1, 2. (a) He mogo fe ka aoga lahi e mena fakaalofa ki a koe? (e) Ko e ha kua talahau ko e lukutoto ko e mena fakaalofa mua ue atu ka moua e koe?

KO E heigoa e mena fakaalofa mua ue atu ne moua e koe? Kua nakai lata e mena fakaalofa ke tau uka ke aoga ai. Ha ko e mena kua nakai fuafua e aoga he mena fakaalofa ke he tupe ne totogi aki. He magaaho ka fakafiafia po ke fakamakona he mena fakaalofa a koe po ke manako mooli he moui haau, kua aoga lahi ai ki a koe fakatagata.

² He tau mena fakaalofa loga ne manako a koe ke moua, taha ka mahomo atu ai. Ko e mena fakaalofa mai he Atua ke he tau tagata. Kua loga e mena ne foaki mai e Iehova ki a tautolu, ka ko e mena fakaalofa mua ue atu ne mai e ia ki a tautolu ko e poa lukutoto he haana Tama, ko Iesu Keriso. (Totou Mataio 20:28.) Tuga ka kitia e tautolu he veveheaga nei, ko e lukutoto ko e mena fakaalofa aoga lahi ka moua e koe, he tamai ki a tautolu e fiafia lahi mahaki mo e fakapuke e tau manako aoga lahi haau. Ko e lukutoto ko e fakakiteaga mua ue atu mooli he fakaalofa ha Iehova ma haau.

3. Ko e heigoa e lukutoto, mo e heigoa kua lata ke maama e tautolu ke loto fakaaue ke he mena fakaalofa aoga lahi nei?

³ Ke talahau fakatonu, ko e lukutoto ko e puhala ha  Iehova ke laveaki, po ke fakahao e tau tagata mai he hala mo e mate. (Efeso 1:7) Ke maama e kakano he fakaakoaga nei he Tohi Tapu, lata ia tautolu ke liu manatu e mena ne tupu he kaina ko Etena. Ka maama e tautolu e mena ne fakagalo e Atamu he magaaho ne hala a ia, to maeke ia tautolu ke loto fakaaue ke he kakano ne eke e lukutoto ko e mena fakaalofa aoga lahi ki a tautolu.

4. Ko e heigoa e kakano he moui mitaki katoatoa ma Atamu?

⁴ Magaaho ne tufugatia e ia a Atamu, ne foaki e Iehova ki a ia e taha mena uho lahi—ko e moui mitaki katoatoa. Mailoga la e kakano he mena ia ki a Atamu. Ha kua tufugatia ke he tino mo e loto manamanatu mitaki katoatoa, to nakai gagao a ia, fuakau, po ke mate. Ko e tagata mitaki katoatoa, ne moua e ia e fakafetuiaga uho mo Iehova. Ne talahau he Tohi Tapu ko Atamu “ko e tama a ia he Atua.” (Luka 3:38) Ti olioli e Atamu e fakafetuiaga tata mo Iehova ko e Atua, tuga he tama taane mo e matua taane loto fakaalofa. Ne matutaki a Iehova mo e tama haana he lalolagi, he foaki ki a Atamu e tau kotofaaga fiafia mo e fakailoa ki a ia e tau mena ne amanaki ke taute e ia.—Kenese 1:28-30; 2:16, 17.

5. Ko e heigoa e kakano he Tohi Tapu ne talahau kua eke a Atamu ke he “fakatai he Atua”?

⁵ Kua eke a Atamu ke he “fakatai he Atua.” (Kenese 1:27) Nakai pehē e mena ia kua foliga a Atamu tuga e Atua. Tuga ne ako e tautolu he Veveheaga 1 he tohi nei, ko Iehova ko e Agaaga nakai kitia. (Ioane 4:24) Ti kua nakai ha ha ia Iehova e tino he kakano mo e toto. He eke ke he fakatai he Atua ne kakano kua tufugatia a Atamu mo e tau mahani ne tatai ke he Atua, putoia e fakaalofa, pulotu, fakafili tonu, mo e malolō. Kua tatai a Atamu mo e Matua haana ke he taha puhala aoga foki ha kua moua e ia e atāina ke fifili. Ti, nakai tatai a Atamu mo e matini ka taute ni e mena ne talaga po ke polokalama ke taute. Ka kua maeke ia ia ke taute e tau fifiliaga fakatagata mo e fifili e mena hako mo e hepe.  Kaeke fifili a ia ke omaoma ke he Atua, to moui tukulagi a ia he Parataiso he lalolagi.

