Foaki he Atua ke he tau tagata e mena fakaalofa ofoofogia​—ko e lotomatala ke matutaki mo ia mo e tala age ai e tau logonaaga he puhala he liogi. Ne liogi e perofeta ko Tavita: “Ko e fanogonogo liogi na e, to o atu kia koe e tau tagata oti kana.” (Salamo 65:2) Ka e liogi fēfē a tautolu ke logona mo e fakamonuina he Atua?

Ko e tau liogi ni haau kua fakaatā a koe ke liligi e loto ke he Atua ke fakakite age e tau logonaaga mooli haau. (Salamo 62:8) Kua tokiofa he Atua Malolō Ue Atu e tau liogi fakamooli mai he loto.

Pete kua loga e matahigoa he Atua, ka e taha ni e higoa mooli haana. “Ko au ko Iehova, ko e haku a higoa haia.” (Isaia 42:8) Ko e higoa ha Iehova ne kavi ke he laga 7,000 i loto he tau Tohiaga Tapu. Tokologa e tau perofeta ne fakaaoga e higoa mooli he Atua he liogi. Pehē a Aperahamo: “Iki [Iehova], to liu foki vagahau atu e au [ki a koe].” (Kenese 18:30) Lata foki a tautolu ke fakaaoga e higoa a Iehova ka liogi a tautolu ke he Atua.

Maama he Atua e tau logonaaga mo e tau manatu ha tautolu pete ne vagahau ha tautolu ne fakaaoga. Fakamalolō he Kupu haana a tautolu: “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”​—Gahua 10:34, 35.

Ke fakamonuina he Atua, lata a tautolu ke fai mena foki ke taute he nakai liogi hokoia. He tau vala tala ka mumui mai, to kumikumi a tautolu ke he mena kua lata ke taute.