DON se iteixpantijkauj Jehová chanej Canadá, akin melak nochikaua tlajtos iuan akin chantij ipan calles. Yejua techijlia tlen ipan onochiuj iuan se itech yejon tlakamej: “Peter melak tsokuiltik katka ken xkeman yakaj nikitaya ipan yejon callejones. Yejua xtetlakaitaya niman nochipa kintotokaya oksekimej. Xkeman nokauiliaya makichiuilikan tlen kuajli”. Maski ijkon, ipantsin 14 xiujtin, nochipa ijkuak ueliya Don onochikauj kipaleuis ika tlasojtlalistli.

Se tonajli, Peter okitlajtolti Don: “¿Tleka melak timajmana nopampa? Xakaj najmana nopampa. ¿Tleka tejua kema?”. Don ika tlakaitalistli okintekitilti yeyi textos itech Biblia tlen ika ajsis ipan iyojlo. Kachtopa, okitlajtolti Peter tla kimatiya kenon itoka toTajtsin niman okitlajtlanili makipoua tlen kijtoua Biblia ipan Salmo 83:18. Sakin, okijli makipoua Romanos 10:13, 14, niman ijkon kititis tleka toTajtsin melak najmana ipampa, ompa kijtoua ika “nochimej akin kinotsaskej Jehová ika itokayo makisaskej”. Ika otlan, Don okipouj Mateo 9:36 niman sakin okitlajtlanili Peter makipoua. Yejuin tlaxelojli pitentsin kijtoua: “Ijkuak Jesús okintak on tojlamej, sanoyej okimiknelij, pampa yejuamej najmanayaj niman xkipiayaj yolchikaualistli. Yejuamej nemiyaj ken on borreguitos yejuan xkipiaj intlajpixkau”. Kuakon, Peter ochokak niman okitlajtolti: “¿Nejua se itech yejon borreguitos?”.

Peter opeuj nopatla. Onalti, okitek ixayakatson niman okinaki tlakentli tlen Don okimakak. Aman Peter nochipa chipauak nesiya.

Peter kijkuilouaya tlen ipan nochiujtiaya. Kachtopa itech tlen kijkuilouaya tlajtouaya itech tlajyouilistli niman tlen teyolkoko, san ika, ika tlayekapan xok ijkon katka. Sakin okijkuilo yejuin: “Yejuin tonajli onikixmat itokayo toTajtsin. Aman, ijkuak nikchiua teoyotl, ueli niknotsa Jehová. Tikixmatis itokayo melak kualtsin. Don kijtoua ika uelis ninouikas iuan Jehová, akin nochipa uelis nechkakis, maski san kemanon niman san itech tlenon”.

 Ika tlen otlamito Peter okintlajkuilouili ikniuan. Okijkuilo:

“Aman xkuajli ninomachilia. Nikmati ika xok nikxikoua nochi miyek xiuitl tlen inikpiya. San ika, tla sa yejuin tonajli ninemis, kuajli nikmatstika ika oksejpa nikitas akin iuan ninouika [Don] ipan Xochitlalpan. Tla nenkipoujtokej yejuin, kijtosneki ika xok nemouan ninemi. San ika, tlen nenkitaj se tlakatl ijkuak yonimik akin xnesi ijkon ken oksekimej, xtlajtokan iuan niman, nimechtlajtlanilia, xpouilikan yejuin pitentsin amoxtli azul [tlajtouaya itech tlen notekitiltiaya ika timomachtis Biblia itoka La verdad que lleva a vida eterna, tlen okimakakej seki xiujtin ika tlakuitlapan]. * Kijtoua ika oksejpa nikitas akin iuan ninouika ipan Xochitlalpan. Nikneltoka yejuin ika nochi noyojlo. Nemokniuj akin mechtlasojtla, Peter”.

Sakin ijkuak yomik Peter, Ummi, ikniuj siuatl, okijto: “Kanaj ikipiya ome xiuitl ika Peter opeuj nouan nonotsa. Nesiya ika melak pakiya xijkon ken yeuejkaui. Niman hasta uetskaya”. Ummi okijli Don: “Nikpouas yejuin amoxtli, pampa san tlenon tlen okipouj nokniuj niman oajsik ipan iyojlo kijtosneki ika itlaj tlen melak kuajli”. Ummi noijki okiseli nomachtis amoxtli ¿Tlenon melauak temachtia Biblia? iuan se iteixpantijkauj Jehová.

Tejuamej noijki uelis tikitaskej tlen xnimantsin nesi, tikteititiskej melauak tlasojtlalistli niman tikpiyaskej ijyouilistli iuan nochimej tlaltikpakchanejkej (1 Tim. 2:3, 4). Tla ijkon tikchiuaj, kanaj uelis tikchiuaskej ika tlen melauak maajsi ipan inyojlo akin, ijkon ken Peter, xkuajli ken nesij, san ika, kuajli inyojlo. Uelis kuajli tikmatstoskej ika toTajtsin, akin “kita tlen onka ipan iyojlo” kichiuas manoskalti tlen melauak ipan inyojlo akin kinekij nonisiuiskej itech (1 Sam. 16:7; Juan 6:44).