Magaaho ne fanau au, ne taha e faama tote he tau matua haaku he maaga tua i Galicia, he faahi tokelau ki lalo ha Sepania. Ko au e tama ke fāaki he tau tama tokovalu. Ne fiafia a mautolu he mafanatia e takatakaiaga i kaina. He magahala ia i Sepania, kua fa mahani ke taha e tama he magafaoa ka fina atu ke he aoga lotu po ke fale pope. He magafaoa ha mautolu, ne tokotolu ia mautolu ne taute pihia.

He 13 e tau haaku, ne fakalataha atu au ke he taokete haaku he fale pope i Madrid. Ne nakai mitaki e takatakaiaga i ai. Nakai fekapitigaaki​​—⁠ko e tau matafakatufono, tau liogi mo e fakakikili ni. He pogipogi kī, ne fakapotopoto a mautolu ke he fale tapu ke manamanatu fakahokulo, ka e gatigati e manamanatuaga haaku. He mole ai, ne uhu lologo fakalotu a mautolu mo e fakamanatu e Mass, taute oti faka-Latini. Ne nakai taha e mena haaku ne maama ti logona hifo kua tuga na mamao ligo e Atua mai ia au. Kua mole atu e tau aho haaku mo e ogoogo noa hokoia ni. Pete foki ka feleveia au mo e taokete haaku, ne pehē ni a maua, “Fakaheke ki a Maria ne tavana.” Ne fakaatā ai he tau taopou pope ke tutala ke he hafa ni e tulā ka oti e kai. Kehe mamao mai he magafaoa fiafia haaku i kaina! Ne matimati au ti fa tagi.

Pete he nakai logona hifo e au e tata ke he Atua, ne taute e au e omonuoaga haaku ti eke mo taopou pope he 17 e tau he moui. Ne taute ni au he tau mena ne fekau ki a au, ka e nakai leva ti kamata au ke hūhū na moua mooli nakai e au e uiaga fakalotu. Ne fa pehē e tau taopou pope, ko lautolu ne tuahā pihia to o atu ke he afi tote! Ka e tumau ni e tuahā haaku. Iloa e au ne nakai vevehe kehe e Iesu Keriso a ia; ka kua lavelave a ia he fakaako mo e lagomatai e falu. (Mataio 4:23-25) He 20 e tau, ne nakai fai kakano maaliali au ke nofo i ai ko e taopou pope. Ofo ai, ne pehē e takitaki fifine ne leveki, ka nakai mauokafua au ti mitaki ni au ke fano kehe fakamafiti. Tuahā au ne liga matakutaku a ia neke fakaohooho e au falu. Ti toka ai e au e fale pope.

He liu au ki kaina, ne maama he tau matua haaku. Ka kua nakai fai gahua tupe he maaga ha mautolu, ne hiki au ki Sihamani, ke he matakavi ne nofo e tugaane tote haaku. Ne lalago  lahi e ia e matakau Komunisi he tau tagata Sepania ne o mai ki ai. Ne mafanatia au he ha ha mo lautolu ia ne tau atu ke he tonuhia he tau tagata gahua mo e fetataiaki he tau fifine. Ti eke foki au mo Komunisi, fakahiku ne mau au mo e taha he matakau ia. Ne manatu au kua fai mena aoga au kua taute, he tufa e tau tohi faka-Komunisi mo e fakalataha ke he tau foleni totoko.

Ka e fai magaaho he mole, ne liu au lolelole e loto. Ne logona hifo e au kua fa kaumahala e tau Komunisi ke taute e tau mena ne talahau e lautolu. Kua mooli fakahaga e tau tuahā ia haaku he 1971 he mogo ne tugi he falu fuata he matakau ha mautolu e Ofisa Hukui ha Sepania i Frankfurt. Ne taute e lautolu e mena ia ke totoko ke he nakai fakafili tonu he pule malolō ha Sepania. Ka e talitonu au kua hepe e puhala nei ke fakakite e ita.

Magaaho ne fanau e tama fakamua haaku, ne tala age au ke he taane haaku ko e fakaoti fai e fano haaku ke he tau fonoaga Komunisi. Ne matimati lahi au ha kua nakai taha he tau kapitiga haaku he mogo fakamua ne ahiahi au mo e haaku tama mukemuke. Ne manamanatu au ke he kakano he moui. Na aoga mooli nakai he lali ke fakaholo ki mua e tuaga he tau tagata?

He 1976, ne tokoua e Fakamoli Sepania ne nokonoko e gutuhala ha mautolu mo e foaki falu tohi faka-Tohi Tapu, ti talia e au. He ahiahi mai ha laua ke uaaki, ne kamata au ke hūhū e tau hūhū loga hagaao ke he matematekelea, nakai fakatatai, mo e nakai fakafili tonu. Ne ofo au he fakaaoga e laua e Tohi Tapu ke tali aki e tau hūhū oti! Ti talia fiafia e au e fakaako Tohi Tapu.

He mogo fakamua, ne fiafia ni au ke iloa e tau mena mooli. Ka e hiki e tuaga he mogo ne kamata au mo e taane haaku ke o atu he tau feleveiaaga he Tau Fakamoli a Iehova ke he Fale he Kautu. He mogoia, kua tokoua e tama ha maua. Ne totonu e Tau Fakamoli he o mai ke uta a mautolu mo e lagomatai ke leveki e tau tama ha maua he tau feleveiaaga. Ne tupu e mafanatia haaku ke he Tau Fakamoli.

Pete ia, ne fai mena fakalotu agaia au ne tuahā ki ai. Ne fifili au ke ahiahi atu ke he magafaoa haaku i Sepania. Ko e agikolo haaku ko e akoako, ne lali ke fakalolelole au he fakaako e Tohi Tapu. Ka kua lagomatai lahi he Tau Fakamoli au. Tali e lautolu e tau hūhū haaku mai he Tohi Tapu, tuga ne taute he Tau Fakamoli i Sihamani. Ne fifili au ke liu matutaki e fakaako Tohi Tapu haaku ka liu ki Sihamani. Pete ne fifili e taane haaku ke nakai fakaako e Tohi Tapu, ne tapiki ni au ke he fifiliaga haaku. He 1978, ne papatiso au ko e taha he Tau Fakamoli a Iehova.

Ko e iloilo tonu he kupu mooli he Tohi Tapu kua foaki mai e kakano maaliali mo e takitakiaga ke he moui haaku. Ma e fakatai, he 1 Peteru 3:1-4 ne fakamalolō ke he tau hoana ke “omaoma” ke he tau taane ha lautolu mo e fakalilifu hokulo ti feaki e “loto mahani molu mo e mafola, ko e koloa uho haia ki mua he Atua.” Ko e tau matapatu fakaakoaga pihia ne lagomatai au ke taute e matagahua haaku ko e hoana mo e matua fifine.

Kua kavi 35 e tau he mole he eke au mo Fakamoli. Fiafia au ke fekafekau ke he Atua ko e vala he magafaoa fakaagaaga mooli, ti olioli au ha kua tokofā mai he lima e tama haaku ne taute pihia foki.