ISIFUNDO 03
Kghani Ungalithemba IBhayibheli?
IBhayibheli lineenthembiso neenluleko ezinengi nezihle khulu. Kungenzeka unekareko yokwazi ukuthi lifundisani kodwana awulithembi. Kghani ungazithemba iinthembiso neenluleko ezifumaneka encwadini yakade kangaka? Kghani ungalithemba kwamambala iBhayibheli nalithi ungathabela ipilo nje nesikhathini esizako? Iingidi zabantu ziyalithemba iBhayibheli. Akhesibone ukuthi nawe ungalithemba na.
1. Kghani iBhayibheli likhuluma iqiniso namkha iinolwana?
IBhayibheli liphethe “amezwi anembileko aliqiniso.” (UMtjhumayeli 12:10) Likhuluma ngezinto ezenzekileko ezimalungana nabantu. (Funda uLukasi 1:3; 3:1, 2.) Izazimlando ezinengi nabafundi abarhubhulula ngezinto zekadeni, baqinisekise ukunemba kwamalanga, abantu, iindawo nezenzakalo eziseBhayibhelini.
2. Kubayini singekhe sathi iBhayibheli liphelelwe sikhathi?
IBhayibheli liveze ngeendlela ezinengi ukuthi izinto ezitlolwe kilo zenzekile begodu zisazokwenzeka. Ngokwesibonelo, lithinta izinto ezithileko malungana nesayensi. Inengi belingakholelwa ukuthi koke okutlolwe eBhayibhelini kuliqiniso. Nanyana kunjalo, isayensi iyakuqinisekisa bona lokho okutjhiwo liBhayibheli kuliqiniso. Mbala, iBhayibheli “Ihlala ithembekile, nje nangokungapheliko.”—IRhubo 111:8.
3. Kubayini singakuthemba okutjhiwo liBhayibheli ngengomuso?
IBhayibheli lineemphorofido a ezibikezela ‘izinto ezingakenzeki.’ (Isaya 46:10) Labikezela ngokunembileko ngezinto ebezingakenzeki kusasele isikhathi eside ngaphambi kobana zenzeke. Libuye lihlathulule nobujamo esibubona namhlanje ephasini. Esifundwenesi, sizokucoca ngezinye imphorofido eziseBhayibhelini. Ukunemba kwalo kuyakarisa tle!
FUNDA NGOKUNGENELELEKO
Hlolisisa ukuthi isayensi ivumelana njani neBhayibheli, bewufune neemphorofido eziseBhayibhelini ezenzekileko.
4. Isayensi ivumelana neBhayibheli
Ekadeni, abantu bebakholelwa ukuthi kunokuthileko okusekela iphasi. Dlala IVIDIYO.
Tjheja lokho okutlolwe encwadini kaJobho, okwatjhiwo iminyaka ezii-3 500 eyadlulako. Funda uJobho 26:7, bese nicoca ngombuzo olandelako:
-
Kubayini amezwi athi iphasi ‘lilembeleliswe phezu kwelize’ arara?
Umzombelezo wamanzi wathoma ukuzwisiswa kuhle ngomnyaka wabo-1800. Nanyana kunjalo, tjheja lokho iBhayibheli elakubikezela eminyakeni eyikulungwana eyadlulako. Funda uJobho 36:27, 28, bese nicoca ngemibuzo elandelako:
-
Khuyini ekukarako ngendlela umzombelezo wamanzi ohlathululwe ngayo?
-
Kghani imitlolo oqeda ukuyifunda le ikwenza ulithembe khudlwana iBhayibheli?
5. IBhayibheli labikezela ngezenzakalo eziqakatheke khulu
Funda u-Isaya 44:27–45:2, bese nicoca ngombuzo olandekako:
-
Ngimiphi imininingwana iBhayibheli elayibikezelako emnyakeni ema-200 ngaphambi kokurhayilwa kweBhabhiloni?
Umlando uyaqinisekisa ukuthi uKoretjhi iKosi yePheresiya nebutho lakhe, basahlela idorobho leBhabhiloni ngo-539 B.C.E. b Bavulela amanzi ebekavikele idorobho. Njengombana amasango bekavulekile, bangena balithumba ngaphandle kokulwa. Namhlanjesi sele kudlule iminyaka engaphezu kwee-2 500, iBhabhiloni solo limarubhi. Tjheja lokho iBhayibheli elakubikezelako.
Funda u-Isaya 13:19, 20, bese nicoca ngombuzo olandelako:
-
Isiphorofido malungana neBhabhiloni sazaliseka njani?
Amarubhi weBhabhiloni e-Iraq
6. IBhayibheli labikezela ngezinto esizibonako namhlanjesi
IBhayibheli lithi isikhathi esiphila kiswesi ‘mimihla yokuphela.’ (2 Thimothi 3:1) Tjheja lokho iBhayibheli elakubikezelako ngesikhathi esiphila kiswesi.
Funda uMatewu 24:6, 7, bese nicoca ngombuzo olandelako:
-
Umtlolo lo uthi ngiziphi izinto iBhayibheli elabikezela ukuthi zizokwenzeka emihleni yokuphela?
Funda yesi-2 kaThimothi 3:1-5, bese nicoca ngemibuzo elandelako:
-
IBhayibheli lihlathulule ukuthi abantu bazokuba njani emihleni yokuphela?
-
Ngiyiphi indlela abantu abaziphatha ngayo oyilemukileko kilezi ofunde ngazo emtlolweni?
ABANYE ABANTU BATHI: “IBhayibheli yincwadi yeenolwana.”
-
Ngombonwakho, ngibuphi ubufakazi obubonileko obutjengisa ukuthi iBhayibheli ungalithemba?
ISIRHUNYEZO
Umlando, isayensi neemphorofido ziyatjengisa bona ungalithemba iBhayibheli.
Buyekeza
-
Kghani iBhayibheli yincwadi ekhuluma iqiniso namkha iinolwana?
-
Kukuphi la iBhayibheli livumelana khona nesayensi?
-
Ucabanga ukuthi iBhayibheli libikezela ingomuso? Sekela ipendulwakho.
HLOLA OKUNGENZASI
Kghani iBhayibheli linemitjhapho malungana nesayensi?
“Kghani IBhayibheli Liyavumelana Nesayensi?” (Isihloko esiku-jw.org)
Ngikuphi okutjhiwo liBhayibheli malungana “nemihla yokuphela”?
“Iimporofido ZeBhayibhili Ezisithandathu Ozibona Zizaliseka” (IsiThala, Juni 1, 2011)
Funda ukuthi iimphorofido eziseBhayibhelini malungana nomBuso wamaGirigi zazaliseka njani.
Tjheja bona iimphorofido zeBhayibheli zawutjhugulula njani umbono wenye indoda ngeBhayibheli.
Okhunye Ongakuthabela
OKUBUZWAKO
Siyini Isifundo SeBhayibheli Esinikelwa BoFakazi BakaJehova?
Ehlelweneli lesifundo sasimahla esinikelwa boFakazi bakaJehova, ungasebenzisa nanyana ngiyiphi itjhugululo yeBhayibheli. Zizwe utjhaphulukile ukumema woke umndenakho nabangani bakho bona bahlanganyele nawe.
