Aefesu 3:1-21
3 Wa nthowa nenla, miyaano, Paulo, mulipa oophariwa wa nthowa na Kristu Yesu ntakhara nyuwo, achu a maloko . . .*
2 Chiri, mohiiwa sa mahala matokweene a Muluku, muteko yoowo kinnyereryiwaaka wa nthowa nanyu.
3 Muluku ookuupululela yoovitheya yaweela, ntoko koorepenlaakaani mwa masu a vakhaani.
4 Mwawiihiiha, vaavaa munaalakhanyaanyu yeela, nyuwaano munanwerya wiiwexexa wi kookhalano yoovitheya yaweela ya Kristu.
5 Wa muyareriwo mukina, anamwane a achu havahiwe osuwela yoovitheya yeela hiiha ntoko vano yuupululiwaaya mwa munepa wa arummwa awe aweela ni alipa a miririmu:
6 Wi achu a maloko, mwawiiwanana ni Kristu Yesu ni moorweela wa michaka saphaama, yaahaala okhala mikelampa, makupa a mwiili mmohamoha ni wuuka vamoha ni hiyo yoororomeliha.
7 Miyo kookhala namuteko a yeela mwawiiwanana ni yoovaha ya mahala matokweene a Muluku, yaawo kinnyereryiwaaka moorweela wa olapa wa owerya wawe.
8 Wa miyaano, mukhaanixa a aweela murima oothene, koovahiwa mahala matokweene yaala, wi kilaleerye michaka saphaama wa maloko vooloca sa muhakhu woohaalakhanyeya wa Kristu
9 ni weeriha wi oothene yoone ohooleliwa wa yoovitheya yaweela yeeyo ovinyerya khalaixa yaavithiwe wa Muluku, yoowo opatunxe ichu soothene.
10 Yoolakelela yaari wi, moorweela wa muloko, vano esuwelihiwe alamuleli ni mamwene a wiirimurimu miruku soohiyanahiyana sa Muluku.
11 Ela eri mwawiiwanana ni yookhwela yoohimala owo aapankeiye mwawiiwanana ni Kristu, Apwiya ahu Yesu,
12 mwa yoowo nookhalano otaphuwa yoola wa oloca moohoovelela nave nnanwerya omwaacamela Muluku mootaphuwa* nroromelaka, moorweela wa nroromelo nahu mwa Kristu.*
13 Mwawiihiiha, kinnoovekaani wi muhivelavele wa nthowa na makacamiho kinahooxeyaaka ntakhara nyuwo, tiwi, awo anataphulela ncicimiho wa nyuwo.
14 Wa nthowa nenla, kinnakokhora vamiithoni wa Atiithi,
15 yaawo anavaha masina imusi soothene wirimu ni veelaponi yavathi.
16 Kinnavekela wi awo, moorweela wa waaca wa ncicimiho naya, elipihe omuchu anyu wa mpuwa ni ikuru, moorweela wa munepa aya,
17 nave wi moorweela wa nroromelo nanyu, Kristu amake mmurimani mwanyu ni osivela. Hiihaa, nyuwaano muthipeleye nave mutikitheryeye mmathipelo,
18 wi vamoha ni aweela murima oothene, muwerye wiiwexexa mwawaakhwanela tuuvi ori oruku, orekama, weemela ni wiixa,
19 ni osuwela osivela wa Kristu, yoowo onapwaha osuwela, wi musareye waakhwanela woothene Muluku onavaheiye.
20 Vano wa yoowo, mwawiiwanana ni owerya wawe yoowo onalapa mwa hiyo, onanwerya opaka sincipale opwaha mummo nnavekaahu naari nnaanyiheryaahu,
21 wa yoowo avahiwe ncicimiho moorweela wa muloko ni moorweela wa Kristu Yesu, ilukuluku soothene, okhala wookhala. Aamen.
Inoota
^ Woonaru masu ala anatitelela va eversikulu ya 14.
^ Mu Ekriki, “ni waacamela.”
^ Mu Ekriki, “yoowo.”
