“IJKUAK akin inuan ninouika tlajtouayaj itech kenon melak pakiyaj pampa tlapaleuijtoyaj kampa melak nonekij precursores, nejua noijki niknekiya nikmachilis yejon”, kijtoua Sylviana, se precursora tlen kipiya kanaj 25 xiuitl. Yejua noijki kijtoua: “San ika, niknemiliaya ika nejua xniueliskia nontlapaleuis oksekan”.

¿Kemantika yotimomachili ijkon ken Sylviana? ¿Tikuelitaskia tontenojnotsas kampa melak nonekij tenojnotskej, san ika, timotlajtoltia tla kemantika uelis tikchiuas? Tla ijkon, ¡maka xmajmana! Jehová yokinpaleui melak miyekej tokniuan makitlanikan tlen xkinkauiliaya kiueyiliskej intenojnotsalis. ¿Kenon yokichiuj? Matipajxalotij Madagascar, se atlajkotian tlen ika naui melak ueyi ipan nochi tlaltikpaktli, niman ijkon tikitaskej seki neskayomej.

Ipan majtlaktli xiuitl tlen yopanokej, ipantsin 70 precursores niman tenojnotskej akin melak kinekij tlapaleuiskej itech 11 uejueyimej kalpamej * yonochantitoj África kampa melak kuajli kikakij iTlajtol toTajtsin, niman melak miyekej kitlakaitaj Biblia. Noijki, miyekej tenojnotskej itech yejon país yokinejkej onchantiskej oksekan niman ijkon tlapaleuiskej kisemoyauaskej iTlajtol toTajtsin nochiuiyan ipan yejuin ueyi atlajkotian. ¿Tikuelitaskia tikimixmatis sekimej?

Louis niman isiuauj Perrine, akin kipiyaj kanaj 30 xiuitl, okikaujkej Francia niman onochantitoj Madagascar. Ouejkaujkej seki xiujtin kinemilijtokej tla yaskej ontenojnotsaskej ipan okse país, san ika, Perrine xnoyolchikauaya. Yejua kijtoua: “Nikmakasiya tlen xnikixmatiya. Nechajmanaya nikinkauas nochanejkauan, tlanechikojli, tochan, tlen techyeualouaya niman tlen nochipa tikchiuayaj. Tlen melak nechteltiaya katka tlen nikmakasiya niman nonekiya nikixnamikis”. San ika, ipan 2012 Perrine onoyolchikauj, kuakon Louis niman yejua onochanpatlakej. ¿Kenon nomachiliaj aman? Perrine kijtoua: “Ijkuak niknemilia itech tlen topan yonochiuj, uelis nikijtos ika notlaneltokil yochikauj pampa nikita kenon Jehová yotechpaleui ipan tonemilis”. Niman Louis noijki kijtoua: “Majtlaktli akin tikinmachtiaj, oualajkej ijkuak tejuamej kachtopa otikilnamijkej imikilis Cristo ipan Madagascar. ¡San xkonnemili!”.

 ¿Tlenon okinpaleui makipiyakan kojtilistli ijkuak okixnamijkej tlen ouijtika niman ijkon ok nokauaskej kampa tlapaleuijtoyaj? Okichiuilijkej teoyotl Jehová niman okitlajtlanilijkej makinmaka kojtilistli tlen ika tlaxikoskej. Louis kijtoua: “Otikitakej ika Jehová kinnankiliaya toteoyouan niman techmakaya iyolseuilis. Kuakon ouel otitlanemilijkej san ipan nochi tlen kuajli tikpiayaj ipan totenojnotsalis. Noijki, akin inuan touikayaj niman chantiyaj Francia otechuajtitlanilijkej correos niman amatlajkuiloltin tlen otechpaleuijkej maka matosiaujkauakan” (Filip. 4:6, 7; 2 Cor. 4:7).

