu.

PIIPILIYA ONI: “Ti yaphama okhala eli, ohiya okhala mutxhu mekheiye . . . Mmoha ùwa, mukhwawe onammukhaviherya.”—Eklesiyaste 4:9, 10.

• Ophimelela yoolya enahaala wookhaviheryaani mu okacamiheya onarweela wa othanana. Mweererye olya sawiima soohiyana hiyana, makukhu analyiwa, ni imece ihirino epaanya.

• Nwuryeke maahi awaaca ni soowurya ikina inakhaviherya mwiili.

• Waakhala wi hamunakhalano nchuno na olya, mulyeeke vakhaani moohihiyererya. Akhweya mmukohe totore vooloca sa meerelo makina. *

• Opaka mukwaha ni mikhalelo mikina sa ovyakiha mwiili inanwerya ovukula othanana. Ovyakiha mwiili onanwerya ovaha elukuluku ya wuupuwelela naari omaaliha echu yeeren’ye.

PIIPILIYA ONI: “Nave havo otonko onyemula mwili awe, nto mutxhu ti mutxhu onnapwatxha mwili awe, onnalyiha ni onnakhapelela.”—Éfeso 5:29.

• Okona ti woochuneya xaxaxa wa yaale akhweliwe, woona wi othanana onneeriha okhala ookhulumuwa.

• Mukhaleno ephoole onwurya kafe ni soowurya soohapala, woona wi inanwerya waakanyerya ikhove.

PIIPILIYA ONI: “Nto ti yotxhuneyasa mutxhu witxhùwa vakhani, èliwaka murima ni itxhu vakhani, ohiya mutxhu olapa ahiphurak’etxhu!”—Eklesiyaste 4:6.

• Musuwele wi othanana wa achu ti woohiyana. Akhweya munamuchuna olakelela meerelo oophara muteko ari oochuneya wa nyuwo.

• Ancipale annoona wi oloca moonelo aya wa akina ennaakhaviherya ovootha othanana, nave akina haneerano. Alipa ootholathola ahoona wi wooniherya moonelo wa othanana ti woochuneya wi nivoothe nikacamiho nenlo. Waakhanle wi munnachuna omuleela muchu nave munoovelela weerano yeeyo, mpacerye vakhaani vakhaani moorweela wa oloca moonelo anyu wa nthamwene munamuroromelaanyu.

• Achu akina anoona wi winla onnaakhaviherya ovootha othanana waya, nave akina annawerya ovootha naamwi yinlale vakhaani.

PIIPILIYA ONI: “Weyano mekhà onasuwela ohawa wà.”—Masiposipo 14:10.

• Anaamukhwele akina anneererya omaliha othanana waya moorweela wa olya mirece naari soowurya soohapala. Sookhovelela seiyo ti soonanara. Ohakalala wa muchu ti wavakhaani nave onnaruuha makacamiho mancipale. Mweererye opaka ichu saphaama wi mvoothe wuukhuwa wanyu.

PIIPILIYA ONI: “Hankoni nirapihe wa sonanara sa mwili.”—2 Korinto 7:1.

• Ancipale annaphwanya nikhaviheryo mu ilukuluku sa othanana moorweela wa wiiweiha mmiteko.

• Nyuwo akhweya munamphwanya ohakalala vakhaani moorweela wa opaka naari olipiha onthamwene, ohuserya mavyakelo mavyaani naari okhala mu ochekulela naari othata.

• Moovira wa elukuluku ichu inahaala otorokeyaka. Munahaala woona wi elukuluku munakhalaanyu phaama ti yawaaca opwaha elukuluku ya othanana—eyo ennapaka makupa a openuwa.

PIIPILIYA ONI: “Sothene sokhalano elukuluku aya, . . . elukuluku yawinla, elukuluku yotheya, elukuluku yawikhupanyerya, elukuluku yawèliwa murima.”—Eklesiyaste 3:1, 4.

• Wakhala wooweryeya, mukhweihemiteko.

