Yokuthoma YamaKhosi 20:1-43
20 Ikosi yeSiriya+ uBhen-Hadadi+ yabuthelela ibutho layo loke kuhlanganise namanye amakhosi ama-32 kunye neenjomani neenkarana zawo; yakhuphukela eSamariya+ yalivimbezela+ begodu yalwa nalo.
2 Yathumela iinthunywa edorobheni ku-Arhabi+ iKosi yakwa-Israyeli, yathi kuye: “UBhen-Hadadi uthi,
3 ‘Isiliva negolide lakho ngekwami, kuhlanganise nabafazi bakho abahle khulu namadodanakho.’”
4 Ikosi yakwa-Israyeli yaphendula yathi: “Akwenzeke njengombana utjhwile kosami, ngingowakho begodu koke okungekwami ngekwakho.”+
5 Kamuva iinthunywa zabuya zathi: “UBhen-Hadadi uthi, ‘Ngakuthumela umlayezo othi: “Uzonginikela isiliva lakho, igolide lakho, abafazi bakho namadodanakho.”
6 Kodwana ngesikhathesi kusasa ngizokuthumela iinsebenzi zami kuwe, zizoyihlolisisa kuhle indlwakho nezindlu zeensebenzi zakho, zithathe zoke izinto zakho eziligugu zikhambe nazo.’”
7 Khonokho ikosi yakwa-Israyeli yabiza boke abadala benarha yathi: “Ngibawa nitjheje begodu nibone ukuthi umrhali lo uzimisele ukuletha ihlekelele ngombana wathi ufuna abafazi bami, amadodanami, isiliva lami negolide lami, ngavuma.”
8 Boke abadala nabo boke abantu bathi kuye: “Ungamlaleli, ungayivumi intweleyo.”
9 Waphendula iinthunywa zakaBhen-Hadadi wathi: “Nithi ekosinami, ‘Koke okukhulume ekuthomeni isisebenzi sakho sizokwenza kodwana lokhu angekhe ngakwenza.’” Zakhamba-ke iinthunywa zayokubikela uBhen-Hadadi.
10 Nje-ke uBhen-Hadadi wamthumela umlayezo othi: “Kwanga abozimu bangangihlunguphaza khulu nange kungasala ihlabathi eyaneleko eSamariya bona nginikele ngamunye wabantu abangilandelako ihlabathi engazala isandla!”
11 Ikosi yakwa-Israyeli yaphendula yathi: “Mtjeleni ukuthi, ‘Loyo ombatha izambatho zakhe zepi angazikhakhazisi njengaloyo ozihlubulako.’”+
12 Kwathi ipendulo le nayifika eendlebeni zayo, ngesikhathi yena namakhosi basasela ematendenabo, wathi eensebenzini zakhe: “Lungelani ukusahlela!” Yeke balungela ukusahlela idorobho.
13 Kodwana umphorofidi othileko waya eKosini yakwa-Israyeli u-Arhabi+ wathi: “UJehova uthi, ‘Usibonile na soke isiqubuthu esikhulwesi? Ngisinikela esandleni sakho namhlanjesi, ngemva kwalokho uzokwazi ukuthi nginguJehova.’”+
14 U-Arhabi wambuza wathi: “Kuzokwenziwa ngubani lokho?” Wamphendula wathi: “UJehova uthi, ‘Basizi bamakhosana weemfunda.’” Yeke wambuza wathi: “Ngubani ozokuthoma ipi?” Wamphendula wathi: “Nguwe!”
15 Yeke u-Arhabi wabala boke abasizi bamakhosana weemfunda, isibalo sabo saba ma-232; ngemva kwalokho wabala woke amasotja wakwa-Israyeli isibalo sawo saba zi-7 000.
16 Baphuma emini ekulu ngesikhathi uBhen-Hadadi arhiribidela utjwala ematendeni namakhosi ebewamsiza ama-32.
17 Abasizi bamakhosana weemfunda baphuma qangi, msinyana uBhen-Hadadi wathumela iinthunywa. Zambikela zathi: “Kuphume amadoda avela eSamariya.”
18 Waphendula wathi: “Nangabe beze ngokuthula, babambeni nize nabo baphila ngitjho nanyana beze ngepi, babambeni nize nabo baphila.”
19 Kodwana kwathi abasizi bamakhosana weemfunda namabutho abalandelako nabaphuma edorobheni
20 ngamunye wabulala alwa naye. Yeke amaSiriya abaleka,+ ama-Israyeli awagijimisa kodwana iKosi yeSiriya uBhen-Hadadi yaphunyurha ikhwele iinjomani namanye amadoda akhwele iinjomani.
21 Kodwana ikosi yakwa-Israyeli yaphuma, yabulala amanaba ebewakhwele iinjomani neenkarana, kwaba kukhulu ukuhlula kwayo phezu kwamaSiriya.
22 Ngokukhamba kwesikhathi umphorofidi+ loya, weza ekosini yakwa-Israyeli wathi kiyo: “Khamba, uziqinise bewucabange ukuthi uzokwenzani,+ ngombana ekuthomeni komnyaka ozako* ikosi yeSiriya izokukhuphuka izokulwa nawe.”+
23 Nje-ke iinsebenzi zekosi yeSiriya zathi kiyo: “UZimabo nguZimu weentaba. Kungakho basihlulile. Kodwana nasingalwa nabo enarheni ethabaleleko sizobahlula.
24 Nakhu okhunye okufuze ukwenze: Susa woke amakhosi+ eendaweni zawo, uwajamiselele ngababusi.
25 Ngemva kwalokho buthelela ibutho elilingana patsi nebutho olilobileko, injomani ngenjomani nekarana ngekarana. Asilwe nabo enarheni ethabaleleko nakanjani sizobahlula.” Wasilalela iseluleko sabo wenza njalo.
