Sekimej tetlayokoliltin melak tiktlasojkaitaj pampa otechmakak yakaj akin kipiya tlanauatijkayotl noso akin melak tiktlasojkaitaj. Oksekimej tetlayokoliltin, maski xpatioj, tiktlasojkaitaj pampa otechmakak se tochanejkauj akin melak tiktlasojtlaj noso akin iuan touikaj akin melak itech titlaneltokaj. Ijkon ken ipan onochiuj Rusell niman Jordán akin yotikinteneujkej. ¿Tleka uelis tikijtoskej ika tlaxtlauijli noijki ijkon?

Kachtopa, Biblia kijtoua “Dios [...] okuajtitlan isenteKonetsin ipan tlaltikpaktli para itechkopa iKonetsin ma tikpiakan nemilistli para nochipa” (1 Juan 4:9). Ika yejon melak tlasojti yejuin tetlayokolijli. Xnemi okse akin kipiya tlanauatijkayotl ken toTajtsin. Ika yejon, se salmista hebreo okijkuilo: “Tejua, akin motoka Jehová, san tejua tiUeyixtika ipan nochi tlaltikpaktli” (Salmo 83:18). Tejuamej xtechmelauaya tikseliskej se tetlayokolijli itech akin melak ueyixtok.

Ika ome, toTajtsin yejua kentla toTaj yeskia (Isaías 63:16). ¿Tleka ijkon? Yejua otechmakak tonemilis. Noijki yejua melak najmana topampa ijkon ken se tajtli akin tetlasojtla najmana ipampa ikoneuan. Ijkuak toTajtsin okinnots ikalpan yeuejkaui, Efraín, okitlajtolti: “¿Xmelak ika Efraín se konetl akin niktlasojkaita, se konetl akin niktlasojtla? [...] Melak ueyi tlen nikmachilia ipampa. Niman yemelak nikmatstika ika nikiknelis” (Jeremías 31:20). ToTajtsin san noijki kimachilia ipampa itekipanojkauan ipan yejuin tonaltin. Yejua xsan toTajtsin akin nochi ueli kichiua noijki yejua se toTaj akin xtechkaua niman akin iuan touikaj. ¿Xmelauak ika yejon kichiua ika yejuin tetlayokolijli melak matiktlasojkaitakan xijkon ken okse tetlayokolijli?

Sekimej tetlayokoliltin melak tiktlasojkaitaj pampa akin otechmakak xokichiualtijkej, okichiuj pampa melak techtlasojtla. Se akin ika iyojlo kitemaka itlaj xkichia makitlaxtlauilikan itech tlen kuajli kichiua.

ToTajtsin okuajtitlan iKoneuj pampa yejua techtlasojtla. Biblia kijtoua: “Dios okipantlantij ken techtlajsojtla ijkuak okuajtitlan isenteKonetsin”. ¿Tleka okuajtitlan? Pampa “itechkopa iKonetsin ma tikpiakan nemilistli para nochipa” (1 Juan 4:9). ¿Nonekiya toTajtsin makichiua yejuin? Ka, xnonekiya. Yejua okichiuj ipampa “iteiknelilis”, niman okiteititi “itechkopa Jesucristo yejuan okitlaxtlau [...] totlajtlakol” (Romanos 3:24).

¿Tleka tetlayokolijli tlen techmaka toTajtsin teititia iteiknelilis? Biblia techtomilia: “Maski ok titlajtlakolejkej katkaj, Cristo topampa omik. Ijkin, tej, Dios otechititij ken sanoyej techtlajsojtla” (Romanos 5:8). Ken tikitaj, toTajtsin okiteititi iueyi tlasojtlalis inpampa akin xkojtikej, akin xkipiyaj akin makinpaleui niman akin tlajtlakolejkej. Tejuamej xtlaj otikchiujkej niman ijkon tikseliskej itlasojtlalis nion xuelis tiktlaxtlauiliskej. Yejuin tetlayokolijli teititia melak ueyi tlasojtlalistli tlen xkeman noita.

