UJesu—Kubayini Ahlongakala?
UJesu—Kubayini Ahlongakala?
‘INdodana yomuntu yeza bona . . . inikele ipilo yayo ibe yihlawulo yabanengi.’—MARKOSI 10:45.
UJESU bekazi bona kuzokwenzekani kuye. Bekazi bona bekangekhe aphile ngokuthula. Kunalokho, bekazi bona ukuphila kwakhe bekuzokuquntwa kabuhlungu isikhatjhana nekasesemnyakeni yama-30, begodu bekakuhlomele ngokuzeleko ukuqalana nakho.
IBhayibhili liveza ukuqakatheka okukhulu kokuhlongakala kwakaJesu. Okhunye ukwaziswa kuthi ukuhlongakala kwakaJesu kukhulunywa ngakho ngokunqophileko iinkhathi ezingaba li-175 eMitlolweni YamaKrestu YesiGirigi, namtjhana eTestamendeni Elitjha. Nokho, kubayini uJesu kwafuze atlhage bekahlongakale? Kufuze sazi, ngombana ukuhlongakala kwakaJesu kungaba nomthelela ekuphileni kwethu.
▪ Egade uJesu akulindele Hlangana nomnyaka wamaswaphela wokuphila kwakhe, uJesu wayelelisa abafundi bakhe kambadlwana ngokutlhaga nokuhlongakala ebekumlindeleko. Endleleni eya eJerusalema ukuyogidinga iPhasika lakhe lamaswaphela, watjela abafundi bakhe aba-12 bona: “INdodana yoMuntu izanikelwa ebapristini abakhulu nebafundisini bomthetho. Bona bazayahlulela ekufeni, bayinikele ebaqhamukini. Abantwabo bazayiyewula, bayikhafulele, bayibethe, bayibulale.” * (Markosi 10:33, 34) Kubayini bekaqiniseka ngalokho ebekuzokwenzeka kuye?
UJesu bekajayelene neemporofido ezinengi eziseMitlolweni yesiHebheru ezabikezela ngokobana ukuphila kwakhe bekuzokuphela njani. (Luka 18:31-33) Cabangela ezinye zeemporofido neMitlolo ehlathulula bona zazaliseka njani.
UMesiya . . .
▪ Uzokukghaphelwa ngeempaparwana ezima-30 zesilivere.—ZAKARIYA 11:12; MATEWU 26:14-16.
▪ Uzokubethwa begodu akhafulelwe.—ISAYA 50:6; MATEWU 26:67; 27:26, 30.
▪ Uzokubethelwa.—IRHALANI 22:16; MARKOSI 15:24, 25.
▪ Uzokuthukwa asesigodweni.—IRHALANI 22:7, 8; MATEWU 27:39-43.
▪ Uzokubulawa ngaphandle kokuphula nalinye lamathambakhe.—IRHALANI 34:20; JWANISI 19:33, 36.
UJesu wazizalisa iimporofidwezi nezinye ezinengi. Akunakwenzeka bona bekangakwenza yedwana lokhu. Ukuzaliseka kwazo zoke iimporofidwezi kuJesu kufakazela bona kwamambala, wathunywa nguZimu. *
Nokho, kubayini bekutlhogeka uJesu atlhage begodu ahlongakale?
▪ UJesu wafa bona ararulule iimpikiswano eziqakathekileko UJesu bekazazi iimpikiswano eziqakathekileko zeendawo yoke ezaphakanyiswa esimini ye-Edeni. Ngebanga lomthelela wesibunjwa somoya esivukelako, u-Adamu no-Efa bakhetha ukungalaleli uZimu. Ukuhlubuka kwesibilesi kwaphakamisa iimbuzo ngokulunga kobukhosi bakaZimu, namtjhana indlela abusa ngayo. Isono sabo saphakamisa nombuzo wokobana ukhona na umuntu ongathembeka kuZimu ngitjho aqalene neenlingo.—Genesisi 3:1-6; Jobhi 2:1-5.
UJesu wanikela iimpendulo ezinamandla kinazo zoke ebezinganikelwa kizo zombili iimpikiswanezi—ubukhosi bakaJehova nokuthembeka kwabantu. Ngokulalela ngokupheleleko ‘kufikela ekufeni kwakhe esigodweni sokutlhoriswa,’ uJesu waphakamisa ubukhosi bakaZimu. (Filipi 2:8) Godu uJesu watjengisa bona umuntu opheleleko angathembeka ngokupheleleko kuZimu ngitjho angaqalana neenlingo ezibudisi ukuzidlula zoke.
▪ UJesu wafela ukuhlenga isintu Umporofidi u-Isaya wabikezela bona ukutlhaga nokufa kwakaMesiya othenjisiweko kuzokuba sihlengo sezono zabantu. (Isaya 53:5, 10) UJesu bekakwazi ngokukhanyako lokho, begodu ngokuzithandela wanikela ‘ngepilo yakhe ukuphulusa abanengi.’ (Matewu 20:28) Ukufa kwakhe okumhlatjelo kwavula indlela yokobana abantu abanesono babe nobuhlobo obuhle noJehova, bahlengwe esonweni nekufeni. Ukufa kwakaJesu kwasivulela ithuba lokufumana lokho okwalahlekela u-Adamu no-Efa—ithemba lokuphila okungapheliko ebujamweni obupheleleko ephasini. *—ISambulo 21:3, 4.
▪ Lokho ongakwenza Erhelweni leenhlokwezi, sihlole lokho iBhayibhili ekutjhoko ngoJesu—lapho avela khona, indlela aphila ngayo, nokobana kubayini ahlongakala. Ukwazi amaqiniso lawo ngoJesu kwenza okungaphezu kokulungisa iimbono ephambeneko ngaye. Ukwenza ngokuvumelana nawo kungasilethela iimbusiso—ukuphila okubhedere kwanjesi nokuphila okungapheliko esikhathini esizako. IBhayibhili isitjela okutlhogeka sikwenze ukufumana iinzuzo ezinjalo.
▪ Funda okungeziweko ngoJesu Krestu nendimakhe eemnqophweni kaJehova.—JWANISI 17:3.
▪ Tjengisa ikholo kuJesu, utjengise ngendlela ophila ngayo bona umamukela njengoMphulusi wakho.—JWANISI 3:36; IZENZO 5:31.
AboFakazi BakaJehova bangakuthabela ukukurhelebha bona ufunde okungeziweko ngoJesu Krestu, ‘iNdodana kaZimu okukuphela kwayo,’ ngayo esingafumana ukuphila “okungapheliko.”—Jwanisi 3:16.
[Imitlolo yaphasi]
^ isig. 5 UJesu kanengi bekaqalisa kuye ‘njengeNdodana yomuntu.’ (Matewu 8:20) Amezwi la atjengisa bona bekangasimumuntu kwaphela kodwana godu ‘bekayindodana yomuntu’ okukhulunywa ngayo esiporofidweni seBhayibhili.—Danyela 7:13, 14.
^ isig. 13 Ukufumana imininingwana ngeemporofido ezazaliseka ngoJesu, qala isithasiselo esinesihloko esithi, “UJesu Krestu—NguMesiya Othenjisiweko” encwadini ethi Khuyini Kwamambala Okufundiswa YiBhayibhili? egadangiswe boFakazi BakaJehova.
^ isig. 17 Ukufunda okungeziweko ngokuqakatheka kokufa kwakaJesu okumhlatjelo, qala isahluko-5 esithi, “Isihlengo—Sisipho SakaZimu Esikhulu,” encwadini ethi Khuyini Kwamambala Okufundiswa YiBhayibhili?