Saweeriwa ti Arummwa 4:1-37
4 Vano Petru ni Yohani erikimulocaru hiihale wa achu, yaarwa alipa a mukucho, muhooleli aalipa ooweherya a empa ya Muluku vamoha ni Asatuki.
2 Awo yaanyeenyeya woona wi arummwa yaanaahusiha achu nave yaanalaleerya vanlakani vooloca sa oviihiwa mookhwani wa Yesu mwa alipa ookhwa.*
3 Mwawiihiiha, awo yaahaaphara, yaawalela mukariposo ophiyerya mmeeloni mwaya, woona wi waahiilavo.
4 Nto ancipale a yaawo yiiwale masu yaanaroromela, nave waaca wa alopwana yaawo, yaari echu ya macikhwi mathanu.*
5 Waaxilaayavo, ahooleli aya, asitokweene, ni alipa oorepa yaathukumana o Yerusalemu,
6 vamoha ni Anaxi yoowo aari muhooleli a alipa a mukucho, Kayafa, Yohani, Alexantre, ni oothene a emusi ya muhooleli a alipa a mukucho.
7 Awo yaamweemexa Petru ni Yohani veeri vaya epacerya waakoha eriki: “Ni owerya wawani naari mwa nsina nawani mweenraanyuno yeela?”
8 Hiihaa, Petru asaren’ye ni munepa waweela, aaloca wa yaawo ariki:
“Ahooleli a muloko nyu ni asitokweene,
9 waakhanle wi nnathorihiwa olelo wa nthowa na echu yaphaama nimweerenlaahu mulopwana ola oorakala, nave mwaachunaka osuwela taani omweerinhe mulopwana ola okhala phaama,
10 suwelani oothene nyuwo vamoha ni achu oothene a Isarayeli, wi mulopwana ola eemenle vamiithoni vanyu openuxiwe mu nsina na Yesu Kristu o Nasareti, yoowo mwaamwiiphalaanyu vamwirini nto Muluku amviiha mookhwani, aa, moorweela mwa yoowo mulopwana ola tokhanleiye phaama.
11 Yesu yoola, ti ‘nluku nenlo nyuwaano alipa ooteka mwahaapwanchaanyu, nenlo naakhanle nluku noochuneya noopharelano empa.’*
12 Opwaha yeeyo, hiwaavovo ovuluxiwa mwa muchu mukina, woona wi hinaavo tho nsina nikina vathi veerimu nivahiwe wa achu, nenlo nnaweryaahu ovuluxiwano.”
13 Vaavaa yaamoonnaaya Petru ni Yohani elocaka moolipa murima,* nave esuwela wi yaari anammawaani ni oohihuserya,* yaatikhina. Nto yaahiiwexexa wi yaawo yaakhala vamoha ni Yesu.
14 Awo hiyaarino masu, woona wi yaanamoona mulopwana yoole aapenuxiwe eemenle vaavale ni yaawo.
15 Mwawiihiiha, awo yaahaalamulela wi ekhumemo mu Sineetriyu,* ehala evaanelaka sa yeeyo
16 eriki: “Niweerele eheeni alopwana yaala? Woona wi chiryene, moorweela wa yaawo yoheereya yootikhiniha yawooneya, yeeyo esuweliwe ni achu oothene o Yerusalemu nave hinnawerya okhooca.
17 Wi echu yeela ehivuweexa wa achu oothene, hankooni niwoopopihe wi ehiloce tho wa muchu mukina mu nsina nenla.”
18 Voocharela, yaawiichana yaalamulela wi ehiloce tho naari ohusiha mu nsina na Yesu.
19 Nto Petru ni Yohani yaawaakhula yaawo eriki: “Muupuwele nyuwo aneene waari waphaama vamiithoni va Muluku, owiiwelelaani nyuwo opwaha omwiiwelela Muluku.