• Vaavaa munakhalaanyuno elukuluku ya okona, olapa, ni miteko mikina, akhweya munahaala woona wi ichu sinnakookela ntoko saaraaya khalai.

• Otitelela okhala oweiwa ni miteko sanyu enahaala wookhaviheryaani ovukula othanana mmuupuweloni.

PIIPILIYA ONI: “Wi ahupuweleke vantxipale mahiku a ekumi awe, Muluku onnera wi ateteiwe ni itxhu sawèliha murima.”—Eklesiyaste 5:20.

• Ancipale anapaka soolakelela itokweene emanle omuyeleela oosiveliwa, annakhalano ekeerelani.

• Wakhala wooweryeya, nweherye elukuluku yincipale muhaakumve othaama, otoroka muteko, naari oriha ichu sa oosiveliwa anyu.

PIIPILIYA ONI: “Onupuwela phama miteko sawe, nikhupi nawe ninnasareya; onakhumela murima miteko sawe, hanaphur’etxhu.”—Masiposipo 21:5.

• Anaamukhwele ancipale ahoona okhala wamphurelo opaka ichu inaakhaviherya omuupuwelela muchu yoowo okhwile.

• Nyuwo munamphwanya nlipiho mu orehererya iruku naari orepa va eyornali yaweereya ni ichu munuupuwelaanyu sa oosiveliwa anyu.

• Nweiwe ni ichu inahaala owuupuxeryaani ichu saphaama nave mooneke seiyo, vaavaa munakhalaanyu ooreheryeya.

PIIPILIYA ONI: “Mupuweleke iyakha ivinre.”—Malamulo 32:7.

• Akhweya muupuwele opaka mukwaha wa wiichuuwa.

• Wakhala wi wiichuuwa honakhala wamphurelo, akhweya munaphwanela opaka echu yoohakalaliha nihiku nimoha naari meeli ntoko opaka mukwaha, ni oxekurya mapuro ooreera.

• Ophiyerya wi opaka echu yoohiyana wa echu mwaakhovelenlaanyu weera, enamookhaviheryaani ovootha othanana.

PIIPILIYA ONI: “Murwe wiphini, nipuro nawipitheya ni mwitxhuwe vakhani.”—Marko 6:31.

• Muupuwele, elukuluku yeeyo munamalihaanyu mwaakhaviheryaka akina enamookhaviheryaani okhala phaama.

• Akhweya mpacerye waakhaviherya akina yaawo amuyeleenle oosiveliwa aya mookhwani, ntoko nthamwene naari muhima yoowo onachuna wiiwexexiwa moonelo awe.

• Waalipiha ni waahakararya akina enamoovahani ohakalala ovyaani ni yoolakelela yeeyo munachunaanyu.

PIIPILIYA ONI: “Wookhalavo ohakalala wawaaca mu ovaha opwaha mu waakhela.”—Saweriwa T’arummwa 20:35, TNM.

• Othanana onanwerya wookhaviheryaani wiiwexexa phaama echu eri yoochuneya.

• Mphure phaama ekari wi nvareryele mmukhalelo munapharihelaanyu okumi anyu.

• Wakhala wooweryeya, mpake matorokelo wa sookhweleya sanyu.

PIIPILIYA ONI: “Ti yaphama osekurya nipuro orivo winla ohiya osekurya nipuro onalyiwavo efesta. Oholo wa mutxhu òkhwa mutxhu ti mutxhu onnupuwela omala wa ekumi awe, okhwa ti w’atxhu othene.”—Eklesiyaste 7:2.

 Mweeparipari, hiyaavo echu enahaala omaliha moomalela othanana wanyu. Nto ancipale akhweliwe ananwerya weemererya mu saweereya saya wi ochariha meerelo aphaama, ntoko yaala alociwe mmwaha yoola wohaakhaviherya ophwanya nlipiho. Chiryene, ela tahi elista yawaakhwanela ya mukhalelo ori woothene wa ovootha wiicela. Nto wakhala wi moheererya sooleeliherya ikina sa seiya, munahaala woona wi iho inamooruhelaani ohakalala.