Abanye abantu bayazibuza ukuthi kghani iliZwi lakaZimu elitloliweko litjhugululiwe. Umphorofidi u-Isaya wathi ilizwi lakaZimu “lijame ngokungapheliko.” (Isaya 40:8) Singaqiniseka njani ukuthi iinthembiso zakaZimu zidluliselwe ngendlela enembileko?

UZimu unamandla wokubulunga iliZwi lakhe nokulivikela bona lingasilaphazwa. Ekadeni nakwenziwa amakhophi walo atlolwe ngesandla, abakopululi bathatha iledere ngalinye lomtlolo ocwengileko njengombana linjalo akhenge bangezelele, batjhugulule namkha bakhuphe okhunye. Nanyana kunjalo, ngebanga lokuthi abantu banesono, yeke kunemitjhapho emincani abanye abakopululi abayenzileko.

Kuneenkulungwana zamakhophi wemiTlolo eCwengileko yekadeni etlolwe ngesandla. Nangabe ikhophi yinye ihluke kancani, ingamadaniswa namanye amakhophi ukubona lapha kunomtjhapho khona. Bona ufunde okwengeziweko, qala isihloko esithi, “Has the Bible Been Changed or Tampered With?” ku-jw.org.

Ngokwesibonelo, akhucabange ngeencwadi zekadeni ezibizwa ngokuthi Misongo yeLwandle eliFileko, eyafunyanwa ma-bedouins emarholweni aseduze neLwandle eliFileko ngo-1947. Imitlolo yekadeni le ineengcenye zemiTlolo eCwengileko eneminyaka engaphezu kweenkulungwana ezimbili. Izazi zimadanise imitlolo yekadeni etlolwe ngesandla le nemiTlolo eCwengileko esinayo namhlanjesi. Zifumeneni?

Izazi zifumene ukuthi okumumethwe liliZwi lakaZimu esinalo namhlanjesi kufana patsi nemitlolo yekuthomeni. * Ukuhlolwa kwemitlolo etlolwe ngezandla emidala kufakazela ukuthi lokhu esikufunda emiTlolweni eCwengileko kumlayezo kaZimu wekuthomeni. Singaqiniseka ukuthi uZimu usibulungele imiTlolo eCwengileko enembileko namhlanjesi.

Nje-ke singafunda iliZwi lakaZimu sinethemba begodu siqiniseka ukuthi linembile. Sicabanga ngalokho, akhesihlole lokho esingakufunda ngoZimu ebaphorofidini bakhe.