• Fifili he Atua. “Ka ko au, kua fakauku tuai e au haku a Patuiki . . . ti ta atu ai e au e tau motu kehe mo fonua hāu; mo e tau kala he lalolagi ke eke māu.”​—Salamo 2:6, 8.

• Mai he hologa he Patuiki ko Tavita. “Ha kua fanau mai ma tautolu e tama, kua foaki mai ma tautolu e tama tane . . . Nakai fai mena ke liu mai ai e lilifu he hana pule, mo e mafola he hana pule ke he nofoaiki a Tavita mo e hana kautu, ke fakatu ai.”​—Isaia 9:6, 7.

• Fanau i Petelehema. ‘Petelehema na e, ka to tupu mai ia koe taha māku ke eke mo Pule to lilifu ai a ia ke hoko ke he tau kala he lalolagi.’​—Mika 5:2, 4.

• Nakai talia he tau tagata ti tamate ai. “Ne vihiatia a ia ti nakai manatu e tautolu a ia. . . . Kua tuina a ia ha ko e tau holifono ha tautolu, kua malipilipi a ia ha ko e tau mahani kelea ha tautolu.”​—Isaia 53:3, 5.

• Fakaliu tu mai he mate ti fakamatalahi. “Ha ko e mena nakai toka atu e koe au ki seoli, ti nakai tuku atu e koe hau a tagata tapu ke hoko ki ai e popo. . . . Ha he lima matau hāu e olioli tukulagi.”​—Salamo 16:10, 11.

Tali mai he fakamauaga tala, tokotaha ni ne felauaki mo e fakamaamaaga he Pule kua latatonu; ko Iesu Keriso a ia. Tala age e agelu ki a Maria ko e matua fifine ha Iesu: “To foaki atu he Iki ko e Atua kia ia e nofoaiki a Tavita hana matua; . . . ko e hana kautu foki nakai fai fakaotiaga ia.”​—Luka 1:31-33.

Ko Iesu ne nakai ko e pule he lalolagi. Ka ko ia ka pule ke he tau tagata mai he lagi, ko e Patuiki he Kautu he Atua. Ko e heigoa ne taute a ia ke eke mo Pule kua latatonu? Manamanatu ke he tau gahua ha Iesu he nofo ai he lalolagi.

•   Manamanatu a Iesu ke he tau tagata. Lagomatai e Iesu e tau tagata taane mo e tau fifine, lautolu ne ikiiki mo e momotua, pete e tau tupumaiaga po ke tau tuaga ha lautolu. (Mataio 9:36; Mareko 10:16) He olelalo e lepela: “Kaeke kua finagalo a koe ki ai, kua maeke ni ia koe ke fakamea au,” kua hohofi noa e fakaalofa a Iesu ti fakamaulu a ia.​—Mareko 1:40-42.

• Fakaako e Iesu a tautolu ke he puhala ke fakafiafia e Atua. Pehē a ia: “Nakai maeke ia mutolu ke fekafekau ke he Atua mo Mamone.” Pehē foki a ia kua lata ke taute e falu ke he puhala kua manako a tautolu ke taute mai ki a tautolu, ko e matapatu fakaakoaga ne fakahigoa ko e Fakatufono Auro. Lafi ai, fakakite e ia kua mailoga he Atua e tau gahua mo e puhala manamanatu mo e tau logonaaga ha tautolu. Ke fakafiafia e Atua, lata a tautolu ke tautaofi e tau manatu galo. (Mataio 5:28; 6:24; 7:12) Fakamaama e Iesu ka manako a tautolu ke fiafia mooli, lata ke fakaako ke he tau mena kua poaki he Atua ke taute e tautolu ti taute ai.​—Luka 11:28.

• Fakaako e Iesu e kakano ke fakaalofa. Ko e tau kupu mo e tau gahua ha Iesu kua malolō lahi ti aamotia e tau loto he tau tagata fanogonogo haana. “Ati ofomate ai e lanu tagata ke he hana tau kupu; Ha ko e mena fakaako a ia kia lautolu tuga ne taha ha i ai e pule.” (Mataio 7:28, 29) Fakaako e ia a lautolu: “Fakaalofa atu a mutolu kia lautolu kua fai fi kia mutolu.” Liogi foki a ia ma e tau tagata ne tamate a ia: “Ma Matua na e, kia fakamagalo atu e koe a lautolu; ha kua nakai iloa e lautolu e mena kua eke e lautolu.”​—Mataio 5:44; Luka 23:34.

Latatonu moolioli a Iesu ke eke mo Pule mitaki he lalolagi ti lagomatai mo e totonu a ia. Ka e kamata a fe a ia ke pule?