Iteixpantijkauan Jehová, tikuelitaj tikimijliskej oksekimej itech tlen kijtoua Biblia, maski sekimej yotechijlikej ika “xkinekij techkakiskej”. ¿Tleka? Pampa tiktlasojtlaj toTajtsin niman tlaltikpakchanejkej (Mateo 22:37-39). Tlasojtlalistli tlen tikmachiliaj itech toTajtsin kichiua matiktlakamatikan tlen iKonetsin otechnauati ijkuak okijto: “Ma tikteixpantilikan” (Hechos 10:42; 1 Juan 5:3). Niman uelis ijkon tikchiuaskej tla miyekpa tikteijliaj iTlajtol toTajtsin, ijkon ken okichiujkej teotlajtokej akin yeuejkaui onenkej (Jeremías 25:4). Pampa tikintlasojtlaj tlaltikpakchanejkej tikyejyekouaj nochimej tikimijliskej “kuajli tlajtoltin itech Tekiuajyotl” maski akin xkinekij kikakiskej pampa yejuin uelis kinmakixtis (Mateo 24:14, Traducción del Nuevo Mundo).

 Noijki, ijkuak tokuepaj inchan akin xokinejkej techkakiskej, miyekpa tiknextiaj yakaj akin kineki techkakis. Xkita yeyi tlemach tlen ika oksejpa tikomintlajpalouaj:

•   Tlaltikpakchanejkej nochanpatlaj.

•   Oksekimej akin ompa chantij kinekij techkakiskej.

•   Tlaltikpakchanejkej nopatlaj. Ipampa tlemach tlen panoua noso itlaj intech nopatla yejon kichiua makimatikan “ika kipiyaj ika kitejtemoskej tlen ualeua itech toTajtsin” niman kinekiskej kimatiskej okseki itech Biblia (Mateo 5:3, Traducción del Nuevo Mundo). Sekimej maski akin yemelak xkinekiyaj techkakiskej uelis nopatlaskej, ijkon ken okichiuj Pablo, itlatitlankauj Cristo (1 Timoteo 1:13).

 San ika, xkeman tikchiualtiaj yakaj matechkaki (1 Pedro 3:15). Pampa tikneltokaj ika se kipiya ika kitlapejpenis kenon kiueyichiuas toTajtsin (Deuteronomio 30:19, 20).