Kghani AboFakazi BakaJehova Bayabandulwa Ukwenza Umsebenzi Wokutjhumayela?

IDLALE

AboFakazi bakaJehova bafumana ibandulo qobe kiyo yoke imikhakha yokuphila komKrestu, ehlanganisa nokwenza umsebenzi wokutjhumayela. Ukutjhumayela nokufundisa iindaba ezimnandi zomBuso kaZimu—msebenzi uJesu ayala abalandeli bakhe bona bawenze. (Matewu 24:14; 28:19, 20) Sifumana ibandulo emihlanganwenethu yaqobe veke nemihlanganweni emikhulu nemincani. AboFakazi bakaJehova abanemithwalo yefanelo ebandleni namkha ehlanganweni bafumana ibandulo elingeziweko eenkolweni ezikhethekileko zeBhayibheli.

Okusesihlokwenesi

Libandulo elinjani elifunyanwa boFakazi bakaJehova?

Imihlangano yebandla. Qobe veke, sihlangana eendaweni esilotjhela kizo ezibizwa ngamaWolo womBuso. Sinemihlangano emibili, omunye siwubamba phakathi neveke omunye ngepela veke. Woke umuntu wamukelekile begodu akuthathwa imali.

Imihlangano yaphakathi kweveke. Sifundiswa ukuthi singayithuthukisa njani indlela esifunda ngayo, indlela yokukhuluma, ukukhuluma tjhatjhalazi, ukutjhumayela nokufundisa. Sibandulwa ngeenkulumo, imikhulumiswano, imiboniso nangamavidiyo. Ibandulweli lisisiza sikghone ukufundisa abanye umyalezo weBhayibheli besithomise neemfundo zeBhayibheli nalabo abanekareko. Nanyana ngubani oza emihlanganwenethu uyazuza ebandulweneli. Ngaphezu kwakho koke, imihlanganwethu iqinisa ukukholelwa kwethu kuZimu nethando lethu ngaye begodu iqinisa nethando lethu nesikholwa nabo.
Imihlangano yangepela veke. Imihlangano le iziingcenye ezimbili, ingcenye yokuthoma yikulumo yeBhayibheli eyenzelwe boke abantu. Ingcenye yesibili kuba sifundo semibuzo neempendulo ezisekelwe esiThaleni esifundwako. a Iinhlokwezi zihlathulula iinkambisolawulo zeBhayibheli, lokhu kusisiza ekuphileni kwethu nemsebenzinethu wokutjhumayela.

Imihlangano emincani nemikhulu. Qobe mnyaka siba nemibuthano emithathu emikhulu, emibuthwaneni le kuhlangana amabandla amanengi. Imibuthano le idzimelela eenhlokweni ezisekelwe eBhayibhelini, kuhlanganise imiboniso, imikhulumiswano namavidiyo. Njengemihlanganwenethu yebandla, imihlangano emincani nemikhulu ithuthukisa ilwazi lethu ngeBhayibheli begodu isisiza sibe batjhumayeli nabafundisi abangcono beendaba ezimnandi. Woke umuntu wamukelekile ukuza begodu akungenwa ngemali.

Iinkolo zeBhayibheli zaboFakazi bakaJehova

Ukuthi aboFakazi bakaJehova bafumane ibandulo elingeziweko, bamenyelwa eenkolweni ezihlukahlukeneko zeBhayibheli. Ngiziphi iinkolwezi? Uyini umnqophazo begodu zithatha isikhathi esingangani? Bobani abaya eenkolwenezi?

Isikolo Samaphayona

Umnqopho: Kubandula labo abatjhumayelako, amaphayona, b ukwenzela bona akghone ukuphumelela nokwenza kuhle emsebenzinabo wokutjhumayela nokufundisa. Isikolwesi sihlanganisa imikhulumiswano ebakhona etlasini, imiboniso neenkulumo, kuhlanganise nengcenye lapho abafundi abakghona ukutjho lokho abakufundileko esikolwenesi.
Sithatha isikhathi esingangani: Amalanga asithandathu.
Kuya abobani: Labo esele baqede umnyakabo wokuthoma baphayona ngibo abamenyelwa esikolwenesi. Labo esele baphayone isikhathi eside, beqele ngale kweminyaka emihlanu nabo bangamenywa bona beze esikolwenesi godu.

