1-3. Ko e heigoa ka tupu he magaaho ka fifitaki e tautolu e fakafifitakiaga ha Iehova ke he fakakiteaga he fakaalofa?

“KUA lahi e fiafia he foaki atu ke he talia mai.” (Gahua 20:35, NW) Kua peehi he tau kupu ia ha Iesu e kupu moli aoga lahi nei: Kua tamai ni he fakaalofa nakai fulukovi hana palepale mitaki. Pete ni kua lahi e fiafia he talia mai e fakaalofa, kua mua atu e lahi he fiafia he foaki atu, po ke he fakakite e fakaalofa ke he falu.

² Kua nakai fai tagata foki ne kua iloa lahi e mena nei ka ko e Matua he lagi ha tautolu. Tuga he kitia e tautolu he tau veveheaga fakamua he vala nei, ko Iehova ko e fakafifitakiaga tokoluganea he fakaalofa. Kua nakai la fakakite he ha tagata e fakaalofa ke he tau puhala mua ue atu po ke ke he vaha loa ka ko ia ni. Ti nakai kia ko e kakano haia, ne ui a Iehova ko e “Atua fiafia”?​—1 Timoteo 1:11, NW.

³ Kua manako e Atua fakaalofa ha tautolu ki a tautolu ke lali ke tuga a ia, mua atu he magaaho ka fakakite e fakaalofa. Ne talahau he Efeso 5:​1, 2 ki a tautolu: “Kia fifitaki a mutolu ke he Atua tuga e tau fanau fakahelehele. Kia mahani a mutolu mo e fakaalofa.” Ka fifitaki e tautolu e tau fakafifitakiaga ha Iehova ke he fakakiteaga he fakaalofa, kua mailoga e tautolu e fiafia mua ue atu ne hau he foaki atu. Kua moua foki e tautolu e makona he iloa kua talia a tautolu ki a Iehova, ha kua fakamafana he Kupu hana a tautolu ke “fakaalofa atu kia taha.” (Roma 13:8) Ka kua ha ha ai foki falu a kakano ne kua lata ia tautolu ke ‘mahani mo e fakaalofa.’

4, 5. Ko e ha ne aoga ai ke fakakite e tautolu e fakaalofa foaki-noa ke he tau katofia talitonu?

⁴ Ko e ha kua aoga ai ke fakakite e tautolu e fakaalofa ke he tau katofia talitonu? Ke talahau fakalapalapa, ko e fakaalofa ko e fua aoga lahi he faka-Kerisiano moli. Ka noa mo e fakaalofa kua nakai maeke ia tautolu ke moua e pipiaga tata mo e tau katofia Kerisiano, mo e mua atu e aoga, to nakai fai aoga a tautolu ki mua he fofoga  ha Iehova. Kitekite e puhala ne fakamaama he Kupu he Atua e tau kupu moli nei.

⁵ He po fakahiku he moui ha Iesu he lalolagi, ne tala age a Iesu ke he tau tutaki hana: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:​34, 35) “Tuga he fakaalofa atu au kia mutolu”​—e, kua poaki ki a tautolu ke fakakite e vahega fakaalofa ne fakatata e Iesu. He Veveheaga 29, kua mailoga e tautolu ne fakatokatoka e Iesu e fakafifitakiaga mua ue atu he fakakite e fakaalofa foaki-noa, he tuku fakamua e tau manako mo e tau fiafia he falu i mua he hana. Kua lata foki ia tautolu ke fakatata e fakaalofa nakai fulukovi, mo e kua lata ia tautolu ke taute fakamaaliali ai ke kitia moli ai foki ki a lautolu i fafo he fakapotopotoaga Kerisiano. Haia, ko e fakaalofa fakamatakainaga foaki-noa ko e fakamailoga ne kitia ai a tautolu ko e tau tutaki he Keriso.

6, 7. (a) Iloa fefe e tautolu nukua fakatokoluga he Kupu ha Iehova e uho ke he fakakiteaga he fakaalofa? (e) Ko e tau kupu ha Paulo ne fakamau ia 1 Korinito 13:​4-8 kua mamata atu ke he vala fe he fakaalofa?

