FAKAAKOAGA 16
Ko e Heigoa e Gahua ha Iesu he Nofo he Lalolagi?
Tokologa e tagata ne manatu ko Iesu ko e tama mukemuke fakateaga, ko e perofeta iloilo, po ke tagata kua teitei mate. Ka e maeke nakai a tautolu ke fakaako atu foki ki a ia he kumikumi ke he moui haana he nofo he lalolagi? He fakaakoaga nei, to fakatutala a tautolu ke he falu mena aoga lahi ne taute e Iesu mo e puhala kua lauia ai a koe.
1. Ko e heigoa e matapatu gahua ha Iesu?
Ko e matapatu gahua ha Iesu ke “fakamatala . . . e vagahau [tala] mitaki he kautu he Atua.” (Totou Luka 4:43.) Fakamatala e ia e tala mitaki to fakatū he Atua e kautu po ke fakatufono ka utakehe e tau lekua oti he tagata. a Gahua malolō a Iesu ke talahau e fekau mitaki nei ke he tolu mo e hafa e tau.—Mataio 9:35.
2. Ko e heigoa e kakano he tau mana ha Iesu?
Fakamaama he Tohi Tapu loga e “tau mana, mo e tau mena ke ofo ai, mo e tau fakamailoga, ne eke he Atua ki mua ha mutolu kia ia [Iesu].” (Gahua 2:22) Ha ko e malolō he Atua, maeke a Iesu ke tautaofi e matagi, fagai e tokoafe, fakamaulu a lautolu ne gagao, mo e fakaliu tu mai foki a lautolu ne mamate. (Mataio 8:23-27; 14:15-21; Mareko 6:56; Luka 7:11-17) Ko e tau mana ha Iesu kua fakakite mooli kua fakafano mai he Atua a ia. Fakakite foki he tau mana kua ha ha ia Iehova e malolō ke utakehe e tau lekua oti kana ha tautolu.
3. Ko e heigoa ne fakaako e tautolu mai he puhala ne moui a Iesu?
Omaoma a Iesu ki a Iehova he tau mena oti. (Totou Ioane 8:29.) Pete e totokoaga, fakamooli a Iesu he taute e mena ne ole e Matua haana ke taute e ia ke hoko ke he mate. Fakakite e ia kua maeke e tau tagata ke fekafekau ke he Atua pete e tau tuaga uka. Ti toka hifo e Iesu e “fakafifitaki ma [ta]utolu, kia mumui atu [fakatata] ke he hana tau tuagahui.”—1 Peteru 2:21.
KUMIKUMI FAKAHOKULO
Manamanatu ke he puhala ne talahau e Iesu e tala mitaki mo e taute e tau mana.
4. Talahau e Iesu e tala mitaki
Fano hui a Iesu ke he loga e tau maila he tau puhalatū efu ke talahau e tala mitaki ke he tau tagata tokologa. Totou Luka 8:1, ti tutala ke he tau hūhū nei:
-
Fakamatala ni kia a Iesu ke he tau tagata ne fakapotopoto ke fanogonogo ki a ia?
-
Ko e heigoa e laliaga ha Iesu ke kumi e tau tagata?
Talahau tuai he Atua to fakailoa he Mesia e tala mitaki. Totou Isaia 61:1, 2, ti tutala ke he tau hūhū nei:
-
Fakamooli fēfē e Iesu e perofetaaga nei?
-
Lata nakai e tau tagata mogonei ke logona e tala mitaki he manatu haau?
5. Fakaako e Iesu e tau kupu mooli uho
Lafi ke he fakamatala he tala mitaki ke he Kautu he Atua, fakaako e Iesu e tau fakaakoaga kua lagomatai. Manamanatu ke he falu fakataiaga haana he Lauga he Mouga. Totou Mataio 6:14, 34 mo e 7:12, ti tutala ke he tau hūhū nei:
-
Ko e heigoa e fakatonuaga kua lagomatai ne talahau e Iesu he tau kupu tohi nei?
-
Lagomatai agaia nakai e fakatonuaga nei he manatu haau?
6. Taute e Iesu e tau mana
Foaki e Iehova e malolō ki a Iesu ke taute e tau mana loga. Ke kitia e taha fakataiaga, totou Mareko 5:25-34 po ke tā e VITIŌ. Ti tutala ke he tau hūhū nā.
-
He vitiō, ko e heigoa he fifine ne gagao kua talitonu ki ai?
-
Ko e heigoa ne nava a koe ha ko e mana nei?
Totou Ioane 5:36, ti tutala ke he hūhū nei:
-
Ko e heigoa he tau mana nei ha Iesu “kua talahau,” po ke fakamooli hagaao ki a ia?
Iloa nakai e koe?
Laulahi he tau mena ne iloa e tautolu hagaao ki a Iesu kua moua mai he fā e tohi he Tohi Tapu ne fakahigoa ko e tau Evagelia ha Mataio, Mareko, Luka, mo Ioane. Igatia e tagata tohia Evagelia mo e fai vala tala hagaao ki a Iesu. Ko e tau vala tala oti nei kua felauaki mo e moui ha Iesu.
-
MATAIO
ne tohi e Evagelia fakamua. Fakamaama ai e tau fakaakoaga ha Iesu, mua atu ke he talahauaga ha Iesu ke he Kautu he Atua.
-
MAREKO
ne tohi e Evagelia ne mua atu e kū. Talahau ai e tau mena tutupu ofoofogia.
-
LUKA
ne talahau e aoga he liogi mo e puhala ne fehagai a Iesu mo e tau fifine.
-
IOANE
ne lahi e mena ne fakakite ke he aga ha Iesu he talahau e tau fakatutalaaga mo e tau kapitiga tata haana mo e falu foki.
PEHĒ FALU TAGATA: “Ko e tagata mitaki noa ni a Iesu, ti nakai fai mena foki.”
-
Fēfē e manatu haau?
MANATU KATOA
Fakamatala a Iesu hagaao ke he Kautu he Atua, taute e tau mana, mo e omaoma ki a Iehova ke he tau mena oti.
Liu Fakamanatu
-
Ko e heigoa e matapatu gahua ha Iesu he nofo he lalolagi?
-
Ko e heigoa ne fakakite he tau mana ha Iesu?
-
Ko e heigoa e tau fakaakoaga kua lagomatai ne fakamaama e Iesu?
KUMI FOKI
Ko e heigoa e matakupu ne lahi e tutala ha Iesu ki ai?
“Kautu he Atua—Ko e Kakano ki a Iesu” (Ko e Kolo Toko, Novema-Tesemo 2014)
Manamanatu ke he kakano kua talitonu a tautolu na taute mooli e Iesu e tau mana.
“Tau Mana ha Iesu—Heigoa ka Fakaako e Koe?” (Vala tala he Kolo Toko)
Totou e puhala ne hiki e moui he taha tagata he iloa e fakafifitakiaga mitaki ha Iesu.
“Manamanatu Ni Au ki a Au” (Ko e Kolo Toko, Novema-Tesemo 2014)
Kitia e tau matapatu gahua he fekafekauaga ha Iesu ne fakatokatoka fakapapahi.
“Main Events of Jesus’ Earthly Life” (New World Translation of the Holy Scriptures, Appendix A7)
a To fakatutala foki e Fakaakoaga 31-33 ke he Kautu he Atua.
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