Isikolo Sabatjhumayeli Bevangeli Lombuso

Umnqopho: Kunikela ibandulo elikhethekileko kilabo abanelemuko, abatjhumayela isikhathi esizeleko. Abafundi bathuthukisa amakghonwabo wokutjhumayela nokufundisa begodu bafunda iinhloko eziseBhayibhelini ngokungeneleleko. Inengi lalabo abathwaliswa iziqu, bathunyelwa lapho ekunetlhogeko yabatjhumayeli bevangeli khona.
Sithatha isikhathi esingangani: Iinyanga ezimbili.
Kuya abobani: Amaphayona angafaka isibawo sokuya esikolwenesi nange aneemfanelo ezitlhogekako begodu ubujamo bawo buwavumela bona ayokutjhumayela lapha ekunetlhogeko khona.

Isikolo Sabadala Bebandla

Umnqopho: Kusiza abadala c benze imisebenzi abanayo ebandleni, njengokufundisa nokulusa nokudephisa ithando labo ngoZimu nangabafowabo nabodadwabo.—1 Pitrosi 5:2, 3.
Sithatha isikhathi esingangani: Amalanga amahlanu.
Kuya abobani: Labo abasanda ukuba badala kuhlanganise nabadala abanelemuko esele kudlule iminyaka emihlanu bangakayi esikolwenesi bayamenywa bona babekhona.

Isikolo Sababonisi Besigodi Nabomkabo

Umnqopho: Kubandula labo abatjhumayelako abakhamba iindawo ngeendawo, babizwa ngokuthi babonisi besigodi, d kubasiza bakghone ukwenza izabelo zabo kuhle nangendlela ephumelelako. (1 Thimothi 5:17) Isikolwesi sisiza abadala abamaKrestu nabomkabo bafumane ilwazi elingeneleleko ngemiTlolo.
Sithatha isikhathi esingangani: Inyanga yinye.
Kuya abobani: Kuya abasanda ukuba babonisi besigodi baya nabomkabo ngemva kobana sele baqede umnyaka esabelweni sabo. Bangabuyela esikolwenesi godu nasele baqede iminyaka emihlanu.

Isikolo Sekonzo Sombuso

Umnqopho: Kusiza abadala neenceku ezisizako e bakghone ukutlhogomela izinto zebandla ngokuqala izenzakalo zamva nje, ezisematheni nalokho ekutlhogwa babantu bebandleni. (2 Thimothi 3:1) Isikolwesi siba khona ngemva kweminyaka embalwa.
Sithatha isikhathi esingangani: Kuyahluka, esikhathini esinengi sibakhona ilanga linye.
Kuya abobani: Ababonisi besigodi, abadala neenceku ezisizako.

Isikolo Samalunga We-Bethel

Umnqopho: Kusiza amalunga we-Bethel f aphumelele emsebenzinawo adephise nethando lawo ngoZimu bekathandane ngokwawo.
Sithatha isikhathi esingangani: Amalanga amahlanu nesiquntu.
Kuya abobani: Amalunga amatjha we-Bethel kufuze aye esikolwenesi. Laba esele banesikhathi eside bangayi esikolwenesi emnyakeni emihlanu edlulileko bayamenywa ukuthi babekhona godu.

Isikolo SeBhayibheli seGiliyadi

Umnqopho: Kukwenza abafundi bona bathande iliZwi lakaZimu ngokudephileko bebasebenzise lokho abakufundako. (1 Thesalonika 2:13) Amadoda nabafazi abamaKrestu athembekileko abaya eGiliyadi babalisizo khulu ehlanganweni kaJehova nemsebenzini wokufundisa iBhayibheli ephasini loke. Abathweswa iziqu bangafumana isabelo sokuyotjhumayela kwenye inarha namkha base ofisini legatja ababuya kilo.
Sithatha isikhathi esingangani: Iinyanga ezihlanu.
Kuya abobani: Ama-ofisi wegatja amema abatjhumayeli besikhathi esizeleko ukuthi bafake iimbawo. Isikolwesi sibanjelwa e-United States, Watchtower Educational Center e-Patterson, New York.

Isikolo Samalunga Wekomidi Yegatja Nabomkabo

Umnqopho: Kubandula amalunga weKomidi yeGatja g ukuthi akghone ukutlhogomela umsebenzi ose-ofisini legatja kuhlanganise nemisebenzi yaboFakazi bakaJehova etjhideza abantu kuZimu. Lokho bakwenza enarheni i-ofisi legatja elikiyo kuhlanganise nezinye iinarha ekwabelwe kizo i-ofisi legatjelo.
Sithatha isikhathi esingangani: Iinyanga ezimbili.
Kuya abobani: UmziMkhulu waboFakazi bakaJehova ePhasini loke, ukhetha amalunga weKomidi yegatja nabomkabo bona beze esikolwenesi, sibanjelwa e-Watchtower Educational Center e-Patterson, New York.

