1 Petru 3:1-22
3 Moolikana, nyuwo athiyana, nwiiweleleke asiiyanyu, wi wakhala wi ari oohiiwelela masu, ewerye olekecheya moorweela wa meecelo anyu naamwi muhilonce echu,
2 woona wi aheerela onamoona sa meecelo anyu aweela vamoha ni ncicimiho nawiiseela.
3 Wiireeriha wanyu ohikhale wa vaate wa mwiili anyu, ntoko ovathaanya* miihi, owara ichu sa ooru naari soowara soowalamela . . .
4 nto okhale wa omuchu anyu wa mpuwa, wiireeriha ohinuuca, wa murima woomaala ni wawiichacala, yoowo orino esisapo etokweene vamiithoni va Muluku.
5 Tiwi, athiyana aweela murima akhalai yaawo yaamuwehererya Muluku, yiireerihaaya tho hiiha, ewiiwelelaka asiiyaya,
6 ntoko Sara aamwiiweleleiye Aparahamu, amwiichanaka pwiyaka. Nave nyuwo munamukhala anaawe, wakhala wi mootitelela weera yeeyo eri yaphaama nave muhoovaka echu.
7 Moolikana tho, nyuwo alopwana, mutitelele okhala ni asaarinyu muwiiwexexaka phaama.* Mwaacicimiheke yaawo ntoko epiya* ya waakuva ophweeya, woona wi Muluku tho mooreera murima ohaavaha yamahala ya okumi, hiiha ntoko oovanheiyeni nyuwo. Mwaaheerano hiiha, mavekelo anyu hewiriyaniwa ni Muluku.
8 Vookuchula, oothene nyuwo mukhale awiiwanana mmuupuweloni,* mukhupanyeryaneke,* mukhaleno osivela woonna, niphwanya ni wiiyeviha.
9 Muhikookiheke yoonanara ni yoonanara naari oruwana ni oruwana. Ohiya yeeyo, mwaareeliheke yaawo, woona wi Muluku owiichanenleeni yeela, wi mwaakhele mareeliho.
10 Tiwi, “yoole onasivela okumi nave onachuna woona mahiku aphaama onaphwanela ohiiha nlumi nawe wi nihiromoleru yoonanara nave eyano awe ehiloceru sawootha.
11 Asepeke yeeyo eri yoonanara nave eerekeno yeeyo eri yaphaama; aavyeke murecele ni wiilipiserya okhapelela yoowo.
12 Ntakhara miitho a Yehova ari ni awookololowa murima, nave maaru awe annawiriyana mavekelo aya a vathi va murima, nto ethoi ya Yehova ennaarukunuwela yaawo aneera ichu soonanara.”
13 Mweeparipari, taani ani oohooseeni wakhala wi muri amvai mu weerano yeeyo eri yaphaama?
14 Nto, naamwi muhooxeyaka wa nthowa na wookololowa, nyuwo munarwa mukhala oohakalala. Mwawiihiiha, muhooveke yeeyo awo anoovaaya,* naari mano okhala oohaleeliheya.
15 Nto mmweelihe Kristu ntoko Pwiya mmurimani mwanyu. Ilukuluku soothene mukhale ooreheryeya wi mwiisaakihe vamiithoni va oothene yaale anookohaani sa ewehereryo muryaanyuno, nto mweerakano yeela mwawiichacala ni ncicimiho nawiixeela.
16 Mukhalekeno yawuupuxerya-ya-murima yaphaama, wi vaavaa achu anoolocaayaani moonanara, yaawo anoolocaani moonanara ekhale awuuliheya muru wa nthowa na meecelo anyu aphaama ntoko oomuchara a Kristu.
17 Ti yaphaama wa nyuwo ohooxeya wa nthowa na weera yeeyo eri yaphaama, wakhala wi eyo yookhwela ya Muluku, ohiyana weera yoonanara.
18 Tiwi, Kristu ookhwa ekwaha emoha wa ilukuluku soothene ntakhara soocheka, muchu mmoha awookololowa murima wa achu oohookololowa murima, wi ookeriheeni wa Muluku. Owo ookhwa mwa mwiili, nyenya ohaakhela okumi mwa munepa.
19 Nave mmukhalelo yoola owo aaya olaleerya wa minepa saawaleliwe,
20 seiho saari soohiiwelela vaavaa Muluku aaweheryeiye moopixa murima* mmahiku a Nowa, atekiwaka mwaaceya, yoowo achu a vakhaani, ela tiwi, athanu nararu,* yaavolonwemo evuluxiwa mwa maahi.
21 Opatiso, yoowo onalikanela ni yeela, onnoovuluxaani tho hiihaano (tahi oviihavo nikhurumela na mwiili, nto onooniherya omveka Muluku yawuupuxerya-ya-murima yaphaama), moorweela wa oviihiwa mookhwani wa Yesu Kristu.
22 Owo ori omoono woolopwana wa Muluku, woona wi okele wirimu, nave weiwo ankeelo, otokweene ni owerya annamwiiwelela yoowo.
Inoota
^ Naari: “ochava; oluwa.”
^ Naari: “mwawiiwanana ni masuwelelo; mooniheryaka waapwacha.”
^ Naari: “evaasu; mwaapu.”
^ Naari: “mukhaleno muupuwelo mmohamoha.”
^ Naari: “muthananelaneke.”
^ Naari akhweya: “muhooveke woopopiha waya.”
^ Mu Ekriki, “vaavaa opixa murima wa Muluku waaweheryaaya.”
^ Naari: “ikumi thanu nararu.”