26 Ekuthomeni komnyaka* uBhen-Hadadi wabuthelela amaSiriya wakhuphukela e-Afeki+ wayokulwa no-Israyeli.
27 Abantu bakwa-Israyeli nabo babuthelelwa, bebanikelwa abakutlhogako, baphuma bayokuhlangana nabo. Kwathi abantu bakwa-Israyeli nabahloma ikampabo phambi kwabo, baba njengomhlanjana weembuzi, khisibe amaSiriya azele inarha yoke.+
28 Yeke umuntu kaZimu weqiniso waya ekosini yakwa-Israyeli wathi: “UJehova uthi, ‘Ngebanga lokuthi amaSiriya athe: “UJehova nguZimu weentaba, akasinguZimu wenarha ethabaleleko,” ngizokunikela soke isiqubuthu esikhulwesi esandleni sakho,+ kwamambala uzokwazi ukuthi nginguJehova.’”+
29 Basolo baseenkampeni eziqaleneko amalanga alikhomba, ngelanga lekhomba ipi yasuka. Abantu bakwa-Israyeli babulala amasotja wamaSiriya akhamba ngeenyawo azi-100 000 ngelanga linye.
30 Abaphunyurhileko babalekela e-Afeki+ bangena ngedorobheni. Kodwana iboda lawela phezu kwamadoda aseleko azi-27 000. UBhen-Hadadi naye wabaleka wangena ngedorobheni, wabhaca ekumbeni efihlekileko.
31 Kodwana iinsebenzi zakhe zathi kuye: “Qala! Sizwe ukuthi amakhosi wendlu ka-Israyeli makhosi anesirhawu. Yeke sibawa usivumele simbathe imigodla emadinini, sitantele iinhloko zethu ngeenrobho siphume siye ekosini yakwa-Israyeli. Kungenzeka ingakubulali.”+
32 Yeke bambatha imigodla emadininabo, batantela iinhloko zabo ngeenrobho bese bangena ekosini yakwa-Israyeli bathi: “Isisebenzi sakho uBhen-Hadadi sithi, ‘Ngibawa ungangibulali.’” Yaphendula yathi: “Kghani usaphila? Phela indoda leyo mfowethu.”
33 Amadoda lawo athatha amezwi layo njengetshwayo begodu alikholwa msinyana ilizwi lakhe, yeke athi: “Mbala uBhen-Hadadi mfowenu.” Yena wathi: “Khambani niyomthatha.” UBhen-Hadadi waphuma waya kuye, yena-ke wamkhweza ekaraneni.
34 Nje-ke uBhen-Hadadi wathi kuye: “Amadorobho ubaba awathatha kuyihlo ngizowabuyisa begodu uzozivulela amatatawu wokuthengisela eDamaseku njengombana ubaba enza eSamariya.”
U-Arhabi waphendula wathi: “Ngesisekelo sesivumelwanesi, ngizokulisa ukhambe.”
Ngokunjalo wenza isivumelwano naye wamlisa wakhamba.
35 Ngelizwi lakaJehova, omunye wamadodana wabaphorofidi*+ wathi kumkhambisanakhe: “Ngibawa ungibethe.” Kodwana indoda leyo yala ukumbetha.
36 Yeke wathi kiyo: “Ngebanga lokuthi azange ulalele ilizwi lakaJehova, msinyana ngemva kokuhlukana nami uzokubulawa libhubezi.” Ngemva kokuhlukana naye, kwafika ibhubezi lambhudungela lambulala.
37 Wahlangana nenye indoda wathi kiyo: “Ngibawa ungibethe.” Indoda leyo yambetha yamlimaza.
38 Ngemva kwalokho, umphorofidi loyo wakhamba wayokulinda ikosi eqadi kwendlela kodwana wazifihla ukuthi ungubani ngokuzitantela ngebhanditjhi emehlweni.
39 Kwathi ikosi nayidlulako, warhuwelela wathi ekosini: “Isisebenzi sakho sangena phakathi kwepi ibambene ngeenhluthu begodu bekunomuntu ophumako owaletha umuntu kimi wathi, ‘Gada umuntu lo. Nangingamfumana angekho, ukuphila kwakho kuzokuthatha isikhundla sokuphila kwakhe+ namkha uzokubhadela italende* lesiliva.’
40 Kodwana kwathi isisebenzi sakho nasisatinazela ngalokhu nalokhuya, phunyurhiyani umuntu loya.” Ikosi yakwa-Israyeli yathi kuye: “Akube njengesahlulelo sakho; uzenzele wena isiqunto.”
41 Msinyana wakhupha ibhanditjhi esemehlwenakhe, ikosi yakwa-Israyeli yabona ukuthi ungomunye wabaphorofidi.+
42 Wathi kuye: “UJehova uthi, ‘Ngebanga lokuthi uvumele umuntu ebengithe kufuze arhayilwe waphunyurha esandleni sakho,+ ukuphila kwakho kuzokuthatha isikhundla sokuphila kwakhe+ nabantu bakho bazokuthatha isikhundla sabantu bakhe.’”+
43 Ngalokho ikosi yakwa-Israyeli yabuyela ekhaya eSamariya,+ iphele amandla begodu idanile.
Imitlolo Ephasi
^ Kutjho ngetwasahlobo elandelako.
^ Kutjho etwasahlobo.
^ Amezwi athi ‘amadodana wabaphorofidi’ kubonakala ngasuthi aqalisele esikolweni sokufundisa abaphorofidi namkha ehlanganweni yabaphorofidi.
^ Italende beyilingana namakhilogremu ayi-34.2. Qala Isith. B14.
