1, 2. Ko e ha ko e koloa aoga lahi e kamapasi, ti fakatatai fēfē ke he loto manamanatu?

KO E ikivaka ne fakahakohako e toga haana he tau peau he moana lahi; ko e tagata fano hui ne tukufenoga he tutakale ogoogonoa; ko e tagata fakaholo vakalele kua fakahakohako e vakalele haana he lele he tau aolū i luga he pulagi. Iloa nakai e koe e mena ne fetataiaki e tau tagata nei? To fai lekua lahi a lautolu oti ia ka nakai fai kamapasi​​—mua atu ka nakai moua e tau lakau hila tuga he vahā nei.

² Ko e kamapasi ko e koloa mukamuka ke fakaaoga, ne ha ha e mata mo e nila makeneta ne tuhi ke he faahi tokelau. Ka gahua mitaki ai, ti fakaaoga fakalataha mo e mepe hako to maeke ke fakahao e moui. He falu puhala, kua maeke ke fakatatai ai ke he mena fakaalofa uho ne foaki mai e Iehova ma tautolu​​—ko e loto manamanatu. (Iakopo 1:17) Ka nakai fai  loto manamanatu, to galo a tautolu he nakai fai takitakiaga. Ka fakaaoga fakamitaki, to lagomatai a tautolu ke moua e puhala hako he moui mo e pipiki mau ki ai. O mai a tautolu ke kumikumi ko e heigoa e loto manamanatu mo e gahuahua fēfē. To fakatutala a tautolu ke he tau matakupu nei: (1) Puhala fe ka fakaako e loto manamanatu, (2) ko e ha kua lata ke mailoga e tau loto manamanatu he falu, mo e (3) puhala fe ka aoga ki a tautolu he fakatumau e loto manamanatu mitaki.

3. Ko e heigoa e kakano he kupu Heleni ma e “loto manamanatu,” ti ko e heigoa e puhala kehe lahi kua gahuahua ai ke he tagata?

³ I loto he Tohi Tapu, ko e kupu Heleni ma e “loto manamanatu” kua kakano ke iloa he tagata a ia ni. He nakai tuga e falu mena momoui he lalolagi, kua foaki mai he Atua ke he tagata e lotomatala ke iloa ni e tautolu a tautolu. Maeke ia tautolu ke liu manamanatu hifo ki a tautolu mo e taute e tau fifiliaga kua hako. Kua eke e loto manamanatu mo fakamooli po ke fakafili ti maeke ke kumikumi ke he tau gahua, tau mahani, mo e tau fifiliaga ha tautolu. To takitaki a tautolu ke he fifiliaga mitaki po ke hataki a tautolu mai he fifiliaga kelea. He magaaho fakamui, liga fakamafanatia ki a tautolu he mitaki e fifiliaga po ke fakahala mamahi lahi a tautolu he kelea e fifiliaga.

4, 5. (a) Iloa fēfē e tautolu na fai loto manamanatu a Atamu mo Eva, ti ko e heigoa e fua he fakaheu e laua e fakatufono he Atua? (e) Ko e heigoa e tau fakafifitakiaga ne fakakite kua fakaaoga he tau tagata tua fakamooli he vahā fakamua atu e tau loto manamanatu ha lautolu?

⁴ Ko e tuaga nei kua ha ha i loto he tagata taane mo e fifine fakamua tali mai he kamataaga. Ne fakakite e Atamu mo Eva kua fai loto manamanatu a laua. Iloa e tautolu e fakamooliaga nei ha kua mā a laua ti fakamumuli he mole e agahala ha laua. (Kenese 3:7, 8) Ka ko e loto manamanatu ne tokihala kua nakai fai aoga ki a laua he magaaho tonu ia. Ne fakaheu pauaki e laua e fakatufono he Atua. Ti fifili ni a laua ke eke mo tau tagata totoko ki a Iehova ko e Atua. Ha ko e tau  tagata mitaki katoatoa, ne iloa e laua e mena ha laua ne taute, ti nakai maeke ia laua ke liliu mai ke he Atua.