6. Magaaho ne nakai omaoma a Atamu ke he Atua, ko e heigoa ne galo e ia, mo e lauia fēfē e hologa haana?

⁶ Kitia maali he magaaho ne nakai omaoma a Atamu ke he Atua ti kua fakahala ke he mate, ne tokoluga lahi e mena ne totogi e ia. Ne fakagalo he hala haana e moui mitaki katoatoa haana mo e tau monuina oti. (Kenese 3:17-19) Momoko ai, ne nakai ni galo e Atamu haana moui uho nei ka e pihia foki ke he hologa haana a mui. Ne talahau he Kupu he Atua: “Tuga ni he hoko mai ai e hala ke he lalolagi ke he tagata tokotaha [ko Atamu], ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Ē, kua moua oti e tautolu e hala mai ia Atamu. Ati pehē e Tohi Tapu ne “fakafua” e ia a ia mo e hologa haana ke he tupaaga he hala mo e mate. (Roma 7:14) Kua nakai fai amaamanakiaga ma Atamu po ko Eva ha kua fifili pauaki a laua ke nakai omaoma ke he Atua. Ka e kua e hologa ha laua, mo tautolu foki?

7, 8. Ko e heigoa e tau kakano ua ne putoia ki ai he lukutoto?

⁷ Ne laveaki e Iehova e tau tagata puhala he lukutoto. Ko e heigoa e lukutoto? Ko e talahauaga ke he lukutoto kua putoia ai ua e kakano. Fakamua, ko e lukutoto ko e mena ne totogi ke fakatoka mai po ke liu fakatau mai taha mena. Liga fakatatai atu ke he mena ne totogi ke fakatoka mai e pagotā he felakutaki. Ke uaaki, ko e lukutoto ko e totogi ne kua lata ke fakatau aki taha mena. Kua tatai ke he totogiaga he tau mena ne malona ha ko e pakia. Ke fakatai, kaeke fakatupu he taha tagata e pakia, kua lata ia ia ke totogi e tupe ne tatai tonu ke he mena ne malona.

⁸ Kua maeke fēfē mogoia ke totogi e mena lahi mahaki ne fakagalo e Atamu ma tautolu oti mo e ke fakatokanoa mai a tautolu he tupaaga ke he hala mo e mate? O mai a tautolu ke fakatutala ke he lukutoto ne foaki e Iehova, mo e ke he kakano he mena nei ma haau.

9. Ko e heigoa e lukutoto ne lata?

⁹ Ha kua galo e moui mitaki katoatoa, kua nakai maeke he moui nakai mitaki katoatoa he taha tagata ke liu fakatau e moui ia. (Salamo 49:7, 8) Kua lata ke moua e lukutoto ne tatai e uho mo e mena ne galo. Kua felauaki e mena nei mo e matapatu fakaakoaga he fakafili tonu mitaki katoatoa ne haia he Kupu he Atua, ne talahau: “Moui ke he moui.” (Teutaronome 19:21) Ti, ko e heigoa ka totogi aki e uho he moui mitaki katoatoa he tagata, ne galo ia Atamu? Ko e moui he taha tagata mitaki katoatoa foki ni ko e ‘lukutoto tatai’ ne lata.—1 Timoteo 2:6.

