Biblia san sejpa tlajtoua itech tatuajes, ipan Levítico 19:28 kijtoua: “Maka xmotlalilikan tatuajes ipan nemotlalnakayo”. ToTajtsin ijkon okinnauatijka israelitas pampa xkinekiya makichiuakan ijkon ken oksekimej kalpamej, akin kinotlaliliayaj ipan intlalnakayo intokayouan intajtsitsinuan (Deuteronomio 14:2). Maski akin kichiuaj ken Cristo xok noneki kintlakamatiskej tlanauatiltin tlen toTajtsin okinmakaka israelitas, melak kuajli yes tla tikitaj tlenon techmachtia yejuin tlanauatiltin.

¿Kuajli tla se akin kichiua ken Cristo kinnotlalilia tatuajes?

 Matikitakan seki textos ipan Biblia tlen uelis techpaleuiskej.

•   “On siuamej noneki notlakentiskej ken kinamiki [...] niman noneki nesis ika kuajli kipiyaj intlamachilis” (1 Timoteo 2:9). Yejuin tlanauatijli noijki kinpaleuis tlakamej. Se akin kichiua ken Cristo xkichiua ika san yejua makitakan nion xkichiua ika oksekimej xkuajli manomachilikan ipampa ken nokualnextia.

•   Nemij sekimej akin kinnotlaliliaj tatuajes pampa kinekij kiteititiskej ika uelij kichiuaj tlen kinekij niman ika intlalnakayo intlatki. San ika, Biblia techijlia: “Xmotemaktilikan itech Dios ken itlaj uentli yejuan yoltikaj niman yektli ijkon ken yejua kineki” (Romanos 12:1). Totlamachilis uelis techpaleuis matikitakan tleka tiknekij totlaliliskej se tatuaje. Miyekej ijkon kinekij kichiuaskej san pampa oksekimej ijkon kichiuaj noso san pampa kinekij kiteititiskej ika imiuan nouikaj. San ika, melak kuajli yes tla akin kinekij kinotlaliliskej se tatuaje manotlajtoltikan yejuin: “¿Tlenon nikchiuas tla sakin on tatuaje xok nikuelita noso ninoyolkuepa pampa oniknotlalili?”. Tla se kuajli kita tleka kineki kinotlalilis se tatuaje, kipaleuis makitlapejpeni tlen kuajli (Proverbios 4:7).

•   “Ijkuak itlaj kuajli kinemiliaj ken kichiuaskej, kuajli kisa. Pero itlaj yejuan san kisijkachiuaj, xkuajli kisa” (Proverbios 21:5). Miyekej nion xkinemiliaj tla kuajli yes tla kinotlaliliaj se tatuaje, yejuamej san totoka kinotlalilijtiuetsi. San ika, akin ijkon kichiuaj, sakin, kitaj ika melak kimijtlakoua pampa xkinextiaj se kuajli tekitl niman oksekimej xkinekij imiuan nouikaskej. Noijki, akin kineki kinokixtilis se tatuaje melak patioj kisa niman tekoko. Miyekej akin kinnotlaliliaj tatuajes sakin noyolkuepaj, ijkon tikijtouaj pampa aman miyekan onka kampa kintekixtiliaj tatuajes.