Tiknextis se tetlayokolijli tlen yakaj melak makuelita, se ueyi tekitl. Yejuin ijkon, pampa akin kijtos tla kipatiojkaita yes akin kiselis tetlayokolijli: tlen yakaj kitas melak ueyi kijtosneki, kanaj okse xijkon kitas.

Se neskayotl, se ichpochtli noso se telpochtli kanaj kijtos ika se dispositivo electrónico tlen san kemach okis yejua tlen melak kuajli tetlayokolijli. Niman se akin iueyi kanaj melak kitlasojkamatis kiselis itlaj tlen youejkauj yokipixkej iuejkachanejkauan. Niman ipan okseki kalpamej, telpokamej niman akin iuejueyimej kuelitaj makintlayokolikan tomin, pampa ijkon uelij kikuij ken yejuamej kinekij.

Maski ijkon, miyekej notekimakaj kinextiskej tetlayokolijli tlen melak ueyi kijtosneki niman ijkon kimakaskej akin melak kitlasojtlaj. Maski xnochipa uelis nochiuas, onka seki, tla tikchiuaj, tlen uelis techpaleuis matikchiuakan ijkon. Tikitaskej naui tlemach tlen techpaleuis kuajli matechselilikan totetlayokolil.

Tlen kinekiskia akin kiselia. Se tlakatl akin chanti Belfast (Irlanda del Norte), kijtoua ika bicicleta tlen ika notlatlalolo tlen okiseli ijkuak kipiaya 10 noso 11 xiuitl yejon tetlayokolijli tlen melak ueyi kijtosneki tlen yokiseli ipan nochi inemilis, pampa ken okijto, “melak niknekiya se nikpiyas”. Yejon kijtosneki ika melak kuelitaskej totetlayokolil tla akin kiselia melak kinekiskia kipiyas. Xtlanemili itech akin tikneki tiktlayokolis itlaj. Xyejyeko xmati tlenon kipatiojkaita, pampa tlen nopatiojkaita yejon tlen noneki nopiyas. Se neskayotl, abuelitos kipatiokaitanij nemiskej iuan inchanejkauan. Kanaj kinekiskiaj miyekpa kimitaskej inkoneuan niman imixuiuan. Tla inchanejkauan kinnotsaj matlakuatij san sekan, yejuamej melak kipatiojkaitaskej yejon xijkon ken okse tetlayokolijli.

Tla tikneki tikmatis tlenon yakaj kinekiskia kipiyas, noneki kuajli tijkakis. Biblia techyolchikaua: “Cada se de nemejuamej noneki nemis listo para nentlakakiskej. No xmatikan ika xmechtocaroua nimantsin nentlajtoskej” (Santiago 1:19). Ijkuak titlajtlatos inuan akin timouika noso mochanejkauan, melak kuajli xkaki tla kijtouaj itlaj itech tlen kuelitaj. Ijkon, uelis titetlayokolis itlaj tlen melak makuelitakan.

 Tlen kipoloua akin kiselia. Se tetlayokolijli melak nopatiojkaita, maski xmelak mapatioj, tla yejon tlen yakaj melak kipolouaya. ¿Kenon uelis tikmatis tlen yakaj kipoloua?

Melak tepaleui yeskia san tiktlajtoltis tlen kipoloua noso tlen kineki. San ika, miyekej kitaj ika tikchiuas yejon xok teyolpakti; kinekij kimojkatlachialtiskej ika se tetlayokolijli tlen melak kuajli. Noijki, nemij akin kuajli kijtouaj itech tlen kuelitaj niman tlen ka, san ika, kanaj itech tlen kinpoloua xkuelitaj tlajtlatoskej.

Ika yejon, kuajli xtlachixto niman xtlanemili itech tlen kixnamiktok yejon tlaltikpakchane. ¿Yejua se telpochtli, se ichpochtli, iueyi, xinonamiktia, yononamikti, yokikaujkej noso kauajli? ¿Tekiti noso yokikajkauj itekiyo? Niman sakin, xnemili itech tetlayokoliltin tlen uelis kipaleuis.