Jehová okinteochiuj Louis niman Perrine pampa otlaxikojkej. Louis kijtoua: “Ipan octubre, xiuitl 2014 otikpixkej ne Francia Tlamachtijli itech Biblia tlen kiseliaj akin Yononamiktijkej. * Yejon se tetlayokolijli tlen otechmakak Jehová niman xkeman tikilkauaskej”. Louis niman Perrine melak opajkej pampa ijkuak otlankej intlamachtil oksejpa okintitlankej Madagascar.

Didier niman isiuauj Nadine ualeuaj Francia, yejuamej kipiayaj ipantsin 50 xiuitl ijkuak ochantitoj Madagascar ipan 2010. Didier kijtoua: “Ijkuak titelpokamej katkaj otochiujkej precursores, niman sakin otikimiskaltijkej yeyimej tokoneuan. Ijkuak oueyiyakej, otiknemilijkej tla uelis tontlapaleuiskej ipan okse país”. Nadine kijtoua: “Ijkuak niknemiliaya ika uejka ninemis itech nokoneuan, yejon nechteltiaya, san ika, yejuamej otechijlikej: ‘Tla nenyauej nemontenojnotsaj okse país, ¡melak nentechyolpaktiskej!’. Yejon tlajtoltin melak otechyolchikaujkej matikchiuakan tlen yotiknemilijkaj. Aman melak uejka tichantij, san ika, techyolpaktia miyekpa tikominotsaskej”.

Didier niman Nadine okintekiyomakak ueliskej tlajtojli malgache. “Xok tikpiyaj 20 xiuitl”, kamanaloua Nadine. ¿Tlenon okichiujkej niman ijkon ueliskej? Kachtopa oyajkej ipan se tlanechikojli kampa tlajtouayaj Francés. Sakin, ijkuak okimatkej ika iueliskiaj, onopatlakej ipan tlanechikojli kampa tlajtouayaj malgache. Nadine kijtoua: “Ijkuak tontenojnotsaj tikinnextiaj miyekej akin kuelitaj nomachtiskej Biblia niman techtlasojkamachiliaj pampa tikomintlajpalouaj. Kachtopa niknemiliaya ika san nitlatemiktoya. Precursorado melak nechyolpaktia nikan. Ijkuak ika kualkan ninokuiteua, niknemilia ika pakilistli: ‘¡Amanin nikisas nontenojnotsas!’”.

Didier uetska ijkuak kilnamiki tlen opanok ijkuak nomachtijtoya malgache. Yejua kijtoua: “Sejpa, nikyekantoya se tlanechikojli niman xnikasikamatiya nion se itech ken tlanankilijtoyaj tokniuan. San ueliya nikintlasojkamachiliaya. Kuakon, sakin ika se tokniuj otlanankili niman oniktlasojkamachili, akin ikuitlapan yeuatoyaj opeuj nomauiuiyoniaj. Kinekiyaj nechijliskej ika xkuajli ken otlanankilijka. Nimantsin onijkauili okse tokniuj matlanankili niman yejua kuajli otlanankili, yejon niknemilia”.

Ipan se ueyitlanechikojli tlen onochiuj ipan 2005, Thierry niman isiuauj, Nadia, okitakej tlamauisojli tlen itoka Vayamos tras metas que honran a Dios, tlen tlajtouaya itech inemilis Timoteo. Yejuin tlen Biblia kiteneua oajsik ipan inyojlo niman okichiuj ika melak makinekikan ontlapaleuiskej kampa nonekij tenojnotskej. Thierry kijtoua: “Ijkuak otlan tlamauisojli niman tomatlaxkalojtoyaj, onikijli nosiuauj: ‘¿Tejuamej kanon tiaskej?’. Niman yejua onechijli ika noijki yejon kinemilijtoya”. Sakin opeujkej kichiuaj nochi tlen nonekiya niman ijkon uelis ontlapaleuiskej. Nadia kijtoua: “Ika yolik, opeuj tiktsolouaj tlen tikpiayaj. ¡Ijkuak otitlankej, nochi oonak san ipan naui maletas!”.