⁵ He nakai tuga a Atamu mo Eva, ne tokologa e tagata nakai mitaki katoatoa ne kua fanogonogo ke he tau loto manamanatu ha lautolu. Ma e fakatai, ko e tagata tua fakamooli ko Iopu ne maeke ke talahau: “Kua taofi e au haku a tututonu ke mau, nakai ni tiaki e au; to nakai eke fakakelea mai kia au he loto haku ke he tau aho oti haku.” * (Iopu 27:6) Ne fanogonogo mooli mo e muitua a Iopu ke he loto manamanatu ke takitaki e tau gahua mo e tau fifiliaga haana. Ti maeke a ia ke talahau mo e fiafia mooli kua nakai fakamamahi he loto manamanatu haana a ia he fakamā mo e tokihala. Mailoga la e kehekehe ha Iopu mo Tavita. He magaaho ne nakai fakalilifu a Tavita ki a Saulo, ko e patuiki ne fakauku e Iehova, “kua mole ia ti hukia e loto a Tavita ia ia ni.” (1 Samuela 24:5) Ko e tau logonaaga mamahi lahi ia he loto manamanatu ne aoga mooli ki a Tavita, ti fakaako a ia ke kalo mai he nakai fakalilifu pihia he magaaho fakamui.

6. Ko e heigoa ne fakakite ko e loto manamanatu ko e mena fakaalofa ke he tau tagata oti kana?

⁶ Ko e tau fekafekau ni kia ha Iehova ne moua e mena fakaalofa nei ko e loto manamanatu? Manamanatu la ke he tau kupu omoomoi he aposetolo ko Paulo he pehē: “Ha ko e mena ka eke noa he tau motu kehe nakai ha ha i ai e fakatufono, e tau mena kua lata mo e fakatufono, pete ni he nakai ha i ai e fakatufono, kua eke a lautolu mo fakatufono kia lautolu; Ko lautolu haia kua fakakite mai ai e gahua he fakatufono kua tohi ke he tau loto ha lautolu, kua fakamoli foki ha lautolu e tau loto manamanatu, kua fefakakeleāki foki, po ke fefakatonuaki  ha lautolu a tau manatu.” (Roma 2:14, 15) Pihia foki a lautolu ne nakai iloa e tau fakatufono ha Iehova, ka kua maeke he loto manamanatu ha lautolu ke fakagahua e tau matapatu fakaakoaga he Atua.

7. Liga ko e ha ne hepe e loto manamanatu he falu magaaho?

⁷ Ka ko e falu magaaho kua liga hepe e loto manamanatu. Ko e ha? Kaeke kua tuku fakatata e kamapasi ke he lapatoa, liga hihiga e nila ke tuhi ke he faahi hepe ka e nakai ke he faahi tokelau. Ti ka nakai hako e mepe haau ne fakaaoga, liga nakai aoga foki e kamapasi. Pihia foki, ka ufia lahi a tautolu he tau manako lotokai, to hihiga e loto manamanatu ha tautolu ke tuhi ke he faahi hepe. Ti ka fakaaoga mo e nakai fai takitakiaga mauokafua mai he Kupu he Atua, to liga nakai maeke ia tautolu ke kitia e mena hako mo e mena hepe ke he loga e tau matakupu aoga. Mooli ai, ke maeke e loto manamanatu ha tautolu ke gahua mitaki, kua lata a tautolu ke moua e takitakiaga he agaaga tapu ha Iehova. Ne tohia e Paulo: “Kua fakamoli foki kia au haku a loto manamanatu hifo ki mua he Agaga Tapu.” (Roma 9:1) Ka e maeke fēfē ia tautolu ke iloa mooli kua lautatai e loto manamanatu ha tautolu mo e agaaga tapu ha Iehova? Maeke ni ka fakaako a tautolu ki ai.

8. (a) Lauia fēfē e loto manamanatu ha ko e tau manako, ti ko e heigoa ne mua e aoga ka taute e tau fifiliaga ha tautolu? (e) Ko e ha ne nakai lata ni ke moua he Kerisiano e loto manamanatu hifo mitaki? (Kikite matahui tala.)

