1 Akorintu 7:1-40
7 Vano vooloca sa ichu seiho murempaanyu, ti yaphaama wi mulopwana ahimutannye* muthiyana.
2 Nyenya wa nthowa na osareya wa ocapaheya,* mulopwana ti mulopwana akhaleno mwaariye, nave muthiyana ti muthiyana akhaleno iyawe.
3 Mulopwana amvaheke mwaariye yeeyo enamphwanelela, nave muthiyana tho eereno emohamoha wa aiyawe.
4 Muthiyana hanalamulela mwiili awe, nto iyawe tonalamulela; moolikana tho, mulopwana hanalamulela mwiili awe, nto mwaariye tonalamulela.
5 Muhikhoocaneke mukina ni mukhwaawe, voohikhala weemereryihana ooweeli mu elukuluku yoolakeleliwa, wi mwiiveleele mmavekelo nave voocharela mukhale vamoha, wi Satana ahiweeheeni wanthowa na ohiwerya wiihiiha.
6 Kinnaweemereryaani weerano yeela, nto ohiya ntoko nlamulo.
7 Kaanachuna wi achu oothene yaakhanle ntoko miyaano. Nyenya muchu ti muchu oovahiwa yamahala awe yoorweela wa Muluku; ti nthowa nene akina anathelaaya nyenya akina anatitelelaaya okhala aciye.
8 Vano kinnaloca wa yaale ahithenle ni wa anaamukhwele, wi ti yaphaama wa yaawo otitelela okhala hiiha ntoko yoomi.
9 Nto yaahiweryaka wiihiiha, ti woophwanelela othela opwaha wiiseeyela ni nchuno na okonihana.
10 Wa achu athenle kinnaalamulela, ohiya miyo, nto Apwiya, wi muthiyana ahimwalamwale ni aiyawe.
11 Nto oomwi amwalamwalano, ahitheliweru; hooye-hooye akookele waataana ni aiyawe; nave mulopwana hanaphwanela omuhiya mwaariye.
12 Nto wa akina kinnaloca, aa yoomi ene, ohiya Apwiya: Wakhala wi munna ookhalano mwaariye ohiri a munroromeloni nave yoola eemererya okhala ni yoowo, munna ahimuhiye.
13 Nave wakhala wi muthiyana ookhalano iyawe ohiri a munroromeloni, nave yoola eemererya okhala ni yoowo, murokora ahimuhiye iyawe.
14 Tiwi mulopwana yoowo ohiri a munroromeloni ori aweelihiwa wanthowa na amwaariye, nave muthiyana yoowo ohiri a munroromeloni ori aweelihiwa wanthowa na munna; wahaari hiihaa, anamwane anyu yaaya okhala oothanyeya, nto vano taweelihiwa.
15 Nto wakhala wi oohiroromela oolakelela omuhiya,* amuhiye; munna naari murokora hari oomakiwa mmukhalelo yoola, nto Muluku owiichanenleeni murecele.
16 Muthiyana, onasuwela hai waariki ohaavuluxe aiyaa? Naari mulopwana, onasuwela hai waariki ohaavuluxe amwaaraa?
17 Nyenya, hiiha ntoko Yehova omvanheiye muchu ti muchu makupa awe, mmoha ti mmoha eeceke hiiha ntoko Muluku omwiichanneiye. Nave kinnavaha nlamulo nenla wa miloko soothene.
18 Apwanne ookhala aari oothikiliwa vaavaa iichaniweiye? Atitelele okhala hiihaa. Apwanne ookhala aari oohithikiliwa vaavaa iichaniweiye? Ahithikiliwe.
19 Othikiliwa honataphulela echu, nave ohithikiliwa honataphulela echu; echu eri yoochuneyaxa ori ochariha malamulo a Muluku.
20 Mmoha ti mmoha, atitelele okhala mmukhalelo yoowo iichaniweiye.
21 Apwanne weyo wiichaniwe ori kapuro? Ohuukhuwe ni yeeyo; nto wawerya okhala ootaphuwa, opharihele ekari yeeyo.
22 Oothene yoole iichaniwe mwa Apwiya vaavaa aareiye kapuro, vano muchu ootaphuliwa mwa Apwiya; moolikana tho, oothene yoole iichaniwe vaavaa aareiye muchu ootaphuwa, vano kapuro a Kristu.