Sekimej tetlayokoliltin melak tiktlasojkaitaj pampa akin otechmakak ononek miyek tlen kichiuas. Ijkuak yakaj melak kitlasojkaita itlaj tlen kipiya niman techmaka, melak tikpatiojkaitaj tetlayokolijli ipampa tlen okichiuj.

ToTajtsin “okitemakak isenteKonetsin” (Juan 3:16). Yejua ueliskia xkitemakaskia akin melak kitlasojtlaya. Ipan miyek xiujtin, ijkuak toTajtsin okichiuj nochi tlen onka, Jesús otekit iuan niman toTajtsin “melak okitlasojtlak” (Proverbios 8:30). Jesús yejua “itlajsojkaKonetsin” toTajtsin niman “yejua okipantlantiko ken ijki” toTajtsin “yejuan xnesi inemilis” (Colosenses 1:13-15). Xkeman nemij omemej akin melak kuajli manouikakan ken toTajtsin niman Jesús.

San ika, toTajtsin “hasta iKonetsin xokinenek para topampa okitemakak” (Romanos 8:32). Jehová otechmakak tlen melak kuajli tlen kipiaya. Xonka okse tetlayokolijli tlen melak matlasojti ken yejuin.

Sekimej tetlayokoliltin melak tiktlasojkaitaj pampa techmakaj ijkuak techpolojtika noso melak noneki. Se neskayotl, xnemili kenon tiktlasojkamatiskia tla yakaj itech iyojlo kisa kitlaxtlaua pajtli tlen ika timopaleuis. ¿Xmelauak ika tiktlasojkaitaskej yejuin tetlayokolijli tlen melak techpolouaya?

“Ijkon ken nochimej mikij pampa itech Adán tekoneuan, no ijki nochimej yejuan itech Cristo teyaxkauan oksejpa yoliuiskej” (1 Corintios 15:22). Pampa tinochimej tiualeua itech Adán, tinochimej xueli timakisaj itech kokolistli niman mikilistli nion xueli touikaj iuan toTajtsin niman xueli tikpiyaj totlamachilis chipauak ixpan. Niman pampa xtikpiyaj kojtilistli, xuelis tikchiuaskej matikpiyakan nemilistli nion oksekimej makipiyakan. Itlajtol toTajtsin kijtoua: “Nion se itech yejuamej xuelis kikouas se tokniuj, nion xuelis kimakas toTajtsin itlaj tlen ika kimakixtis [,...] xkeman uelis kitlaxtlauaskej” (Salmo 49:7, 8). Tejuamej melak nonekiya matikpiyakan yejuin tlapaleuijli pampa xkeman ueliskia tiktemakaskej yejuin tlaxtlauijli. Tla xakaj techpaleuiskia, tejuamej xuelis timakisaskiaj.

Pampa melak techtlasojtla, Jehová ika iyojlo okitlaxtlauj “pajtli” tlen techpolouaya, ika yejon itechkopa Jesucristo “nochimej [...] oksejpa yoliuiskej”. ¿Kenon tlaxtlauijli kichiua yejuin? Ipampa “iyesyotsin Jesucristo, yejuan iKonetsin Dios, techchipauilia nochi totlajtlakoluan”. Totlaneltokil ipan inemilis Jesús tlen okitemakak kichiua matechtlapopoluikan totlajtlakoluan niman matikpiyakan nemilistli tlen xkeman tlamis (1 Juan 1:7;  5:13). ¿Niman kenon kiminpaleuis tlaxtlauijli tochanejkauan akin yomijkej? Biblia kijtoua: “Ken ipampa se tlakatl otsimpeu on mikilistli ipan in tlaltikpaktli, no ijki ipampa se tlakatl otsimpeu inyoliuilis on mimikej” (1 Corintios 15:21). *

Xonka nion se tetlayokolijli melak ueyi tlen maualeua itech akin ueyixtika, tlen makiteititi melak ueyi tlasojtlalistli ken inemilis Jesús tlen onotemakak. Xakaj techmaka se tetlayokolijli tlen melak ueyi ijkon ken toTajtsin yotechmakak. Tetlayokolijli melak ueyi tlen techmakixtiskia itech tlajtlakojli niman mikilistli. Kema, xonka okse tetlayokolijli tlen san noijki matlasojti ken tlaxtlauijli.