Amavidiyo adlalwa emihlanganwenethu emikhulu athinta iinhliziyo zethu begodu asisize sikuzwisise ngcono okufundiswa miTlolo. Umhlangano wesiFunda wango-2020 othi “Hlalani Nithabile”! unamavidiyo ali-114, kuhlanganise neenkulumo ezi-43 ezibekwa malunga wesiHlopha esiBusako nabasizi baso. Khewazibuza ukuthi kutlhogeka umsebenzi ongangani begodu kubiza imali engangani ukwenza amavidiyo la?

 Abafowethu nabodadwethu abangaba ma-900 abavela ephasini loke banikele ngesikhathi nangamakghonwabo bona basize emsebenzini lo. Baboke, kubathethe ama-awara angaba zii-100 000 phakathi nesikhathi esingaba minyaka emibili ukwenza umsebenzi lo. Lokhu kuhlanganisa nama-awara azii-70 000 wokwenza idrama yeBhayibheli ethi UNerhemiya: “Ukwenama Enikuphiwa [NguJehova] Kumamandlenu” edlala imizuzu ema-76.

 Njengombana ungacabanga, ukutlhogomela amavolontiya azinikeleko la, kuhlanganise nemitjhini nendawo yokwenzela umsebenzi lo kubandakanya iindleko ezithe tjha.

 UJared Gossman osebenza emNyangweni wezamaVidiyo nemiDumo uthi, “IKomidi yezokuFundisa ifuna bona amavidiyo la aveze amasiko ahlukahlukeneko begodu atjhudelwe eendaweni ezingafaniko. Lokho kwenza bona sikwazi ukuveza kuhle ukuthi siyihlangano yephasi loke. Bona kwenziwe lokho, iinqhema ezi-24 eenarheni ezili-11 zabambisana ukwenza umsebenzi lo. Kutlhoga imali engangemali ukuhlela umsebenzi lo owenziwa ziinsebenzi ezivela ephasini loke.”

 Amavidiyo wethu amanengi atlhoga bona sisebenzise imitjhini neendawo ezikhethekileko. Ngokwesibonelo, kwakhiwa iindawo ezikhethekileko bona kutjhudwe ividiyo ethi UNerhemiya: “Ukwenama Enikuphiwa [NguJehova] Kumamandlenu” esitudiyo se-Mt. Ebo eduze nePatterson, eNew York, e-U.S.A. Bona bayisebenzise kuhle iminikelo kodwana benze idrama le ivumelane nesikhathi ekhuluma ngaso, abofowethu bakha amaboda alula afana namaboda weJerusalema lakade. Amaboda lawo enziwa ngekhuni begodu bewamamitha asithandathu ubude, asindwa ngedaka eliwenza abonakale ngathi maboda wamatje. “Amaboda” lawo asetjenziswe eenqetjhini ezihlukahlukeneko zedrama, okuphungule inani lezinto okufuze zenziwe. Nanyana kunjalo, kwatlhogeka imali engaba maranda asigidi nesiquntu bona kwakhiwe indawo yokutjhudela idrama kwaphela. a

 Ukwazi lokhu kwenza siwuthabele khudlwana umhlangano wesifunda wanonyaka. Siyaqiniseka ukuthi okwenziweko bona umhlangano lo ube yipumelelo kuletha idumo ebizweni lakaJehova ephasini loke. Siyathokoza ngokunikela kwenu ngesandla esivulekileko emsebenzini wephasi loke ku-donate.pr2711.com nangezinye iindlela.