Oajsikej Madagascar ipan 2006 iuan nimantsin opeuj kuelitaj ken titenojnotsas ompa. Nadia kijtoua: “Ken tlaltikpakchanejkej kiseliaj iTlajtol toTajtsin melak techyolpaktia”.

San ika, chikuasen xiuitl sakin, Thierry niman Nadia okixnamijkej itlaj tlen ouijtika. Inan Nadia, Marie-Madeleine, akin chantiya Francia, ouejuets, niman okinomaili ipan itsontekon niman opostek se ima. Sakin ika otlajtokej iuan akin kipajtitoya Marie-Madeleine, Thierry niman Nadia okitlajtoltijkej tla kinekiya inuan onchantis Madagascar. Maski ikipiaya 80 xiuitl, ika pakilistli okiseli ontlapaleuis. ¿Kenon kita yejua chantis ipan okse país? Marie-Madeleine kijtoua: “Nechtekiyomaka ninomatis ika seki tlemach, san ika, maski xmiyek ueli nikchiua, nikmati melak nitlapaleuiya ipan tlanechikojli. Niman melak nechyolpaktia ika nokoneuj niman iueuentsin ok uelij tlapaleuiyaj kampa melak kuajli kiseliaj iTlajtol toTajtsin”.

Riana se tokniuj tlakatl akin kipiya ipantsin 20 xiuitl. Onoskalti ipan se kalpan itoka Alaotra Mangoro, se tlajli kampa melak tlatlaki tlen nokaua ipan este de Madagascar. Pampa melak tlamachilise katka, kinekiya nomachtis se ueyi tlamachtijli. San ika, ijkuak opeuj nomachtia Biblia, onopatlak ken tlanemiliaya. Yejua kijtoua: “Onitlan secundaria niman onikijli Jehová: ‘Tla nipanoua sa ika tlami examen, ninochiuas precursor’”. Sakin ika okis itech kaltlamachtijli, Riana okichiuj tlen okijtoka. Ochantito iuan se precursor, okinotejtemouili se tekitl kampa san achijtsin tekitiya niman opeuj tekiti ken precursor. Yejua kijtoua: “Yejon tlen melak kuajli oniktlapejpeni nikchiuas ipan nonemilis”.

San ika, ichanejkauan xkasikamatiyaj tleka okikauj ika nomachtia. Riana kijtoua: “Notaj, notío niman notía abuela kinekiyaj maniuiya ipan se ueyi kaltlamachtijli. San ika, nejua xnijkajkauaskia ika niprecursor, xtlaj kichiuaskia manijkaua”. Sakin ika opanok yejuin, Riana okinek onnochantis kampa melak nonekiyaj tenojnotskej. ¿Tlenon okiyolmapeuj? Yejua kijtoua: “Seki tlachtejkej okalakitoj nochan niman onechixtekilijkej miyek tlemach. Yejon okichiuj manitlanemili itech tlen Jesús okijto ika matiksentlalikan tlen patioj ne iluikak. Kuakon, oniknemili ninokojtilis niktejtemos tlen patioj itech Biblia” (Mat. 6:19, 20). Riana ochantito ipan sur kampa ontlami yejon país, ompa chantij akin kintokayotiaj antandroy. Yejuin kanaj 1,300 kilómetros ika uejka itech kampa yejua chantiya. ¿Tleka okinek melak uejka yas?

Se metstli achto ika kitlachtekiliskej, Riana opeujka kinmachtia omemej tlakamej itech se tribu itoka antandroy. Onomachti seki tlemach ika intlajtol yejon tlakamej, niman otlanemili itech nochimej akin ompa ualeuayaj niman ok xkikakiyaj tlajtoltin itech Tekiuajyotl. Yejua kijtoua: “Oniktlajtlanili Jehová manechpaleui nias kampa tlajtouaj tandroy”.