20 Nyenya wa hiyo, haniwerya omaala oloca ichu noonnaahu ni niiwalaahu.”
21 Mwawiihiiha, emanle owoopopihaxa yaahaataphula, woona wi hiyaaphwanyenrye mathowa a waahooxa nave tho wanthowa na achu; woona wi achu oothene yaanamucicimiha Muluku wanthowa na yeeyo yeeren’ye.
22 Mulopwana yoole aapenuxiwe moorweela wa yootikhiniha* yeela, aarino miyakha opwaha makhumi maxexe.*
23 Emanle otaphuliwa, Petru ni Yohani yaaya wa oohuserya akina nave yaaleela ichu ahooleli a alipa a mukucho ni asitokweene yaaloncaaya wa yaawo.
24 Yiiwalaaya yeela, mwawiiwanana awo yaaloca moovuwa wa Muluku, eriki:
“Pwiya Ooweryaxa, Nyuwo mpatunxe erimu, elapo yavathi, ephareya ni soothene inakhala mwemmo,
25 ti nyeenyu mwaalonce moorweela wa munepa waweela wa nikholo nahu Tavite, namuteko anyu, muriki: ‘Nthowa taani maloko anuukhuwaaya nave achu anuupuwelelani ichu satheru?
26 Mamwene a veelaponi yavathi ahiirehererya nave alamuleli aathukumana vamoha wi ewane ni Yehova ni oothanliwa* awe.’
27 Mweeparipari, Heroti ni Pontiyu Pilatu yaathukumana mu epooma yeela ni achu a maloko vamoha ni nloko na Aisarayeli wi ewane ni kapuro anyu aweela, Yesu yoowo mmuthanlilaanyu,
28 wi yeere yeeyo mwaalakelenlaanyu khalai wi yeereye moorweela wa ikuru ni okhwela wanyu.*
29 Vano khwoo Yehova, mvarerye woopopiha waya, nave mweerihe wi akapuro anyu etitelele oloca masu anyu moolipa murima,
30 mookololaka ntata nanyu wi mpenuxe, mweerakano ineneeryo ni sootikhiniha mu nsina na Yesu namuteko anyu aweela.”
31 Yaamanlaaya opaka nivekelo na vathi va murima,* nipuro nenle yaathukumannaayavo naacikinyeya nave oothene yaasareya munepa waweela, epacerya oloca masu a Muluku moolipa murima.
32 Opwaha yeeyo, muloko yoowo waaroromenle waarino murima mmoha ni muupuwelo mmoha, nave haavo aaloca wi yeeyo aareiyeno yaari yawawe, nto yaanakawana soothene yaaryaayano.
33 Arummwa yaatitelela weerela onamoona sa ovinya mookhwani wa Apwiya Yesu ni owerya otokotoko, nave oothene yaanareelihiwa vancipale ni mahala matokweene a Muluku.
34 Chiryene, haavo mwa yaawo aathoiwa, woona wi oothene yaale yaarino imaca naari ipa yaanatumiha nave yaanaruuha ikhorowa sene,
35 eveleela wa arummwa. Voocharela, aanakaweliwa mmoha ti mmoha ntoko othoiwa wawe.
36 Aaheerano tho Yosefe, yoowo arummwa yaamwiichanaaya Parnape (nsina nenlo nnataphulela, “Mwaana Oohakararya”), aari Muleevi a elapo yo Xipre,
37 yoowo aarino emaca; owo aatumiha, aruuha ikhorowa sene nave aveleela wa arummwa.
Inoota
^ Naari: “oviihiwa variyari va alipa ookhwa weeren’ye ni Yesu.”
^ 5.000.
^ Mu Ekriki, “muru wa vamuthokoni.”
^ Naari: “elocaka moohoovelela.”
^ Ela tiwi, hiyaavolonwe mu ixikola sa ahooleli a malapelo; ela henataphulela wi hiyaahusenrye echu.
^ Moone Masu Atharihiwe.
^ Naari: “eneneeryo.”
^ 40
^ Naari: “Kristu awe.”
^ Naari: “miruku sanyu.”
^ Naari: “yaamanlaaya ovekela ni murima woothene.”