⁸ Maeke fēfē a koe ke taute e fifiliaga ne fakavē ke he loto manamanatu? Ko e falu tagata, ne kumikumi ni ke he tau manatu mo e tau logonaaga ha lautolu, ti fifili e mena ke taute. Liga pehē a lautolu he magaaho fakamui, “Ai tupetupe e loto manamanatu haaku.” Maeke e tau manako he loto ke malolō lahi, ti hoko foki ke fakaohooho e loto manamanatu. Pehē e Tohi Tapu: “Kua mua ke he tau mena oti e loto he fakavai, ti gagao lahi ni a ia; po ke maeke kia hai ke iloa a ia?” (Ieremia 17:9) Kua nakai lata mogoia ke manamanatu fakalahi ke he tau manako he loto ha tautolu. Ka e manako a tautolu ke  manamanatu fakamua ke he tau mena ka fakafiafia a Iehova ko e Atua. *

9. Ko e heigoa e matakutaku ke he Atua, ti lauia fēfē ke he loto manamanatu ha tautolu?

⁹ Ka fakavē mooli e fifiliaga ha tautolu ke he loto manamanatu ne kua fakaako, to fakakite kua matakutaku a tautolu ke he Atua ka e nakai ko e ha tautolu a tau manako fakatagata. Onoono ke he taha fakataiaga. Ko e kavana tua fakamooli ko Nehemia ne ha ha e tonuhia ke ole mai e taui mo e tau tukuhau he tau tagata i Ierusalema. Ka e nakai taute pihia e ia. Ko e ha? Ne nakai manako a ia ke fakahukia a Iehova he fakapehia e tau tagata he Atua. Pehē a ia: “Nakai eke pihia e au, ha kua matakutaku ai au ke he Atua.” (Nehemia 5:15) Kua aoga lahi e matakutaku mooli ke he Atua, ko e matakutaku mai he loto katoa neke nakai fakafiafia ha tautolu a Matua he lagi. Ko e matakutaku pihia ke he Atua ka omoi a tautolu ke kumi e takitakiaga mai he Kupu he Atua ka taute e tautolu e tau fifiliaga.

10, 11. Ko e heigoa e tau matapatu fakaakoaga he Tohi Tapu kua hagaao ke he inu kava, mo e moua fēfē e tautolu e takitakiaga he Atua ke fakagahua ai?

¹⁰ Ma e fakatai, manamanatu la ke he kava. Hanei e fifiliaga ne fehagai mo e tokologa ia tautolu ka haia he tau fakafiafiaaga, To inu kava au po ke nakai? Fakamua, kua lata a tautolu ke fakaako a tautolu ni. Ko e heigoa e tau matapatu fakaakoaga he Tohi Tapu kua lata he tuaga nei? Nakai pā malu he Tohi Tapu e kava ka inu fakalatalata. Ka e fakakite ai ko e uaina ko e mena fakaalofa mai ia Iehova. (Salamo 104:14, 15) Ka e nakai fakaatā he Tohi Tapu e inu lahi mo e tau patī fakahohā mo e miha ha ko e kona kava. (Luka 21:34; Roma 13:13) Lafi ki ai,  kua tohi fakalataha e konahia mo e tau agahala kelea lahi, tuga e mahani feuaki. *​​—1 Korinito 6:9, 10.