⁶ Ka e kua ka nakai fai fakaalofa ia tautolu? ‘Kaeke nakai fai fakaalofa au,’ he talahau he aposetolo ko Paulo, “kua eke au mo apa kula kua fakapako po ke kumepalo kua fakatagi.” (1 Korinito 13:1) Na leo hoha e kumepalo kua fakatagi. Ka e kua e apa kula kua fakapako? Kua talahau he falu a fakaliliuaga ‘ko e logo fakahoha’ po ke ‘ko e logo fakataogo.’ Ko e tau fakataitaiaga latatonu ha ia! Ko e tagata nakai fai fakaalofa kua tuga e kanavaakau fakatagi ne taute e tau leo tagi hoha mo e lahi ati kua fakavihia ai ka e nakai futiaki. Maeke fefe he tagata pihia ke olioli e fakafetuiaga tata mo e falu? Ne talahau foki e Paulo: “Kaeke foki ha ha ia au e tua katoatoa ke uta kehe ai e tau mouga, ka e nakai fai fakaalofa au, ko e mena noa ni au.” (1 Korinito 13:2) Kia manamanatu la, ko e tagata ne nakai fai fakaalofa ko e “tagata teva,” pete ni ke he ha gahua ni ne liga taute e ia! (The Amplified Bible) Ti nakai kia maaliali kua fakatokoluga he Kupu ha Iehova e uho he fakakiteaga he fakaalofa?

⁷ Maeke fefe, mogoia, a tautolu ke fakatata e fua nei ke he tau fakafehagai ha tautolu mo e falu? Ke tali, kia kumikumi a tautolu ke he tau kupu ha Paulo ne moua he 1 Korinito 13:​4-8, NW. Ko e  kakano he tau kupu nei kua nakai hagaao ke he fakaalofa he Atua ma tautolu po ke fakaalofa ha tautolu ma e Atua. Kehe mai, kua mamata atu a Paulo ke he puhala kua lata ia tautolu ke fakakite e fakaalofa ko e taha ke he taha. Ne fakamaama e ia falu mena he fakaalofa mo e falu mena ne nakai ko e fakaalofa.

8. Maeke fefe he fakamanavalahi ke lagomatai a tautolu ke he tau fakafehagai ha tautolu mo e falu?

⁸ “Kua fakamanavalahi e fakaalofa.” Ko e kakano he fakamanavalahi ke fakauka fakalahi ke he falu. (Kolose 3:13) Kua nakai kia lata a tautolu mo e fakauka pihia? Ha ko e tau mena momoui nakai mitaki katoatoa a tautolu ne fekafekau fakalataha, kua lata tonu ni ke amanaki ko e falu a magaaho, to liga fakahogohogo manava mai he tau matakainaga Kerisiano a tautolu mo e liga taute pihia foki e tautolu ki a lautolu. Ka kua maeke he fakauka ke lagomatai a tautolu ke fahia ke he tau taufetoko mo e tau fakahukia ne fakauka ki ai  a tautolu he tau fakafehagaiaga mo e falu​—mo e nakai faguna e mafola he fakapotopotoaga.

9. Ko e tau puhala fe kua maeke ia tautolu ke fakakite e mahani totonu ke he falu?

⁹ ‘Kua mahani totonu e fakaalofa.’ Ko e mahani totonu kua fakakite he tau gahua lagomatai mo e tau kupu fakamafanatia. Kua omoi he fakaalofa a tautolu ke kumi e tau puhala ke fakakite e mahani totonu, mua atu ki a lautolu ne manako lahi. Ke tuga anei, ko e katofia talitonu motua lahi kua liga kikioka ti kua fiafia ke fai ahiahi fakamafana. Ko e matua fifine nofo tokotaha po ke matakainaga fifine ne nofo he kaina vevehe fakalotu kua fiafia ke moua e lagomatai. Ko ia ne gagao po kua fehagai ke he falu a matematekelea kua fiafia ke logona e tau kupu totonu mai he kapitiga fakamoli. (Tau Fakatai 12:25; 17:17) He magaaho ka fakaaoga e tautolu e manamanatuaga ke fakakite e mahani totonu ke he tau puhala pihia, kua fakatata e tautolu e molioli he fakaalofa ha tautolu.​—2 Korinito 8:8.

10. Puhala fe ne lagomatai he fakaalofa a tautolu ke fakatokoluga mo e vagahau e kupu moli, pete ni ka nakai mukamuka ke taute pihia?

