1. ¿Tlenon kichiua yakaj akin noyolkuepa?

 IJKUAK tikchiuaj tlen xkuajli, melak noneki matoyolpatlakan noso matoyolkuepakan. Biblia kijtoua ika yakaj akin noyolkuepa peua kitlauelita tlen xkuajli okichiuj, kikajkaua tlen xkuajli kichiujtoya niman kuajli kijtoua ika xok oksejpa ijkon kichiuas (Mat. 3:8; Hech. 3:19; 2 Ped. 3:9).

2. ¿Tleka noneki matikajsikamatikan tlenon kijtosneki timoyolkuepas? (Nehemías 8:​9-11).

² Tinochimej noneki tikajsikamatiskej tlenon kijtosneki timoyolkuepas. ¿Tleka? Pampa mojmostla titlajtlakouaj. Tinochimej tiiuejkakoneuan Adán niman Eva, ika yejon, titlajtlakouaj niman timikij (Rom. 3:23; 5:12). Xakaj uelis nomakixtis itech yejuin tlajtlakojli. Hasta akin chikauak okipixkej intlaneltok ononek nokojtiliskej kitekichiuiliskej toTajtsin pampa tlajtlakolejkej katkaj, ken apóstol Pablo (Rom. 7:​21-24). San ika, yejuin xkijtosneki tla noneki san tajmantoskej pampa titlajtlakolejkej. Jehová melak techiknelia niman kineki matiyolpakikan. Matitlanemilikan itech judíos akin onenkej ijkuak nemiya Nehemías (xpoua Nehemías 8:​9-11). Jehová xkinekiya ika yejuamej melak manajmanakan ipampa intlajtlakoluan, yejua kinekiya makitekichiuilikan ika paktli. Jehová kimatstika ika ijkuak toyolkuepaj, techpaleuiya oksejpa matiyolpakikan, ika yejon, techijlia kenijki uelis toyolkuepaskej. Kuajli tikmatstokej ika yejua se toTaj akin melak techiknelia niman techtlapojpoluiya tla toyolkuepaj.

3. ¿Tlenon tikitaskej ipan yejuin tlamachtijli?

³ Ipan yejuin tlamachtijli, kachtopa tikitaskej kenijki Jehová okimititi israelitas ika kinekiya manoyolkuepakan. Ika  ome, tikitaskej kenijki Jehová okinpaleui sekimej tlaltikpakchanejkej manoyolkuepakan. Niman ika yeyi, tikitaskej tlenon ouelkej sekimej inomachtijkauan Jesús ijkuak onoyolkuepkej.

JEHOVÁ OKIMITITI ISRAELITAS IKA KINEKIYA MANOYOLKUEPAKAN

4. ¿Tlenon ueliskia kichiuaskej israelitas tla xok kitlakamatiyaj Jehová?

⁴ Ijkuak Jehová okintlapejpeni israelitas ken ikalpan, imiuan onotlajtolkauj. Okimijli ika tla nochipa kintlakamatiyaj itlanauatiluan, yejua kinpaleuiskia niman kinteochiuaskia. Niman okimijli: “In tlanauatijli yejuan aman nemechnauatia xsanoyej ouijtikaj para nenkasikamatiskej nion para nenkichiuaskej” (Deut. 30:​11, 16). San ika, tla xok kitlakamatiyaj, kanaj pampa peuayaj kinueyichiuayaj okseki tajtsitsintin, Jehová xok kinseliskia niman tlajyouiskiaj. Kuakon, tla ijkon kichiuayaj, ¿kijtosnekiya ika Jehová xok keman kinseliskia? Ka, pampa tlanauatijli kijtouaya ika ueliskia oksejpa nokuepaskej itech inTajtsin Jehová niman oksejpa kitlakamatiskej (Deut. 30:​1-3, 17-20). Yejuin kijtosnekiya ika ueliskiaj noyolkuepaskej. Niman tla ijkon kichiuayaj, Jehová oksejpa kinseliskia niman oksejpa kinteochiuaskia.

5. ¿Kenijki okiteititi Jehová ika xsan ijkon okinkauj israelitas? (2 Reyes 17:​13, 14).

⁵ Israelitas miyekpa xokitlakamatkej Jehová. Yejuamej xsan okinueyichiujkej okseki tajtsitsintin, yejuamej noijki okichiujkej okseki tlemach tlen melak xkuajli, yejua ika, otlajyouijkej. San ika, Jehová xsan ijkon okinkauj, yejua miyekpa okintitlanili teotlajtojkej niman ijkon kimijlis manoyolkuepakan niman oksejpa makitekichiuilikan (xpoua 2 Reyes 17:​13, 14).