¹¹ Kua fakaako he Kerisiano e loto manamanatu he fakagahua e tau matapatu fakaakoaga ia ke he moui haana. Ti maeke e loto manamanatu haana ke mautali ke fakalaga a ia ke he tau mena hako mo e hepe. Ka fehagai a tautolu mo e fifiliaga ke inu kava he toloaga fakafiafia, hūhū e tautolu e tau hūhū tuga anei: ‘Ko e toloaga fēfē kua fakatoka? Liga hihiga kia ke fano fakahaga e patī ti miha lahi? Ko e heigoa e tau manako mooli haaku? Manako lahi kia a au ke he kava, ke inu tumau mo e fakaaoga ke fakanimo po ke fakagalo aki e tau lekua haaku? Fahia nakai au ke fakakaupā e kava haaku ka inu?’ Ka manamanatu fakahokulo a tautolu ke he tau matapatu fakaakoaga he Tohi Tapu mo e tau hūhū ne lagā mai ai, kua lata ia tautolu ke liogi ma e takitakiaga ha Iehova. (Totou Salamo 139:23, 24.) He puhala nei, kua uiina e tautolu a Iehova ke takitaki a tautolu aki e agaaga tapu haana. Kua fakaako foki e tautolu e ha tautolu a tau loto manamanatu ke fakalautatai mo e tau matapatu fakaakoaga he Atua. Ka e fai mena foki kua lata ke manamanatu fakahokulo ki ai ma e tau fifiliaga ha tautolu.

12, 13. Ko e heigoa falu kakano ne nakai tatai e tau loto manamanatu he tau Kerisiano, ti lata a tautolu ke fehagai fēfē ke he tau tuaga ia?

¹² Liga ofo a koe ha ko e nakai tatai e tau loto manamanatu he tau Kerisiano he falu magaaho. Ke he taha tagata kua nakai mitaki e matagahua po ke aga fakamotu, ka e ke he taha tagata kua fiafia a ia ki ai ti nakai kitia ha mena kelea i ai. Ma e fakatai hagaao ke he inu kava, ko e taha tagata kua fiafia he inu auloa mo e tau kapitiga he okioki a lautolu he mogo afiafi; ka ko e taha tagata kua nakai fiafia ke he mena ia. Ko e ha ne nakai tatai ai, ti lauia fēfē e tau fifiliaga ha tautolu ha ko e tau mena ia?

 ¹³ Loga e kakano ne nakai tatai e tau tagata. Kehekehe e tau tupu maiaga. Ma e fakatai, kua mailoga he falu tagata e lolelole ne taufetului a lautolu ki ai he magaaho kua mole​​—ti liga nakai kautū tumau. (1 Tau Patuiki 8:38, 39) Ka hagaao ke he inu kava, to manamanatu fakalahi e tau tagata pihia. Ka hau e taha tagata pihia ke ahiahi ke he kaina haau, liga omoi he loto manamanatu haana a ia ke nakai talia e kava ka age e koe. To ita nakai a koe? To fakamakamaka nakai a koe? Nakai. He iloa e koe e tau kakano haana po ke nakai​​—tau kakano ne liga nakai manako a ia ke talahau he tuaga ia​​—to omoi he fakaalofa haau ke he matakainaga ke ua fakamakamaka.

14, 15. Ko e heigoa e matakupu ne kehekehe ai e tau loto manamanatu he fakapotopotoaga he senetenari fakamua, mo e ko e heigoa ne talahau e Paulo?

¹⁴ Ne kitia he aposetolo ko Paulo e kehekehe lahi he tau loto manamanatu he tau Kerisiano he senetenari fakamua. He magahala ia, ne tupetupe e falu Kerisiano ha ko e tau mena kai ne kua poa ke he tau tupua tā. (1 Korinito 10:25) Ne nakai fakaheu he loto manamanatu ha Paulo e tau mena kai ia ne fakafua he magaaho fakamui he tau makete. Ki a Paulo ko e tau mena ai fai moui e tau tupua, ti nakai ko lautolu ne pule ke he tau mena kai ne tupu mai ia Iehova, ko e pule ke he tau mena oti. Ka e maama e Paulo kua nakai talia he falu e onoonoaga haana ke he mena nei. Falu ne liga putoia lahi ke he tapuaki tupua ato eke a lautolu mo tau Kerisiano. Ki a lautolu ia, kua kelea e tau mena oti, lauia foki e tau mena ne fakaaoga he magaaho fakamua ke tapuaki ke he tau tupua. Fakahako fēfē e Paulo e tuaga nei?