Ibandulo elinikelwa aboFakazi lisekelwe kuphi?

IBhayibheli yincwadi ephuma phambili aboFakazi bakaJehova abafumana ibandulo kiyo. Sikholelwa ukuthi iBhayibheli litlolwe nguZimu begodu lineenqophiso eziphuma phambili ezithinta ukuphila komKrestu.—2 Thimothi 3:16, 17.

Kghani aboFakazi bakaJehova bayabhadela nabazakuya eenkolwenezi?

Awa. Ifundiso le isimahla. Koke okenziwa boFakazi bakaJehova kusekelwa minikelo yokuzithandela.—2 Korinte 9:7.

a IBhayibheli, iincwadi ezisekelwe eBhayibhelini, amavidiyo koke lokhu kuyafumaneka kuzinzolwazethu i-jw.org.

b Iphayona nguFakazi obhajadisweko osibonelo esihle, onesifiso sokwenza ama-awara athileko qobe nyanga afundisa abantu iBhayibheli.

c Abadala madoda amaKrestu anelemuko navuthiweko afundisa ngemiTlolo bekatlhogomele abantu bakaJehova ngokubasiza nokubakhuthaza. Ababhadelwa ngomsebenzi abawenzako.

d Umbonisi wesigodi utjhumayela isikhathi esizeleko, uvakatjhela amabandla ahlukahlukeneko qobe veke, amabandla asesifundeni abelwe kiso. Ukhuthaza abafowethu nabodadwethu ngokunikela iinkulumo nangokukhamba nabo emsebenzini wokutjhumayela.

e Iinceku ezisizako zisiza abafowabo nabodadwabo ebandleni ngeendlela ezihlukahlukeneko. Lokho kunikela abadala isikhathi esinengi sokufundisa nokwelusa ibandla.

f I-Bethel ligama elinikelwe ama-ofisi wegatja waboFakazi bakaJehova. Abantu abasebenza lapho basekela imisebenzi yaboFakazi abangaphasi kwegatja.

g IKomidi yeGatja inamadoda amathathu namkha ngaphezulu aneemfanelo ezihle nalungele umsebenzi lo.

AboFakazi bakaJehova bazuze njani ebandulweni abalifumanako?

“Ngebanga lokuthi ngineenhloni, ngikufumana kubudisi ukukhuluma nabantu engingabaziko ngeBhayibheli. Nanyana kunjalo, ngebandulo engilifumeneko emihlanganweni yaphakathi neveke, lingisize ngakghona ukuzithemba bengithuthukise nendlela engifundisa ngayo. Ngikufumana kungcono khulu nje ukukhuluma nabantu ebandleni kuhlanganise nalapha engisebenza khona.”—u-Natasha, we-United States.
“Ukuya esiKolweni sabaTjhumayeli beVangeli kungisize ngaba nobuntu bakaZimu njengethando, ukubekezela nomusa. Lokho kungenze ngabamKrestu, umngani nomakhelwana ongcono. Isikolwesi singifundise ukwenza irhubhululo malungana neenhloko zeBhayibheli kuhlanganise nokuthi ngingalihlathula njani iliZwi lakaZimu ngendlela ethinta ihliziyo.”—U-Stephen, we-Nigeria.
“IsiKolo Sabadala Bebandla singisize ngafunda ukuthobeka ekufuze ngibe nakho njengomdala. Iinkulumo zangitjengisa ukuthi kuqakatheke kangangani ukulandela isibonelo sakaJesu.”—U-Luca, we-Italy.
“Isikolo Sekonzo Sombuso singifundise ukuba mumuntu ongenekako, onomusa lokha nangisebenzelana nabanye abantu. Ngifunde nokuthi nangenzela abanye izinto kufuze ngizenze ngethando ingasi ngombana kufuze ngikwenze lokho.”—U-Samuel, e-United Kingdom.
“Isikolo seGiliyadi sisisize sazihlolisisa ngesiboniboni esililiZwi lakaZimu, iBhayibheli. (Jakopo 1:22-25) Sikghonile ukubona ukuthi kukuphi la ekufuze senze amatjhuguluko ebuntwini bethu nendleleni esisebenzela ngayo uJehova. Sifunde ukuthi kufuze sibeke abanye qangi kunathi besivumele ithando kube ngilo elisinqophisako kilokho esikwenzako nesikutjhoko.”—U-Elnathan no-Princess, be-Philippines.