10. Foaki fēfē e Iehova e lukutoto?

¹⁰ Foaki fēfē e Iehova e lukutoto? Ne fakafano mai e ia taha tama fakaagaaga mitaki katoatoa haana ke he lalolagi. Ka e nakai fakafano fakahanoa mai e Iehova ha mena moui fakaagaaga. Ne fakafano mai e Iehova haana Tama fuataha ne uho lahi ki a ia. (Totou 1 Ioane 4:9, 10.) Mo e fakamakai ne toka he Tama nei e kaina haana i luga he lagi. (Filipi 2:7) Tuga ne ako e tautolu he veveheaga kua mole he tohi nei, ne taute e Iehova e mana he magaaho ne hiki mai e ia e moui he Tama nei ke he nofoaga tama ha Maria. He puhala he agaaga tapu he Atua, ne fanau a Iesu ko e tagata mitaki katoatoa ti kua nakai haia i lalo he fakahala he hala.—Luka 1:35.

11. Maeke fēfē he tagata tokotaha ke eke mo lukutoto ma e tau miliona tagata?

¹¹ Maeke fēfē e tagata tokotaha ke eke mo lukutoto ma e tau miliona tagata? Ka e, na maeke fēfē he tau miliona tagata ke eke mo tau tagata agahala he mogo fakamua? Kia manatu ha kua hala, ne galo e Atamu e koloa uho he moui mitaki katoatoa. Ti nakai maeke ia ia ke fakaholo age e moui mitaki katoatoa ke he hologa haana. Ka e, kua maeke ni ia ia ke fakaholo age e hala mo e mate. Ko Iesu, ne ui he Tohi Tapu “ko e Atamu fakamui,” ne ha ha ia ia e moui mitaki  katoatoa, ti nakai hala foki a ia. (1 Korinito 15:45) He puhala ne hukui e Iesu a Atamu ke maeke ke fakahao a tautolu. He poa, po ke foaki e moui mitaki katoatoa haana he omaoma fakamooli ke he Atua, ne totogi e Iesu e hala ha Atamu. Ati tamai e Iesu e amaamanakiaga ke he hologa ha Atamu.—Roma 5:19; 1 Korinito 15:21, 22.

12. Ko e heigoa ne fakamooli he matematekelea ha Iesu?

¹² Ne fakamaama fakamatafeiga he Tohi Tapu e matematekelea ne fakauka a Iesu ki ai ato mate a ia. Ne fahi fakamamahi mo e fakasatauro a ia ke he akau fakatautau, mo e mate mamahi lahi. (Ioane 19:1, 16-18, 30; vala tala he Apenetiki “Kakano ne Nakai Fakaaoga he Tau Kerisiano Mooli e Akau Fakalava he Tapuakiaga”) Ko e ha kua lata a Iesu ke matematekelea lahi mahaki? He veveheaga fakamui he tohi nei, to ako a tautolu ke he paleko ha Satani to fai fekafekau nakai a Iehova ka fakatumau ke tua fakamooli i lalo he kamatamata. He fakauka tua fakamooli pete he matematekelea lahi, ne foaki e Iesu e tali mitaki lahi ke he paleko ha Satani. Ne fakakite e Iesu kua maeke he tagata mitaki katoatoa kua atāina ke fifili ke fakatumau e mahani fakamooli katoatoa ke he Atua pete e tau mena ne taute he Tiapolo. Kua liga fiafia lahi mooli a Iehova ke he tua fakamooli he Tama fakahele haana!—Tau Fakatai 27:11.

13. Puhala fe ne totogi ai e lukutoto?

¹³ Puhala fe ne totogi ai e lukutoto? He aho 14 aki he mahina Iutaia he Nisana 33 V.N., ne fakaatā he Atua e Tama mitaki katoatoa haana mo e nakai hala ke tamate. Mogoia ne poa e Iesu e moui mitaki katoatoa haana ke “laga taha ni.” (Heperu 10:10) He aho ke toluaki he mole e mate ha Iesu, ne fakatū hake e Iehova a ia ke he moui fakaagaaga. I luga he lagi, ne foaki e Iesu ke he Atua e aoga he moui mitaki katoatoa haana ne poa ma e lukutoto ke hukui aki e hologa ha Atamu. (Heperu 9:24) Ne talia e Iehova e uho he poa ha Iesu ko e lukutoto ne lata ke laveaki e tau tagata mai he tupaaga ke he hala mo e mate.—Totou Roma 3:23, 24.