¹⁵ Pehē a Paulo: “Ko e mena lata kia tautolu kua malolo ke lagomatai ke he lolelole ha lautolu kua nakai fahia; ka e aua neke fakafiafia ha tautolu a tau loto. Ha ko Keriso ni, nakai fakafiafia e ia hana finagalo.” (Roma 15:1, 3) Fakamaama e Paulo kua lata a tautolu ke tuku fakamua e tau manako he tau matakainaga ha tautolu, tuga ne taute he Keriso. He taha fakatutalaaga pihia foki, ne talahau e Paulo to nakai kai e ia e kakano he tau manu neke fakatupetupe e tau mamoe fakahele  ne kua foaki e Iesu haana a moui ke hukui aki a lautolu.​​—Totou 1 Korinito 8:13; 10:23, 24, 31-33.

16. Ko e ha a lautolu ne nakai taute falu mena ha ko e fifiliaga he loto manamanatu, kua nakai lata ke fakafili atu ke he falu ne nakai tatai e loto manamanatu mo e ha lautolu?

¹⁶ He taha faahi, ko lautolu ne nakai taute falu mena pauaki ha ko e fifiliaga he loto manamanatu, kua nakai lata ke tuhituhi ke he falu mo e fakamakamaka kua lata e tau tagata oti ke tatai mo lautolu. (Totou Roma 14:12.) Mooli ai, ko e loto manamanatu ha tautolu kua lata ke fakafili a tautolu ni, nakai ko e fakaatāaga ke fakafili e falu. Manatu e tau kupu ha Iesu: “Aua neke fakafili atu e mutolu, neke fakafili a mutolu.” (Mataio 7:1) Kua lata e tau matakainaga oti he fakapotopotoaga ke kalo mai he taufetoko ke he tau mena ne lauia e loto manamanatu he tagata ni. Ka e kumi puhala a tautolu ke fakatolomaki e fakaalofa mo e kaufakalataha, fefakamafanaaki ko e taha ke he taha, ka e nakai ekefakakelea.​​—Roma 14:19.

17. Ko e heigoa kua tupu ke he tau loto manamanatu he tokologa he vahā nei?

¹⁷ Ne tohia he aposetolo ko Peteru: “Kia ha ha ia mutolu e loto manamanatu hifo mitaki.” (1 Peteru 3:16) Ko e loto manamanatu hifo kua meā ki mua ha Iehova ko e Atua, ko e fakamonuinaaga lahi mahaki. Nakai tuga e tau loto manamanatu he tokologa he vahā nei. Fakamaama e Paulo a lautolu ia “kua fakavela e tau loto manamanatu hifo ha lautolu ni ke he lapatoa kaka.” (1 Timoteo 4:2) Kua fakavela he lapatoa kakā e vala kakano ti pite ai mo e nakai logona ha mena. Tokologa ne pihia e tau loto manamanatu, tuga na mate​​—kua lahi mahaki e pite mo e nakai fai logonaaga ti nakai hataki, totoko, po ke mā mo e fuafua kelea ke he mena kelea ne taute. Tokologa e tagata he vahā nei ne fakaheu e tau logonaaga fuafuakelea ha lautolu.

18, 19. (a) Ko e heigoa e aoga ne moua mai he tau logonaaga tupetupe po ke mā ha ko e agahala? (e) Ko e heigoa ha tautolu ka taute ka tupetupe agaia e loto manamanatu ha tautolu, ha ko e tau agahala kua mole ne kua fitā e tokihala a tautolu ki ai?

 ¹⁸ Mooli, ko e tau logonaaga fuafuakelea ko e puhala kua tala mai he loto manamanatu ki a tautolu, kua hepe e mena ha tautolu ne taute. Ka omoi he tau logonaaga pihia e tagata agahala ke tokihala, to maeke foki e tau agahala kelea lahi ke fakamagalo. Ma e fakatai, ko e Patuiki ko Tavita ne taute e agahala kelea lahi, ka kua fakamagalo he tokihala mooli a ia. Ne fakavihia e ia e puhala hepe haana ti eketaha ke omaoma ke he tau fakatufono ha Iehova tali mai he magaaho ia, ti kitia mooli e ia a Iehova “kua mitaki ni . . . ti fakamagalo e tau hala.” (Salamo 51:1-19; 86:5) Ka e kua ka kelea lahi agaia e tau logonaaga mo e mā ai, pete kua tokihala a tautolu mo e kua fakamagalo?