6. ¿Kenijki Jehová okintekitilti teotlajtojkej para kinmachtis israelitas tleka melak nonekiya manoyolkuepakan? (Noijki xkita tlaixkopinajli).

⁶ Jehová miyekpa okintitlanili israelitas teotlajtojkej para kinyektlalis niman kimijlis tlenon inpan panoskia tla xnopatlayaj. Sejpa, toTajtsin ijkin okijto itechkopa Jeremías: “Oh Israel, akin xtitlakaki, xuajmokuepa [ . . . ].  Xnimitstlauelitas pampa nejua xnitekaua [ . . . ]. Xnochipa nikualantos ipampa tlen otikchiuj. San xmokuiti ika yotitlajtlako, pampa xotiktlakamat moTajtsin Jehová” (Jer. 3:​12, 13, TNM). Niman itechkopa Joel, ijkin okijto: “Xmokuepakan notech ikan nochi nemoyojlo” (Joel 2:​12, 13). Niman itechkopa Isaías, ijkin okijto: “[¡]Xmochipauakan! ¡Xkejkuanikan nixpan on tlen xkuajli nenkichiuaj! ¡Maka sa xchiuakan on tlen xkuajli!” (Is. 1:​16-19). Niman itechkopa Ezequiel, Jehová ijkin okijto: “Nejua tej, xniknekilia ma miki on xompayejyeua, yej nikneki ma noyolpatla niman kuajli ma nouika para ijkon xmikis. [ . . . ] ¿Tline tej nenmikiskej [ . . . ] tla nejua xnikneki yakaj ma miki? Xtlalkauikan on tlen xkuajli, niman ijki xnenmikiskej” (Ezeq. 18:​23, 31, 32). Jehová kinekiskia ika nochimej tlaltikpakchanejkej nochipa manemikan, ika yejon, melak yolpaki ijkuak kita ika noyolkuepaj itech intlajtlakoluan. Ken yotikitakej, Jehová xsan tlamachixtok hasta ijkuak yakaj manoyolkuepa niman ijkon hasta ijkuakon kipaleuis. Matikimitakan okseki neskayomej.

7. ¿Tlenon okimachti Jehová ikalpan itechkopa Oseas niman isiuauj?

⁷ Matikitakan tlen Jehová okimachti ikalpan itechkopa teotlajtojketl Oseas niman isiuauj, Gómer. Gómer oauilnen niman sakin okikauj Oseas niman ijkon onchantis imiuan oksekimej tlakamej. ¿Okinemili Jehová ika Gómer xueliskia nopatlas? Jehová, akin kita tlen tikpiyaj ipan toyojlo, ijkin okijli Oseas: “Oksejpa xneki niman xtlajsojtla on mosiuau, maski yejua auilnemi iuan okse tlakatl. Nejua akin nimoTEKO, no ijki nikintlajsojtla on israelitas maski yejuamej kinmauistiliaj oksekimej dioses” (Os. 3:1; Prov. 16:2). Maka matikilkauakan ika ijkuak Jehová ijkin okijli Oseas, Gómer ok kichiujtoya tlen melak xkuajli. Maski ijkon, Jehová okijli Oseas makitlapojpolui niman oksejpa makiseli. a Ika tlen okipanok Oseas, Jehová okinmachti israelitas ika yejua ok kintlasojtlaya maski kichiujtoyaj tlen melak xkuajli. Ika yejon, miyekpa kintitlaniliaya teotlajtojkej para kinpaleuis manoyolkuepakan niman makikajkauakan tlen xkuajli kichiuayaj. Kuakon, ¿kijtosneki ika Jehová, akin kita tlen tikpiyaj ipan toyojlo, kinpaleuiya manoyolkuepakan akin ok kichiujtokej tlen melak xkuajli? (Prov. 17:3). Matikitakan.

KENIJKI JEHOVÁ KINPALEUIYA MANOYOLKUEPAKAN AKIN TLAJTLAKOJTOKEJ

8. ¿Tlenon okichiuj Jehová niman ijkon kipaleuis Caín manoyolkuepa? (Génesis 4:​3-7; noijki xkita tlaixkopinajli).