¹⁰ ‘Kua olioli ke he kupu moli e fakaalofa.’ Ne talahau he taha fakaliliuaga: “Ko e fakaalofa . . . kua kau fiafia mo e kupu moli.” Kua omoi he fakaalofa a tautolu ke fakatokoluga e kupu moli mo e ke “vagahau ai a mutolu mo e kupu moli ko e taha ke he taha.” (Sakaria 8:16) Kaeke, ke fakatai ki ai, kua putoia a ia ne fakahelehele ke he hala kelea lahi, ko e fakaalofa ma Iehova​—mo e ma lautolu ne hehe​—ka lagomatai a tautolu ke pipiki mau ke he tau tutuaga he Atua ka e nakai lali ke fufu, taute e tau fakamolemole, po ke pikopiko foki hagaao ke he mahani hehe ne taute. E, ko e kupu moli he tuaga ia kua liga uka ke talia. Ka e he tokaloto e levekiaga he fakahele ha tautolu, to manako a tautolu ke moua mo e tali atu ke he fakakiteaga he akonakiaga fakaalofa he Atua. (Tau Fakatai 3:​11, 12) Ha ko e tau Kerisiano fakaalofa, kua manako foki a tautolu ke “mahani mitaki ke he tau mena oti kana.”​—Heperu 13:18.

11. Ha kua ‘fua he fakaalofa e tau mena oti,’ ko e heigoa kua lata ia tautolu ke eketaha ke taute hagaao ke he tau kuku he tau katofia talitonu?

¹¹ ‘Kua fua he fakaalofa e tau mena oti.’ Ko e kakano moli he talahauaga ia kua “ufitia ai e tau mena oti.” (Kingdom Interlinear) Ne talahau he 1 Peteru 4:8: “Ko e fakaalofa ke ufiufi ai e tau hala loga.”  E, ko e Kerisiano ne takitaki he fakaalofa kua nakai mafiti ke fakatapakupaku e tau nakai mitaki katoatoa mo e tau kuku oti he tau matakainaga Kerisiano hana. He tau mena loga, ko e tau puleheu mo e tau hehe he tau katofia talitonu kua temotemoai mo e kua maeke ke ufiufi he tapulu he fakaalofa.​—Tau Fakatai 10:12; 17:9.

12. Fakakite fefe he aposetolo ko Paulo kua talitonu a ia ke he mitaki ha Filemoni, mo e heigoa ka ako e tautolu mai he fakafifitakiaga ha Paulo?

¹² ‘Kua talitonu ke he tau mena oti e fakaalofa.’ Ne talahau he fakaliliuaga ha Moffat ko e fakaalofa kua “mafiti tumau ke talitonu ke he tau mena mitaki.” Kua nakai tuaha lahi a tautolu ke he tau katofia talitonu, he fakauaua ke he ha lautolu a tau manatu katoa. Kua lagomatai he fakaalofa a tautolu “ke talitonu ke he tau mena mitaki” ne hagaao ke he tau matakainaga ha tautolu mo e ke tua ki a lautolu. * Mailoga e fakafifitakiaga he tohi ha Paulo ki a Filemoni. Kua tohitohi a Paulo ke fakamafana a Filemoni ke fakafeleveia fakatotonu atu ke he liumaiaga he tupa hola ko Onesemo, nukua eke mo Kerisiano. He nakai lali ke fakaohooho a Filemoni, ne taute e Paulo e olelalo ne fakave ke he fakaalofa. Ne fakakite e ia e mauokafua to taute e Filemoni e mena hako, he talahau: “Kua tohi atu au kia koe ha kua tua ke he hau a omaoma mai, kua iloa e au to eke e koe e tau mena ke mua ke he tau mena kua tala atu ai e au.” (Kupu 21) He magaaho ne omoi he fakaalofa a tautolu ke fakakite e mauokafua pihia ke he tau matakainaga ha tautolu, kua feaki e tautolu ia lautolu e mitaki.

13. Fakakite fefe e tautolu kua manako a tautolu ke he mitaki ma e tau matakainaga ha tautolu?

¹³ ‘Kua amaamanaki ke he tau mena oti e fakaalofa.’ Ha kua falanaki e fakaalofa, ti kua amaamanaki foki. He omoi he fakaalofa, kua manako a tautolu ke moua he tau matakainaga ha tautolu e mitaki. Ke fakatai ki ai, kaeke uta he matakainaga e “lakaaga hehe ato iloa ai e ia,” ne amanaki a tautolu to tali atu a ia ke he tau laliaga fakaalofa ke liuaki mai a ia. (Kalatia 6:1, NW) Kua foaki foki e tautolu e amaamanakiaga ko lautolu ne lolelole ke he tua to malolo. Kua fakauka a tautolu ki a lautolu pihia, he taute e mena kua maeke  ia tautolu ke lagomatai a lautolu ke malolo ke he tua. (Roma 15:1; 1 Tesalonia 5:14) Pete ni ka galo a ia ne fakahelehele, to nakai oti e amaamanaki ha tautolu to moua e ia e lotomatala mo e liu ki a Iehova, ke tuga e tama matahavala he fakataitaiaga ha Iesu.​—Luka 15:​17, 18.