¹⁹ Falu magaaho kua fakahala lahi he loto manamanatu e tagata agahala, ti tumau ke fakatupetupe a ia pete he mole e aoga he tau logonaaga ia. He tau tuaga pihia, liga lata ia tautolu ke peehi ke he loto tupetupe ha tautolu, na mua ue atu a Iehova ke he tau logonaaga oti kana he tagata. Lata ia tautolu ke talitonu mo e talia e fakaalofa mo e fakamagaloaga haana, tuga ne fakamafana e tautolu e falu ke taute pihia. (Totou 1 Ioane 3:19, 20.) He taha faahi, ko e loto manamanatu ne meā kua tamai e loto mafola, fakatotoka, mo e olioli ne uka lahi ke moua he lalolagi nei. Tokologa ne taute e tau agahala kelea lahi ne kua logona hifo e fakatotoka mooli nei, ti moua e loto manamanatu mitaki mo e tumau ki ai he fekafekauaga ha lautolu ki a Iehova ko e Atua.​​—1 Korinito 6:11.

20, 21. (a) Ko e heigoa he tohi nei ka lagomatai a koe ke taute? (e) Ha ko e tau Kerisiano, ko e heigoa e tokanoaaga ne moua e tautolu, mo e lata ke fakaaoga fēfē e tautolu?

²⁰ Kua tohia e tohi nei ke lagomatai a koe ke moua e olioli ia, ke fakatumau e loto manamanatu mitaki he tau aho fakamui nei he fakatokaaga kelea ha Satani. Ka e nakai maeke ke fakamaama oti he tohi nei e tau fakatufono mo e tau matapatu fakaakoaga he Tohi Tapu, ne kua lata ia koe ke manamanatu ki ai mo e fakaaoga he tau tutuaga ka feleveia mo koe he tau aho takitaha. Lafi ki ai, ua amanaki ke moua e tau matafakatufono pauaki mo e maaliali ke lata mo e tau matakupu  ne fakavē ke he loto manamanatu. Ko e kakano he tohi nei ke lagomatai a koe ke fakaako mo e fakagahua e Kupu he Atua he moui haau. To fakaako mo e tauteute he mena nei e loto manamanatu haau ke hataki a koe ke he mena hako mo e hepe. He nakai tatai mo e Fakatufono Faka-Mose, ko e “fakatufono a Keriso” kua uiina a lautolu ne mumui ki ai ke momoui he fakaaoga e loto manamanatu mo e tau matapatu fakaakoaga, ka e nakai momoui ke he tau tohi matafakatufono. (Kalatia 6:2) Kua foaki e Iehova ke he tau Kerisiano e tokanoaaga lahi. Ka e fakamanatu mai he Kupu haana ki a tautolu ke aua neke fakaaoga e tokanoaaga ia mo “ufiufi he kelea.” (1 Peteru 2:16) Ko e tokanoaaga ia, ka moua e tautolu e magaaho mitaki lahi ke fakakite e fakaalofa ha tautolu ki a Iehova.

²¹ He manamanatu mo e liogi ke moua e puhala kua mua e mitaki ke moui fakatatau ke he tau matapatu fakaakoaga he Tohi Tapu, ti ka fakagahua e tau fifiliaga haau, to matutaki a koe he puhala aoga lahi ne kamata he magaaho ne iloa fakamua a Iehova. To fakamahani e koe e loto manamanatu haau he fakaako mua ai. (Heperu 5:14) Ko e loto manamanatu haau ne kua fakaako he Tohi Tapu to monuina ai a koe he tau aho oti he moui haau. Tuga e kamapasi ne kua takitaki e tagata fano fenoga, to lagomatai foki he loto manamanatu haau a koe ke taute e tau fifiliaga ne fakafiafia e haau a Matua he lagi. Ko e puhala mooli anei ke fakatumau a koe ke he fakaalofa he Atua.