⁸ Caín, inyenkuiyouj Adán niman Eva, otlajtlako ijkon ken itajuan. Biblia kijtoua ika yejua “kichiuaya on tlen xkuajli” (1 Juan 3:12). Kanaj ika yejon Caín xouel okiyolpakti Jehová niman xokiselilijkej iuen, niman ijkuak Caín okitak ika Jehová xokiselili iuen, yejua xonopatlak, yej “sanoyej okualan niman sanoyej otlaueltlachix”. ¿Tlenon okichiuj Jehová? Iuan otlajto (xpoua Génesis 4:​3-7). Jehová kualtsin okinots niman okijli ika ueliskia oksejpa kiyolpaktiskia. Noijki okijli ika xkuajli onkisaskia tla xnopatlaya. Teajman ika Caín xokikak Jehová niman xokinek makipaleui manoyolkuepa. ¿Tlenon okichiuj Jehová ijkuak okitak ika Caín xokinokauili makipaleui? ¿Okinemili ika xok keman oksejpa yakaj kipaleuis manoyolkuepa? ¡Ka, xijkon okinemili!

9. ¿Kenijki Jehová okipaleui David manoyolkuepa?

⁹ Jehová ijkin okijto itech tekiuaj David,  akin melak kitlasojtlaya: “Yejua sen tlakatl yejuan sanoyej nechpaktia” (Hech. 13:22). San ika, David okichiuj miyek tlajtlakojli tlen melak xkuajli, yejua oauilnen niman otemikti, niman Tlanauatijli tlen okimakakej Moisés kijtouaya ika tla yakaj ijkin kichiuaya, nonekiya mikis (Lev. 20:10; Núm. 35:31). San ika, Jehová melak yolkuajli, ika yejon, okititlan teotlajtojketl Natán niman ijkon matlajtoti iuan David, maski David ok xenoyolkuepaya. b Natán okijli David se neskayotl tlen oajsik ipan iyojlo, niman tekiuaj David okajsikamat ika yokichiujka se ueyi tlajtlakojli ixpan Jehová niman onoyolkuep (2 Sam. 12:​1-14). Sakin okijkuilo se salmo kampa okiteititi ika melak xkuajli onomachili (Sal. 51, tlajtoltin tlen nesij achto ika peuas). Yejuin salmo yokinyolseui niman yokinpaleui manoyolkuepakan miyekej akin okichiujkej se tlajtlakojli. ¿Xmelak ika melak techyolpaktia ika Jehová melak okitlasojtlak David niman okipaleui manoyolkuepa?

10. ¿Kenijki timomachilia pampa Jehová techijyouiya niman techtlapojpoluiya?

¹⁰ Jehová kintlauelita nochi tlajtlakoltin, nion se tlajtlakojli xkuelita (Sal. 5:​4, 5). San ika, Jehová kimati ika titlajtlakolejkej niman kinektok techpaleuis ijkuak tikchiuaj se tlajtlakojli pampa melak techtlasojtla. Yejua hasta kinpaleuiya akin kichiuaj tlen melak xkuajli manoyolkuepakan niman oksejpa itech manonisiuikan. ¡Melak techyolseuiya ika Jehová ijkon kichiua! Ijkuak titlanemiliaj itech kenijki Jehová techijyouiya niman kenijki techtlapojpoluiya, techpaleuiya más matiknekikan itech matimelajkanemikan niman nimantsin matoyolkuepakan ijkuak tikchiuaj se tlajtlakojli. Aman matikitakan tlenon ouelkej sekimej inomachtijkauan Jesús ijkuak onoyolkuepkej.

TLENON OUELKEJ INOMACHTIJKAUAN JESÚS IJKUAK ONOYOLKUEPKEJ

11, 12. ¿Tlen neskayotl okijto Jesús niman ijkon kiteititis ika iTaj nochipa kinektok tetlapojpoluis? (Noijki xkita tlaixkopinajli).

¹¹ Yoyejkoka tonajli ijkuak yejkoskia Mesías. Niman ken otikitakej ipan tlamachtijli tlen  youajpanok, Jehová okichiuj ika Juan Teapolaktijketl niman Jesucristo makinmachtikan tlaltikpakchanejkej ika melak noneki manoyolkuepakan (Mat. 3:​1, 2; 4:17).

¹² Ijkuak Jesús otenojnots, otemachti ika iTaj nochipa kinektok tetlapojpoluis. Sejpa, yejua otlajto itech se tekoneuj akin yopoliujka. Yejuin telpochtli xok kinekiya chantis ichan niman oksekan oyaj para noyolpaktis. San ika, sakin okajsik itlamachilis niman onokuep ichan. ¿Niman tlenon okichiuj itaj? Jesús okijto ika “ijkuak sanken uejka uajlaya [telpochtli], on itataj okontak niman okiknelij. Kemaj onotlaloj, okinamikito, okinapaloj niman okitenkuaj”. Yejuin telpochtli kitlajtlaniliskia itaj makiseli ken se tlakeuajli, san ika, itaj melak kinekiya kitlapojpoluis niman oksejpa okiseli ichan. Yejua okijto: “In nokoneu [ . . . ] yopolijka, pero aman yones” (Luc. 15:​11-32). Achto ika Jesús uajlaskia ipan tlaltikpaktli, miyekpa okitak kenijki Jehová kimikneliaya akin noyolkuepayaj. Ika yejon, melak kualtsin ken otechititi ika iTaj melak teiknelia.