14. Ko e tau puhala fe ka liga kamatamata e fakauka ha tautolu i loto he fakapotopotoaga, mo e to lagomatai fefe he fakaalofa a tautolu ke tali atu?

¹⁴ ‘Kua fakauka ke he tau mena oti e fakaalofa.’ Kua lagomatai he fakauka a tautolu ke tu mauokafua ka fehagaaoaki mo e tau fakahahaku po ke tau mena uka. Kua nakai ni tupu mai hokoia e tau kamatamata he fakauka i fafo he fakapotopotoaga. He falu magaaho, liga to kamatamata a tautolu mai i loto he fakapotopotoaga. Ha ko e nakai mitaki katoatoa, liga fakaokaoka he tau matakainaga ha tautolu a tautolu he falu magaaho. Ko e vagahau fakahanoa kua liga fakatuina aki e tau logonaaga ha tautolu. (Tau Fakatai 12:18) Liga kua nakai taute taha matagahua he fakapotopotoaga ke he puhala ne kua manako a tautolu ki ai. Ko e mahani he matakainaga lilifu kua fakaita, ti taute a tautolu ke manatu, ‘Maeke fefe he Kerisiano ke taute e mena ia?’ Ka fehagai mo e tau tutuaga pihia, to o kehe kia a tautolu mai he fakapotopotoaga mo e oti e fekafekau ki a Iehova? Nakai kaeke ha ha ia tautolu e fakaalofa! E, kua puipui he fakaalofa a tautolu mai he matapouli ke he tau kuku he matakainaga ti nakai kitia e tautolu ha mitaki ia ia po ke he fakapotopotoaga katoa. Kua fakamaeke he fakaalofa a tautolu ke tua fakamoli tumau ke he Atua mo e lalago e fakapotopotoaga pete ko e heigoa ka liga talahau po ke taute he taha tagata nakai mitaki katoatoa foki.​—Salamo 119:​165.

15. Ko e heigoa e mahekeheke kelea, mo e lagomatai fefe he fakaalofa a tautolu ke kalo kehe he logonaaga moumou nei?

¹⁵ “Kua nakai mahekeheke e fakaalofa.” Kua maeke he mahekeheke kelea ke taute a tautolu ke ita tafua ke he tau mena he falu​—ko e tau koloa, tau monuina, po ke hakahakau ha lautolu. Ko e mahekeheke pihia ko e logonaaga fulukovi mo e moumou, nakai taofi, ka faguna e mafola he fakapotopotoaga. Ko e heigoa ka lagomatai a tautolu ke totoko ke he ‘manako lahi ke mahekeheke’? (Iakopo 4:5) Ko e tali, ko e fakaalofa. Kua maeke he fua uho nei ke taute a tautolu ke olioli mo lautolu ne tuga kua moua falu  foliaga he moui ne nakai moua e tautolu. (Roma 12:15) Kua lagomatai he fakaalofa a tautolu ke nakai kitia e mena ia mo mena fakaita fakatagata, he magaaho ka moua he taha tagata e fakahekeaga ha ko e taha mena ne taute po ke taha foliaga mitaki.

16. Kaeke fakaalofa moli a tautolu ke he tau matakainaga ha tautolu, ko e ha kua lata ia tautolu ke kalo kehe he fakahakehake hagaao ke he tau mena ne taute e tautolu he fekafekauaga ha Iehova?

