MWA HIIHAANORU WOOTHOLATHOLIWA MWAHA WA OTHANANA ONAKHALAVO WA OMUYELEELA OSIVELIWA MOOKHWANI. Ntoko noonnaahu mmiyaha ivinre, malakiheryo aphaama aalipa ootholathola ikwaha sincipale sinnanuupuxerya yeeyo Piipiliya onaloceiye. Eyo ennooniherya wi miruku sa liivuru yoowo akhalai nlelo ti soochuneya. Nto Piipiliya haiyene wi orimo malakiheryo aphaama pahiru. Ookhalano sooleeliherya seiho sihinaphwanyeya mu nipuro nikina nave wi sinanwerya waahakararya yaale amuyeleenle oosiveliwaaya mookhwani. Moone sootakiherya vakhaani:

• Asinthamwene ni amusi ahu akhwile hanahooxeya

  Piipiliya onnaloca wi “akhwile hanasuwelaru etxhu” nave wi ‘sinnarimela sawupuwela saya.’ (Eklesiyaste 9:5; Salumu 145:4) Ti nthowa nene Piipiliya onalikanyiheiye okhwa ni ikhove.—Yohani 11:11.

• Omuroromela Muluku oosivela ennaruuha nihakalaliho

  Piipiliya oni: “Mitho a Yehova * ari va ékhaikhai murima, nave maru awe annawiriana wunla waya.” (Salumu 34:15, NN) Nihuupuwele wi nivekelo pahiru mukhalelo wa wiichuuwa naari wa orehererya muupuwelo ahu. Mweeparipari, oloca muupuwelo ahu wa Muluku ennanikhaviherya okhalano onthamwene ni Mpatuxa ahu. Nave owo onanwerya opharihela ikuru sawe wi anilipihe.

• Yoowehererya ya omwaahiyu waphaama

  Nkaanyiheryani ohakalala oni okhalevo achu ookhwa yakookela okhala ni okumi veelaponi yavathi! Piipiliya onnaloca ikwaha sincipale sa elukuluku yeeyo. Nave onnathariha mukhalelo okumi onahaalaya okhala mu elukuluku yeeyo. Piipiliya onnaloca yeeyo Muluku onahaleiye opaka ariki: “Onanvuta mithori aya, nave horwa okhalavotho okhwa nari winla, nari ikutxho, nari witxela, wona wi sakhalai sòvira.”—Wupulula 21:3, 4.

Yoolaiherya ya Yehova, Muluku a Mpiipiliya, ya ochikiherya okumi wa yaawo akhwile ennaakhaviherya yaale anamuroromela. Yoolaiherya eyo ennaavaha ikuru wi evoothe wiicela wa omuyeleela muchu mookhwani. Ntoko yootakiherya, Ana omuyelenle iyawe emalinhe iyaakha 65 sa othelana. Owo ooloca: “Piipiliya onnakikhaviherya osuwela wi amusi ahu naari asinthamwene yaawo akhwile hanahoseya nave Muluku onarwa aaviiha mookhwani. Vaavaa kinuupuwelaaka sa omuyeleela iyaka, kinnuupuwelela sooloherya seiha. Sinnakikhaviherya okhala oovilela nnikacamiho nenlo!”

Tina, yoowo oromoliwe woopacerya wa erevista yeela, ooloca: “Ovinyerya vaavaa aiyaka akhwilaaya kinnoona nikhaviheryo na Muluku. Kookhalano moonelo woolipa mukhalelo Yehova okeerenleiye wi kiwerye ovilela mu elukuluku yeela yookacamiha ya ekumi aka. Piipiliya oolaiherya wi yaawo akhwile anamukookela okhala akumi, nave miyaano nkinakhwa minikwa wi yoolaiherya ela enarwa yaakhwanela. Eyo ennakikhaviherya otitelela oya vahoolo vaavaa kinahaalaaka owoona aiyaka wanaawiili.”

Achu ancipale yaawo anaroromela wi Piipiliya toororomeleya annoona emohamoha. Akhweya munamoona wi soororomeliha sa Piipiliya tahi seeparipari naari wi pahiru oloha. Nyenya muhaakumve wuupuwela mmukhalelo yoola, hamunoona wi waahaala okhala waphaama otholathola wi moone saari soororomeleya naari hooye? Nyuwaano munanwerya wiiwexexa wi Piipiliya chiryene nikhaviheryo naphaama wa yaale anavilela nthowa na wiicela wa okhweliwa.

Moone exilema vooloca sa mwaha yoola mu site jw.org/ngl

 MUKHALELO WA ACHU OOKHWA TUUVI?

MUNNACHUNA MICHAKA YAPHAAMA?