13, 14. ¿Tlenon okajsikamat Pedro, niman tlenon otemachti? (Noijki xkita tlaixkopinajli).

¹³ Jesús nochipa okinek kitlapojpoluis apóstol Pedro, niman yejon okititi Pedro ika Jehová noijki nochipa kinektok kintlapojpoluis akin noyolkuepaj. Sejpa, Pedro yexpa okijto ika xkixmatiya Jesús, niman sakin melak onoyolkoko (Mat. 26:​34, 35, 69-75). San ika, ijkuak Jesús oyoliuj, okinoititi Pedro ijkuak san iselti nemiya (Luc. 24:​33, 34; 1 Cor. 15:​3-5). Jesús kimatstoya ika Pedro yonoyolkuepka, ika yejon, ijkuak okinoititi, okiyolseui niman okijli ika yokitlapojpoluijka (xkita Marcos 16:7).

¹⁴ Pedro okajsikamat kenijki timomachilis ijkuak timoyolkuepas niman ijkuak mitstlapojpoluiskej. Ika yejon, yejua ouel otemachti itech yejuin. Sakin ika yopanoka iluitl Pentecostés, Pedro okipanolti se tlamachtijli imixpan  judíos niman okimijli ika yejuamej okimiktijkej Mesías, san ika, noijki ijkin kualtsin okimijli: “Xmoyolpatlakan niman xpatlakan nemonemilis para nemotlajtlakol pojpoliuis. Niman toTEKO Dios mechajtitlanilis yoltlalilistli” (Hech. 3:​14, 15, 17, 19). Ika yejuin tlajtoltin, Pedro okiteititi ika akin noyolkuepa, noneki kipatlas ken tlanemilia, kikajkauas ika kichiua tlen xkuajli niman peuas kichiuas tlen kuelita toTajtsin. Apóstol Pedro okimijli ika Jehová kinpopoloskia intlajtlakoluan. Seki xiujtin sakin, Pedro ijkin okijto itech Jehová: “Techpiyalia ijyouilistli, pampa nion se tlakatl xkineki ma poliui, yej kineki para nochimej ma noyolpatlakan” (2 Ped. 3:9). ¡Melak kualtsin ika Jehová ueli techtlapojpoluiya maski tla otikchiujkej se ueyi tlajtlakojli!

15, 16. a) ¿Tlenon ouel Pablo pampa okitlapojpoluijkej? (1 Timoteo 1:​12-15). b) ¿Tlenon tikitaskej ipan okse tlamachtijli?

¹⁵ Saulo de Tarso okichiuj miyek tlen melak xkuajli. Melak okintlajyouilti niman okintlaueltokak akin kichiuayaj ken Cristo. Ika yejon, kanaj sekimej tokniuan kinemiliayaj ika yejua xkeman nopatlaskia. San ika, Jesús kimatstoya ika Saulo ueliskia nopatlas niman noyolkuepas. Jesús niman iTaj okitakej tlen kuajli kichiuaya Saulo. Jesús ijkin okijto: “On tlakatl yoniktlapejpenij para tenojnotsas” (Hech. 9:15). Jesús hasta okichiuj se milagro niman ijkon kipaleuis manoyolkuepa (Hech. 7:​58–8:3; 9:​1-9, 17-20). Sakin, ijkuak Saulo yopeujka kichiua ken Cristo niman opeuj kixmatij ken apóstol Pablo, miyekpa okitlasojkamat pampa Jehová niman Jesús melak okiknelijkej niman okitlasojtlakej (xpoua 1 Timoteo 1:​12-15). Niman yejua ijkin otemachti: “Dios kijyouilia ikan itetlajsojtlalis pampa kineki kimakas tiempo para ma kipatla iyojlo” (Rom. 2:4).

¹⁶ Sejpa katka, Pablo okimat ika ipan tlanechikojli Corinto onkatka se ueyi tlauejli pampa yakaj auilnentoya. Tlen Pablo okinnauati tokniuan corintios, okiteititi ika Jehová melak tetlasojtla ijkuak temelajkatlalia niman ika kimiknelia akin noyolkuepaj. Ipan okse tlamachtijli tikitaskej tlenon opanok ipan tlanechikojli Corinto niman kenijki uelis titeikneliskej ken Jehová.