14, 15. Ke moua e “fakamagaloaga he tau hala” ha tautolu, ko e heigoa kua lata ia tautolu ke taute?

¹⁴ Pete ni ko e tuaga hala ha tautolu, maeke ia tautolu ke moua e tau monuina mitaki ue atu ha ko e lukutoto. O mai la tautolu ke manamanatu ke he falu mena aoga he mogonei mo e anoiha ha ko e mena fakaalofa mua ue atu nei mai he Atua.

¹⁵ Ko e fakamagaloaga he tau hala. Ha ko e nakai mitaki katoatoa ne moua, kua taufetului mooli a tautolu ke taute e mena hako. Kua hala oti a tautolu ke he tau kupu po ke tau gahua. Ka e he puhala he poa lukutoto ha Iesu, kua maeke ia tautolu ke moua e “fakamagaloaga he tau hala.” (Kolose 1:13, 14) Ka ke moua e fakamagaloaga ia, kua lata ia tautolu ke tokihala mooli. Kua lata foki ia tautolu ke ole fakatokolalo ki a Iehova, ma e haana fakamagaloaga ne fakavē ke he ha tautolu a tua ke he poa lukutoto he Tama haana.—Totou 1 Ioane 1:8, 9.

16. Ko e heigoa kua fakaatā a tautolu ke tapuaki ke he Atua mo e loto manamanatu meā, mo e heigoa e aoga he loto manamanatu pihia?

¹⁶ Ko e loto manamanatu meā ki mua he Atua. Kua mukamuka e loto manamanatu ne agahala ke takitaki atu a tautolu ke galo e amaamanakiaga mo e logona hifo kua fakateaga. Ka e he puhala he fakamagaloaga ha ko e lukutoto, ne fakaatā e Iehova a tautolu ke tapuaki ki a ia mo e loto manamanatu meā pete kua nakai mitaki katoatoa a tautolu. (Heperu 9:13, 14) Ati maeke ai a tautolu ke moua e tokanoaaga ke matutaki mo Iehova. Ha kua pihia, kua tokanoa a tautolu ke o atu ki a ia he liogi. (Heperu 4:14-16) He taofi mau e loto manamanatu meā ka foaki mai e mafola he manamanatuaga, fakatolomaki e lilifu fakatagata, mo e lafi atu ke he fiafia.

17. Ko e heigoa e tau monuina ne moua ha kua mate a Iesu ma tautolu?

¹⁷ Ko e amaamanakiaga he moui tukulagi he lalolagi parataiso. “Ko e mate ko e palepale ia he hala,” he talahau he  Roma 6:23. Ne lafi e kupu ia: “Ka ko e moui tukulagi ko e mena foaki noa mai he Atua haia, ke he Iki ha tautolu ko Keriso Iesu.” He Veveheaga 3 he tohi nei, kua fakatutala a tautolu ke he tau monuina he Parataiso he lalolagi hane hau. (Fakakiteaga 21:3, 4) Ko e tau monuina ia anoiha, putoia e moui tukulagi mo e tino malolō mitaki katoatoa, nukua maeke ni ha kua mate a Iesu ma tautolu. Ke moua e tau monuina ia, kua lata ia tautolu ke fakakite e loto fakaaue ma e mena fakaalofa he lukutoto.

18. Ko e ha kua lata ia tautolu ke loto fakaaue ki a Iehova he foaki mai e lukutoto?

¹⁸ Ko e ha kua lata ia tautolu ke loto fakaaue lahi ki a Iehova ma e lukutoto? Mooli, kua uho lahi e mena fakaalofa he magaaho ka putoia ai e foaki noa he magaaho, gahua, po ke tupe haana ne foaki. Ti kua aamotia lahi ai e loto ha tautolu ka mailoga ko e mena fakaalofa ko e fakakiteaga he fakaalofa mooli haana ne foaki ki a tautolu. Ko e lukutoto kua mua atu e uho ke he tau mena fakaalofa oti, ha kua taute he Atua e poa ne mua ue atu ke foaki mai ai. “Nukua pihia e fakaalofa mai he Atua ke he lalolagi, kua ta mai ai hana Tama fuataha,” he talahau he Ioane 3:16. Ko e lukutoto  ko e fakamooliaga maaliali lahi ue atu he fakaalofa ha Iehova ma tautolu. Ti ko e fakamooliaga foki he fakaalofa ha Iesu, ha kua fakamakai a ia ke foaki e moui haana ma tautolu. (Totou Ioane 15:13.) Kua lata he mena fakaalofa he lukutoto ke omoi a tautolu ke mauokafua kua fakaalofa a Iehova mo e Tama haana ki a tautolu takitokotaha.—Kalatia 2:20.

