Singabatjengisa Njani Abanye Abantu Ukuthi Siyabathanda?
Njengombana siziinzukulwana zomuntu wokuthoma u-Adamu, soke simndeni munye. Ngitjho nanyana amalunga womndeni kulindeleke bona athandane begodu ahloniphane, akusilula ukufumana ithando elinjalo namhlanjesi. Lokhu akusikho ebekufunwa nguZimethu osithandako.
LOKHO OKUTJHIWO MITLOLO ECWENGILEKO NGETHANDO
“Thanda umakhelwanakho njengombana uzithanda wena.”—LEVITIKUSI 19:18.
“Ragelani phambili nithanda izitha zenu.”—MATEWU 5:44.
KUTJHO UKUTHINI UKUTHANDA ABANTU?
Tjheja bona uZimu ulihlathulula njani ithando eliZwini lakhe kweyo-1 Korinte 13:4-7:
“Ithando liyabekezela begodu linomusa.”
Cabanga ngalokhu: Uzizwa njani abanye nabakubekezelelako, banomusa kuwe begodu bangakupheleli ihliziyo nawenza imitjhapho?
“Ithando alinamona.”
Cabanga ngalokhu: Uzizwa njani abanye nabangakuthembi namkha bakumonakalela?
Ithando “alizifuneli inzuzo yalo.”
Cabanga ngalokhu: Uzizwa njani abanye nabazimisela ukuhlonipha imibonwakho begodu bangakateleli imibonwabo kuwe?
Ithando “alinamavunda.”
Cabanga ngalokhu: UZimu uzimisele ukulibalela abantu abonileko kodwana ngemva kwalokho baphenduka. “Akahlali asola; akanghaleli kwasafuthi.” (IRhubo 103:9) Siyathaba lokha umuntu esimonileko asilibalela. Nje-ke nathi kufuze sihlale sikulungele ukulibalela abanye.—IRhubo 86:5.
Ithando “alithokoziswa bubumbi.”
Cabanga ngalokhu: Asithandi abantu nabathaba ngento embi esiveleleko. Nje-ke asithabi lokha abanye nabavelelwa zizinto ezibuhlungu ngitjho nanyana bakhe basiphatha kumbi.
Bona sithabele iimbusiso ezivela kuZimu, kufuze sithande abanye ngeendlela lezi kungakhathaliseki bona bobani. Indlela esingakwenza ngayo lokhu, kusiza abatlhogako.