¹⁶ ‘Ti nakai hula mo e nakai fakatokoluga e fakaalofa.’ Kua tautaofi he fakaalofa a tautolu neke fakakite hemu e tau taleni po ke tau mena moua ha tautolu. Kaeke fakaalofa moli a tautolu ke he tau matakainaga ha tautolu, kua maeke fefe a tautolu ke hula tumau hagaao ke he kautu ha tautolu he fekafekauaga po ke ke he tau kotofaaga ha tautolu he fakapotopotoaga? Ko e fakahakehake pihia ka fakalolelole falu, he taute a lautolu ke logona e kiliiku ka fefakatataiaki. Kua nakai fakaata he fakaalofa a tautolu ke hula ke he tau mena ne fakaata he Atua a tautolu ke taute he fekafekauaga hana. (1 Korinito 3:​5-9) Ha ko e mena, kua “nakai fakatokoluga” e fakaalofa, po ke tuga ne talahau he The New Testament in Modern English, kua nakai “feaki e tau manatu fakahakehake ne aoga ni ki a ia.” Kua puipui he fakaalofa a tautolu neke moua e onoonoaga fakahakehake ki a tautolu ni.​—Roma 12:3.

17. Kua omoi he fakaalofa a tautolu ke fakakite e manamanatu fefe ke he falu, mo e heigoa e vahega mahani ka lata ia tautolu ke kalo kehe mai?

¹⁷ ‘Kua nakai mahani fakalialia e fakaalofa.’ Ko e tagata ne mahani fakalialia kua taute e tau mena kelea muitui mo e teteki. Ko e puhala pihia kua nakai fakaalofa, ha kua fakakite e fakaheu lahi ke he tau logonaaga mo e levekiaga he falu. Ke he taha fahi, kua ha ha ai e fakaalofa hofihofi he fakaalofa ne omoi a tautolu ke fakakite e manamanatuaga ke he falu. Kua fakamalolo he fakaalofa e mahani mitaki, mahani faka-Atua, mo e fakalilifu ma e tau katofia talitonu ha tautolu. Ko e mena ia, to nakai fakaata he fakaalofa a tautolu ke putoia ke he ‘mahani fakama’​—e, ko e ha mahani ka fakaofo po ke fakahukia aki e tau matakainaga Kerisiano ha tautolu.​—Efeso 5:​3, 4.

18. Ko e ha kua nakai fakamakamaka e tagata fai fakaalofa ke taute e tau mena oti ke he puhala ni hana?

¹⁸ ‘Nakai kumi he fakaalofa e tau mena ni hana.’ Ne talahau he Revised Standard Version: “Kua nakai fakamakamaka e fakaalofa ke he  puhala ni hana.” Ko e tagata fai fakaalofa kua nakai fakamakamaka ke taute e tau mena oti he puhala hana, ke tuga kua hako tumau hana tau manatu. Kua nakai fakaohooho e ia falu, he fakaaoga e malolo hana ke kautu ki a lautolu ne kehekehe e tau manatu. Ko e ulu kafilo pihia ka fakakite e mahani fakatokoluga, mo e talahau he Tohi Tapu: “Kua mua atu e mahani fakatokoluga ke he malaia.” (Tau Fakatai 16:18) Kaeke fakaalofa moli a tautolu ke he tau matakainaga ha tautolu, to fakalilifu e tautolu e tau manatu ha lautolu, mo e ka lata ai, to fakakite e tautolu e fakamakai ke foaki. Ko e agaga foaki kua fakatatai atu ke he tau kupu ha Paulo: “Aua neke kumi e taha e mitaki hana ni, ka kia takitokotaha mo e kumi e mitaki he falu.”​—1 Korinito 10:24.

19. Lagomatai fefe he fakaalofa a tautolu ke tali atu ka fakaita he falu a tautolu?

¹⁹ ‘Nakai ita noa e fakaalofa mo e nakai toka loto e tau mena ke mamahi ai.’ Kua nakai mukamuka e fakaalofa ke ita noa ke he tau mena ne talahau po ke taute he falu. Moli, ko e mahani pauaki a ia ke ita ka fakaita he falu a tautolu. Ka e pete ni kaeke kua hako e ita ha tautolu, kua nakai toka he fakaalofa a tautolu ke hololoa e ita. (Efeso 4:​26, 27) To nakai toka e tautolu e fakamauaga he tau kupu po ke tau gahua fakahukia, ke tuga fakamau hifo a lautolu ke he tohi ke nakai nimo a lautolu. Kehe mai, kua omoi he fakaalofa a tautolu ke fifitaki e Atua fakaalofa ha tautolu. Tuga ne kitia e tautolu he Veveheaga 26, ne fakamagalo e Iehova ka ha ha ai e kakano mitaki ke taute pihia. Ka fakamagalo e ia a tautolu, kua fakanimo e ia, pehe a ia, kua nakai fakamau e ia e tau hala ha tautolu ke he taha vaha anoiha. Ti nakai kia fakaaue lahi a tautolu he nakai toka loto e Iehova e tau mena ke mamahi ai?