19, 20. Ko e heigoa e tau puhala kua maeke ia koe ke fakakite e loto fakaaue haau ke he mena fakaalofa he Atua ko e lukutoto?

¹⁹ Ti maeke fēfē ia koe ke fakatātā kua loto fakaaue a koe ke he mena fakaalofa he Atua ko e lukutoto? Ke kamata aki, kia kumi ke iloa e Foaki Mua Atu, ko Iehova. (Ioane 17:3) He fakaako e Tohi Tapu fakalataha mo e tohi nei ka lagomatai a koe ke taute e mena ia. Ti he iloa e koe a Iehova, to hokulo e fakaalofa haau ki a ia. To omoi he fakaalofa ia a koe ke manako ke fakafiafia a ia.—1 Ioane 5:3.

²⁰ Fakagahuahua e tua ke he poa lukutoto ha Iesu. Ne talahau hagaao ki a Iesu: “Ko e tagata ne tua ke he Tama, ha ha ia ia e moui tukulagi.” (Ioane 3:36) Maeke fēfē ia tautolu ke fakagahuahua e tua ki a Iesu? Ko e tua pihia kua nakai ni fakakite ke he tau kupu hokoia. ‘Kua mate e tua kaeke kua noa mo e tau gahua,’ he talahau he Iakopo 2:26. Ē, kua kitia mitaki e tua mooli ke he “tau gahua” ha tautolu. Taha puhala ke fakakite e tua ha tautolu ki a Iesu he lali fakalahi a tautolu ke fifitaki a ia, nakai ni ke he tau mena ne talahau ka e pihia foki ke he tau mena taute ha tautolu.—Ioane 13:15.

21, 22. (a) Ko e ha kua lata ia tautolu ke o atu ke he fakamanatuaga lagataha he tau he Kaiaga Afiafi he Iki? (e) Ko e heigoa ka fakamaama he Veveheaga 6 mo e 7?

²¹ O atu ke he fakamanatuaga lagataha he tau he Kaiaga Afiafi he Iki. He afiafi he Nisana 14, 33 V.N., ne tamata e Iesu e fakamanatuaga uho ne ui he Tohi Tapu ko e “kaiaga [afiafi] he Iki.” (1 Korinito 11:20; Mataio 26:26-28) Kua ui foki e magaaho nei ko e Fakamanatuaga he matulei he Keriso. Kua fakatū ai e Iesu ke lagomatai e tau aposetolo haana  mo lautolu oti ne eke mo tau Kerisiano mooli a mui ke tokaloto ha ko e mate haana ko e tagata mitaki katoatoa, ne foaki e ia e moui haana mo lukutoto. Hagaao ke he fakamanatuaga nei, ne poaki e Iesu: “Kia eke e mutolu e mena nai mo fakamanatuaga kia au.” (Luka 22:19) He taute e Fakamanatuaga ka fakamanatu ki a tautolu e fakaalofa mua ue atu ne fakakite e Iehova mo Iesu hagaao ke he lukutoto. Maeke ia tautolu ke fakakite e loto fakaaue ma e lukutoto he fakalataha ke he Fakamanatuaga he matulei ha Iesu he tau tau takitaha. *

²² Ko e lukutoto ne foaki mai e Iehova ko e mena fakaalofa mitaki ue atu mooli. (2 Korinito 9:14, 15) Kua maeke he mena fakaalofa mitaki lahi nei ke aoga foki ki a lautolu ne mamate. To fakamaama he Veveheaga 6 mo e 7 e puhala nei.