23 Nyuwo moothummwa ni esisapo; mmaale okhala akapuro a achu.
24 Anna, mmoha ti mmoha atitelele okhala vamiithoni va Muluku mmukhalelo yoowo iichaniweiye.
25 Vano wa achu ahintoko othela naari otheliwa, nkaano nlamulo noorweela wa Apwiya, nyenya kinavaha moonelo aka ntoko muchu oororomeleya moorweela wa ikharari sa Apwiya.
26 Mwawiihiiha, kinoona wi ti yaphaama muchu okhala ntoko okhanleiye wanthowa na sookacamiha sa mutano.
27 Apwanne moothela? Muheererye omuhiya mwaarinyu. Apwanne himuthenle? Muheererye omwaavya muthiyana.
28 Nyenya, naamwi weyo othenle naari otheliwe, hochenke. Nave wakhala wi muchu ohintonko othela naari otheliwa, athela naari otheliwa hanacheka nto yaale analakelela weerano, enarwa ekhalano sookacamiha* mookumini. Nyenya miyo kineererya woolopolaani wa sookacamiha seiha.
29 Opwaha yeela asinna, echu kinalocaaka tiila: Elukuluku ehanle yootepa okhuveya. Ovinyerya hiihaano oya muhoolo, yaale athenle ekhaleke ntoko wi hathenle;
30 yaale ananla ekhaleke ntoko wi hananla; yaale anahakalala ekhaleke ntoko wi hanahakalala; yaale anathuma ekhaleke ntoko wi haanono echu;
31 yaale anapharihela ichu sa mweelaponi, ekhaleke ntoko wi hanapharihela mwawaakhwanela. Woona wi mukhalelo wa elapo yeela onnatorokeya.
32 Mweeparipari, kinachuna wi muhikhaleke awuukhuwa. Muchu ohithenle onuukhuwa ni ichu sa Apwiya, woona wi onachuna waahakalaliha Apwiya.
33 Nto mulopwana othenle onuukhuwa ni ichu sa mweelaponi, woona wi onachuna waahakalaliha amwaariye,
34 nave ori ookawanyeya. Ohiya yeeyo, muthiyana ori muciye ni yoole ohintonko otheliwa anuukhuwa ni ichu sa Apwiya, wi ekhale aweela omwiilini hiiha ntoko omunepani. Nto muthiyana ootheliwa onuukhuwa ni ichu sa mweelaponi woona wi onachuna waahakalaliha aiyawe.
35 Kinaloca yeela ntakhara mphurelo anyu, ohiya woohiihaani,* nto wi kiweeriheeni opaka yeeyo eri yoophwanelela ni waalapa Apwiya moohihiyererya muhirino sooweiha.
36 Nyenya wakhala wi muchu ohithenle naari ohitheliwe anoona wi hanawerya ovareryela nchuno nawe na okonihana, nave waakhanle wi ohinnuwa, ti yaphaama wi athele naari atheliwe; hanacheka.
37 Vano, wakhala wi muchu oolakelela mmurimani mwawe, ahikhalano nchuno nyenya anawerya ovareryela yoochuna awe nave atinte* mmurimani mwawe yoolakelela ya ohithela naari ohitheliwa, onamweerano phaama.
38 Hiihaa tho, yoole onathela naari onatheliwa onneerano phaama, nyenya yoole oni ahithele naari oni ahitheliwe onamweerano phaamaxa.
39 Muthiyana ori oomakeya wa aiyawe elukuluku yeeyo awo aryaaya akumi. Nto wakhala wi aiyawe aakhwa, owo ori ootaphuwa wi atheliwe ni yoowo onamuchuneiye, pahiru mwa Apwiya.
40 Nyenya mmoonelo aka, owo onamukhala oohakalala wakhala wi ootitelela okhala hiihaa, ahitheliwe wanaawiili; nave kinnaroromela wi kookhalano tho munepa wa Muluku.
Inoota
^ Ela tiwi, ahikoneno.
^ Mu Ekriki, porneiya. Moone Masu Atharihiwe.
^ Naari: “omwalamwalano.”
^ Mu Ekriki, “soohooxa.”
^ Mu Ekriki, “ohiya wi koreyeeni muraakho.”
^ Naari: “alakelenle.”