Tla tikneki tikmatis tlen yemelak kipoloua akin yotiknemili tiktlayokolis itlaj, xtlajto inuan akin noijki yokixnamijkej tlen yejua kixnamiktok. Kanaj mitsijliskej seki tlemach tlen oksekimej xkimatij. Ika yejon tlen tikmatis, uelis titetlayokolis itlaj tlen melak tepaleuis, itlaj tlen sekimej xkeman kinemiliskiaj.

Ijkuak kinamiki. Biblia kijtoua: “Se tlajtojli tlen noijtoua ijkuak noneki, ¡melak kuajli!” (Proverbios 15:23). Yejuin kijtosneki ika kuajli tiktlapejpenis kemanon tikijtos itlaj, uelis kichiuas ika akin techkaki kuajli manomachili. Noijki ijkon panoua ika tlen tikchiuaj: titetlayokolis itlaj ijkuak nonekis noso ijkuak kinamiki uelis kichiuas ika akin kiselia melak mayolpaki.

Se akin iuan timouika nonamiktia, se telpochtli akin kisas ipan kaltlamachtijli, sekimej akin kichiatokej inkonetsin... Yejuin san seki ijkuak notemakaj tetlayokoliltin. Sekimej kijkuilouaj ipan se lista tlenon panos ipan se xiuitl. Ijkon uelij kuajli kinemilijtiuej tlenon kimelaua kitetlayokoliskej. *

Kema, uelis tiktemakaskej tetlayokoliltin san kemanon, xsan ijkuak nochiuas itlaj. San ika, noneki totlajpiyaskej. Se neskayotl, tla se tlakatl itlaj kitlayokoliskia se siuatl san pampa okinek, yejua uelis kasikamatis ika kineki kuajli kixmatis. Niman tla tlakatl xkineki yejon, uelis xkuajli nasikamatis niman oniaskej tlaueltin. Yejua ika, melak noneki xtikilkauaskej tlen amantsin tikitaskej: tleka notetlayokolia itlaj.

Tleka notetlayokolia itlaj. Ken kiteititia yejon neskayotl, kuajli tla tiknemiliaj tla akin kiselia totetlayokolil ueliskia xkuajli kasikamatis tleka tikchiuaj. San ika, noijki, noneki kuajli tiknemiliskej tleka titetlayokoliaj itlaj. Maski tinochimej tikuelitaj tiknemiliskej ika tikchiuaj ipampa tlen kuajli, miyekej kitemakaj tetlayokoliltin ipan seki iluimej pampa kipiya ika kichiuaskej. Niman oksekimej ijkon kichiuaj pampa kichiaj kiseliskej itlaj noso kichiaj kuajli makinnotsakan.

¿Tlenon uelis tikchiuaskej niman ijkon tikmatiskej ika kuajli tlen ika titetlayokoliaj? Biblia kijtoua: “Nochi tlen nenkichiuaskej, xchiuakan ikan tetlajsojtlalistli” (1 Corintios 16:14). Tla titetlayokoliaj itlaj pampa titetlasojtlaj niman tajmanaj intech oksekimej, kuakon, techseliliskej ika miyek pakilistli. Niman tejua tikmachilis kenon se melak yolpaki ijkuak kuelita kitemakas. Ijkuak titetlayokoliaj itlaj pampa titetlasojtlaj, noijki tikyolpaktiaj toTajtsin iluikakchane. Pablo, itlatitlankauj Cristo, okimijli corintios ika kuajli ken kichiuayaj pampa ika pakilistli niman ika kuajli inyojlo okititlankej tlen ika kinpaleuiskej tokniuan itech Judea. “Dios kitlajsojtla on yejuan kitemaka iofrenda ikan paktli”, ijkon okimijli ipan se amatlajkuilojli (2 Corintios 9:7).

Tla tikilnamiki yejuin tlen yotikitakej, uelis titetlayokolis tlen makinyolpakti oksekimej. ToTajtsin otlanemili itech yejuin niman itech okseki tlemach niman ijkon kinmakas tlaltikpakchanejkej se tetlayokolijli tlen melak ueyi kijtosneki xijkon ken itlaj okse. Timitsyolchikauaj xkita katlejua yejuin ueyi tetlayokolijli ipan okse tlamachtijli.