San oajsik ompa, nimantsin okixnamik itlaj: xkinextiaya tekitl. Se tlakatl okijli: “¿Tleka otiuajla? Akin nikan chantij yauej kampa tichantiya kontejtemouaj tekitl”. Opanok ome semanas, Riana oyaj ipan ueyitlanechikojli yeyi tonajli. Pampa xok kipiaya miyek tomin, notlajtoltiaya tlenon kichiuas. Sa ika tlami tonajli itech ueyitlanechikojli, se tokniuj okikalaktili itlaj ipan ibolsillo. Okimakak tomin tlen kajxiliskia manokuepa kampa chantij antandroy niman peuas kinemakas yogur. “Onikmachili ika Jehová onechpaleui ijkuak nonekiya. Aman ok ueliskia nikinpaleuis nochimej itech yejon tribu akin ok xkixmatij toTajtsin”, kijtoua Riana. Noijki nonekiya miyek tlen nochiuas ipan tlanechikojli. Yejua kijtoua:  “Nechijliayaj maniktemaka se tlamachtijli kakaxtojli tonajli. Jehová nechyektlalijtoya ika ikalpan”. Aman, Riana ok kinmachtijtok tlen melauak akin tlajtouaj tandroy niman akin kinekij ueliskej itech Jehová.

Jehová kijtoua ika kinteochiuas akin nokojtiliaj kitekichiuiliskej (Is. 65:16). Kema, ijkuak tikchiuaj nochi tlen tiuelij niman ijkon tiktlaniskej tlen tikixnamikij niman tikueyiliskej ken titenojnotsaj, tikseliaj miyek tlateochiualistin. Se neskayotl, Sylviana, akin kachtopa otikteneujkej ipan yejuin tlamachtijli, kinemiliaya ika xueliskia ontlapaleuis oksekan. ¿Tleka ijkon nomachiliaya? Yejua technankilia: “Pampa se nokxi 9 centímetros xueyak ken okse, yejon kichiua maka kuajli maninejnemi iuan nimantsin manisiaui”.

Maski ijkon, ipan 2014 Sylviana okijto yas iuan Sylvie Ann, okse precursora akin ichpochtli niman nemiya ipan itlanechikol. Oyajkej ipan se kalpantsin tlen nokaua 85 kilómetros ika uejka itech ichan. Maski miyek tlen kixnamikiya, Sylviana ouel okichiuj tlen kinekiya. Niman, noijki, okiseli se kualtsin tlateochiualistli. “Ijkuak nikuikaya san se xiuitl ika yoninochanpatlaka, Doratine, se nantli akin xiueyi niman akin onikmachti itech Biblia, onoapolakti ipan se ueyitlanechikojli”.

Tlen kijtouaj yejuin tokniuan akin yolmelaujkej, techmachtia ika tla tokojtiliaj tiktlaniskej tlen tikixnamikij niman ijkon tikueyiliskej ken titenojnotsaj, tejuamej tikitaskej kenon melauak tlen kijtoua Jehová: “Nejua nimitsyolchikauas, kema, nejua nimitspaleuis” (Is. 41:10). Yejuin kichiuas machikaui ken touikaj iuan Jehová. Noijki, titlapaleuiskej ika nochi toyojlo, uelis ipan topaís noso ipan okse, techyektlalia ipan tlen nonekis tikchiuaskej itech itekiyo toTajtsin ipan yenkuik tlaltikpaktli. Ken kijtoua Didier, akin yotikteneujkaj, “titlapaleuiskej kampa nonekij tenojnotskej melak kuajli techyektlalis itech tlen panos tlayekapan”. Tikchiaj ika nimantsin miyekej tokniuan manotemakakan ika inyojlo tlapaleuiskej niman ijkon noijki manoyektlalikan.