20. Kua lata ke fefe e aga ha tautolu kaeke fakataki he mahani hehe e katofia talitonu ti fua mai e matematekelea?

²⁰ ‘Kua nakai olioli ke he tau mena nakai tututonu e fakaalofa.’ Ne totou he The New English Bible: “Ko e fakaalofa . . . kua nakai fakafiufiu ke he agahala he falu tagata.” Ne talahau he fakaliliuaga ha Moffatt: “Kua nakai fiafia e fakaalofa ka hehe falu.” Kua nakai fiafia e fakaalofa ke he nakai tututonu, ti kua nakai fakakivi atu a tautolu ke he ha vahega he mahani feuaki. Fefe e aga ha tautolu kaeke fakataki he hala e katofia talitonu ti fua mai e matematekelea? To nakai fakaata he fakaalofa a tautolu ke olioli, ke tuga kua talahau  ‘Homo! Lata na ia mo e mena ia!’ (Tau Fakatai 17:5) Ka kua olioli ai a tautolu ka taute he matakainaga ne hehe e tau lakaaga mitaki ke fakamalolo mai he veli fakaagaga hana.

21-23. (a) Ko e heigoa e kakano ha Paulo he magaaho ne talahau e ia “kua nakai kaumahala e fakaalofa”? (e) Ko e heigoa ka tutala ki ai he veveheaga fakahiku?

²¹ “Kua nakai kaumahala e fakaalofa.” Ko e heigoa e kakano he tau kupu ia ha Paulo? Tuga ne kitia he puhala tohi, kua tutala a ia ke he tau mena fakaalofa he agaga ne kua ha ha he tau Kerisiano fakamua atu. Ko e tau mena fakaalofa ia kua eke mo tau fakamailoga kua talia he Atua e fakapotopotoaga fakatu fou. Ka kua nakai maeke e tau Kerisiano oti ke fakamalolo, ke perofeta tuai, po ke vagahau ke he tau vagahau kehekehe. Pete ni ia, nakai ko e taha mena ia; ha ko e tau mena fakaalofa fakamana to fakahiku ni ke  galo. Ka kua fai mena ka tumau, ko e taha mena kua lata he tau Kerisiano oti ke feaki. Kua mua atu e mitaki, mua atu e fakauka, ke he mena fakaalofa fakamana. Ti kua ui ai e Paulo ko e “puhala kua mua he mitaki.” (1 Korinito 12:31) Ko e heigoa e “puhala kua mua he mitaki” nei? Ko e puhala he fakaalofa.

²² Moli ai, ko e fakaalofa faka-Kerisiano ne fakamaama e Paulo “kua nakai kaumahala,” pehe a ia, to nakai fai fakaotiaga. Ke he vaha nei, kua fakakite he fakaalofa fakamatakainaga foaki-noa e tau tutaki ha Iesu. Kua nakai kia kitia e tautolu e fakamoliaga he fakaalofa pihia he fakapotopotoaga he tau tagata tapuaki ha Iehova he lalolagi katoa? Ko e fakaalofa ia to tukulagi, ha kua mavehe e Iehova e moui tukulagi ke he tau fekafekau tua fakamoli hana. (Salamo 37:​9-11, 29) Kia fakatumau a tautolu ke taute e mena kua fahia ia tautolu ke ‘mahani mo e fakaalofa.’ He taute pihia, kua maeke ia tautolu ke mailoga e fiafia mua ue atu ne hau he foaki atu. Mua atu ki ai, kua maeke ia tautolu ke momoui hololoa​—e, ke fakaalofa hololoa​—tukumalagi, ke fakatatai ke he ha tautolu a Atua fakaalofa, ko Iehova.

²³ He veveheaga nei ke fakahiku aki e vala ke he fakaalofa, kua fakatutala a tautolu ke he puhala ka maeke ia tautolu ke fakakite e fakaalofa ko e taha ke he taha. Ka e he mailoga e tau puhala loga ne kua aoga ai a tautolu he fakaalofa ha Iehova​—pihia foki he malolo, fakafili tonu, mo e pulotu hana​—kua lata ia tautolu ke huhu, ‘Maeke fefe au ke fakakite ki a Iehova kua fakaalofa moli au ki a ia?’ Ko e huhu ia to tutala ki ai he veveheaga fakahiku ha tautolu.