IBhayibheli ithi, “Nakubusa isikhohlakali, abantu bayabubula.”​—IzAga 29:2.

Umlando uzele ngababusi ababusa ngelunya, baletha umtlhago ezakhamuzini zabo. Liqiniso, akusibo boke ababusi abanjalo. Abanye kungenzeka babe neenhloso ezihle ngabanye abantu. Nokho, nebasemandleni wokubusa, ngokuvamileko bafumana bona imizamwabo ihlangahlanganiswa kukulwa nephaliswano lokubusa. Godu bangasebenzisa amandlabo kumbi bonyana kuzuze bona, kulimaze abantu. Ogade anguNobhala womBuso we-U.S uHenry Kissinger wathi: “Umlando uyindaba yemizamo yokubhalelwa, yeemfiso ezingakatjhejwa.”

IBhayibheli godu ithi: “Akusisemuntwini ukuzikhambela nokunqophisa amagadangwakhe.” (Joromiya 10:23) Abantu abangakapheleli abanakho ukuhlakanipha nelemuko elitlhogekako lokulungisa zoke iindaba zabo ngokuphumelelako. Nengabe abantu angeze bakghona ukunqophisa amagadangwabo, bangakghona njani ukunqophisa isitjhaba? Uyabona na bona kubayini ababusi ababantu banganalo ikghono lokuphelisa umtlhago? Eqinisweni, kanengi urhulumende omumbi, nofana ububusi, bungunobangela womtlhago!

UJesu wathi, “Ngalokhu boke abantu bazakwazi bona nibafundi bami, nanithandanako.”​—Jwanisi 13:35.

Abadosiphambili bazo zoke iinkolo namasondo batjhumayela ngethando nobunye. Iqiniso kukobana babhalelwe kudzimelelisa ithando eliqine ngokwaneleko kubalandeli babo lokuphelisa ibandlululo. Kunokobana isize ukuhlawulela ithando, ikolo kanengi inomthelela ekubangeni ukuhlukana, ibandlululo nemiraro ebantwini neenqhemeni zeentjhaba. Ekuphetheni incwadakhe ethi, Christianity and the World Religions, isazi uHans Küng satlola: “Ukulwa okukhulu kwezepolotiki nokunelunya, ngilokho okukhuthazwa nokugunyazwa yikolo.”

Ngaphezu kwalokho, abafundisi abanengi beenkolo bakhuthaza ubuhlobo bomseme ngaphambi komtjhado nobuhlobo bomseme nomuntu ongakatjhadi naye nobutabani. Lokhu kudosele ekurhatjhekeni kwamalwelwe, ukurhulula imibungu, ukuzithwala okungafunwa, nokubhidliza imitjhado nemindeni, kuletha ubuhlungu nesizi.

“Kodwana loyo naloyo ulingwa, adoswe ziinkanuko zakhe abe ayengeke. Yeke ikanuko nesele ibambile, izala isono.”​—Jakopo 1:14, 15.

Soke, ngebanga lokungapheleli esakuzuzako, sitjhigamele ekwenzeni imitjhapho begodu kufuze silwisane nesifiso “sokwenza izinto ezithandwa yinyama.” (Efesu 2:3, NW) Nokho, lokha isifiso esingakalungi nesifumana ithuba, kungaba budisi ukulwisana naso. Nesizinikela esifisweni esilimazako, umphumela ungaba ngozwisa ubuhlungu.

Umtloli uP. D. Mehta watlola: “Umtlhago omkhulu ubangelwa ziimfiso zethu, ukufuna kwethu ithabo elinganamkhawulo, ukwenza izinto esizithandako, ukuba marhamaru nokuvelela.” Iimfiso nokuba ziingqila zayo yoke imihlobo​—utjwala, iindakamizwa, ukugembula, ubuhlobo bomseme nokhunye​—kulimaze abanengi “abahlonitjhwako emphakathini” begodu kulethe umtlhago emindeninabo, ebanganini nakwabanye. Ngokombono wabantu wokungapheleli, kufuze sivumelane neBhayibheli nelithi: “Siyazi bona yoke indalo beyiquma inemirhelo bekube kunjesi.”​—Roma 8:22, The New Testament in Modern English, kaJ. B. Phillips.

IBhayibheli iveza uSathana bona ‘nguzimu wesikhathesi’ begodu usebenzisana namandla wemimoya emimbi ebizwa bona madimoni.​—2 Korinte 4:4; IsAmbulo 12:9.

NjengoSathana, amadimoni amajadu ekulawuleni nokukhohlisa abantu. Umpostoli uPowula uvumelana nalokho nekathi: “Asibindani nenyama neengazi, kodwana sibindana nababusi, iimphathimandla, imibuso yephasi elisemnyameneli kanye nemibutho yemimoya emimbi esemkayini.”​—Efesu 6:12.

Njengombana amadimoni akuthabela ukutlhorisa abantu, lokhu akusimnqopho wawo oyihloko. Isifiso sawo kukwenza abantu babe kude noZimu oPhezukoke, uJehova. (IRhubo 83:19 [83:18, NW]) Imikghwa enjengokubhula ngeenkwekwezi, umlingo, ubuloyi nokubikezela ngekusasa ngezinye zezinto amadimoni azisebenzisako ukukhohlisa nokulawula abantu. Kungebangelo uJehova asiyelelisa ngeengozezi begodu ubanikela isivikelo boke abaphikisana noSathana namadimoni.​—Jakopo 4:7.

Eminyakeni eziinkulungwana eembili edlulileko, iBhayibheli yabikezela: “Yazi lokhu bona ngemihla yokuphela kuzokufika iinkhathi ezibudisi kwamambala.”

Iveza lokho okwenza iinkhathi zibe budisi, iragela phambili ithi: “Abantu bazakuba ngabazithandako, abathanda imali, abazikhukhumezako, abazigqajako, . . . abanganathando, abangavumi ukubuyisana, abahlebako, abangazigobiko, abakhohlakeleko, abahloye okuhle, abakhaphelako, abawalazelako, abazitjhayako, abathanda injabulo kunobanyana bathande uZimu.” Kwamambala ibanga eliyihloko lawo woke umtlhago esiwubona namhlanjesi kukobana siphila ‘emihleni yokuphela.’​—2 Thimothi 3:1-4.

Ukubuyekeza amaqiniso esicoce ngawo, kuyakhanya bona kubayini abantu bangeze bakghona ukuphelisa umtlhago, naphezu kweenhloso zabo ezihle? Ngalokho, singalifumanaphi isizo? Kufuze siqale kumBumbi wethu, othembise ‘ukugiriza imisebenzi kaSathana.’ (1 Jwanisi 3:8) Isihloko esilandelako sizokucoca ngalokho uZimu azokwenza bona aphelise woke umtlhago.