Ke belegiwwe ka 1927 ga toropo ye nyana ya gore yi thina le Illinois hala U.S.A. Papaka le mmane waka ke mo ba na le kapheta ya bana—Jetha, Don, nna, Karl, le Joy. Ka mokana ga rune ke mo re tikemisele go berekela Jehova ka dipelo tsa rune ka mokana ga tsona. Sesi waka ye ba reng ke Jetha o yye ga sekolo sa bobedi sa Ghiliyade ka 1943. Don, Karl, le Joy ba yye Bethele ya Brooklyn, New York, ka 1944, 1947, le ka 1951. Mošupetso wa bona wa gabutši, le mošupetso wa babelegi baka, yi nhlohletsele gore ke nape ke ro kena fase ke berekele Jehova.

Papa le mmane ke mo go le batho ba go kwana le go bala Bhayibele ba gore ga Modimo ne ba mo nyaka ka matla, fote ba yye ba re tšhutisa gore le rune re mo nyake ka matla. Mara papa ke mo a sa sa yi kena ya dikereke ka nthago ga gore a bereke go le lesole ku Europe ka Ntwa ya Mathomo ya Lefase. Mmane ke mo a leboga Modimo gore papa o buyye ntweng a phela, byalo o butsiye papa gore: “Karl, koriye kerekeng go tshwana le ka matšatši.” Papa mo a fetola o yitseri: “Ke nyoko ya, mara nka sa kene.” Mmane o mmutsisiye gore: “Ke ntaba?” Papa a re: “Ka nako ya ntwa, baruti ba gore ba tšwa ga sedumedi ka ssoši ke mo ba rapelela masole ya gore ne ma lwa ka bobona beng hala ntweng! Anthe Modimo ne a yema le bomang?”

Ka nthagonyana mo mmane a sa yye kerekeng, Dihlatse Tsa Jehova ka dipedi di yye dya tla ku gaye. Ba yye ba neya papa dipuku ka dipedi tsa gore ne ba di bitsa go re ke Go khanya, tsa gore ne di bolabola ka puku ya Kutullo. Tsone ne di jabodisa papa, ke mokane o yye a tseya dipuku tsone. Mo mmane a bona dipuku tsone, o yye a thomisa go di bala. Ke mokane ka letšatši le lengwana o yye a bona sememo ga kuranta ya gana mone se mema batho gore ba tšhute Bhayibele ba berekisa dipuku tsa Go khanya. O yye a fetsa ka gore a ye. Mo a segela, mosadi wa gore o šele a gudiye o yye a bula sekwalo. A tshwere dipuku tsone, mmane o butsisiye gore, “Le tšhuta dipuku tsowa howa?” Mosadi yene o yye a re, “Eya mama, kena.” Ka beke ya go latela, mmane o yye le rune, ke mokane ra thomisa go ya beke ye nngwana le ye nngwana.

Ga mogahlano wo mongwana, ye ne a wo gapa o nkgopele gore ke bale Pisalema 144:​15, ya gore yi hlaya gore bo ba gore ba rapela Jehova ba jabodiye. Temanyana yone yi yye ya njabodisa, ke jabodisiye le ke ditemanyana tse dingwana ka dipedi—1 Thimothi 1:​11, ya gore yi re Jehova ke “Modimo wa gore o jabodiye,”  le Maefeso 5:​1, ya gore yi re hlohletsela gore re “yekisele Modimo.” Ke di bonne gore ne di nyaka ke jabodise ke go berekela ye a Mmakiyeng fote ne di nyaka ke mo leboge ka taba la tsotsone. Ke liketsiye go maka dilo tsone ka dipedi lephelong laka ka mokana ga lona.

Phutego ya thina ke mo yi le ku Chicago ga gore ke mo go le kgole ka 32 ya dikhilomitha. Mara, ke mo re fo ya megahlanong, fote ke yye ka napa ke kwisisa Bhayibele ka matla. Ke sa gopola nakwenngwana mo ye ne a gapa setšhuto a bitsa Jetha gore a fetole. Mo nkene ke theetsele, ke yye ka nagana gore: ‘Ne ke di tšiba tsone. Nke ke yemisiye letsogo.’ Ke yye ka thomisa go lukiselela le go beya ditaba ka mokgwa waka. Selo se segolo ka matla ke gore go fo tshwana le bobhuti baka ka babedi le bosesi baka ka babedi, ke yye ka šutela thina ka matla le Jehova. Ke yye ka kolobetsiwa ka 1941.

Ka matlamatla ke gopola mogahlano wo mogolo wa gore ne wo le ku Cleveland, Ohio ka 1942. Ba ku gaye ne ba dula matenteng le mitši ye mengwana ya go tlala thina le poleke ya mogahlano wo mogolo. Magageru ya go dula ga mitši ye mengwana ya go teya ka ku ga 50 ya ku United States ke mo ma theetsele letheto ma berekisa fowuno. Ntwa ya Bobedi ya Lefase ke mo yi kene yi ya mahlong, fote ne ba kene ba ya mahlong ba hlupegisa Dihlatse Tsa Jehova. Ka malobana, ke bonne megoba ka mmedi ya magageru yi phaka dikoloyi tsa yona, malampa ya dikoloyi tsone ke mo ma furalele kampa. Ba dumelelanne gore go dule go na le motho hone dikoloying gore go be le ye a tšinghelang bošego ka moka. Mo di šupetsa nkare ne go nyoko ba le mathatha, magageru ne ma tšhuba malampa gore bo ba gore ne ba nyoko hlasela ba sa bone selo, ke mokane ne ba teya le dibhele. Ba bangwana ne ba tabogela gore ba ye gelepa. Ka pelong ke f’lo re, ‘Batho ba Jehova ba dula ba ntshiye maahlo dikwakweng!’ A gwa makega selo sa go befa. Ka taba la gore ne ke tikwa ke pasopegiye, ke yye ka kgona go yetsela.

Ka nthago ga mengwaga, mo ke nagana ka mogahlano wone wo mogolo, ke di bonne gore mmane ne a sa šekeleka selo kela go tšhoga. Ke mo a ro napa a tshepela ga Jehova le mokgahlo wage. Nka sa tsoge ke libele mošupetso wage wa gabutši.

Mo go šele nako ye nyana gore re ye ga mogahlano wone wo mogolo, mmane o yye a ba mošupatsela wa nako ka moka. O yye a tseyela gedimo dipolabolo tsa gore ne di bolabola ka go berekela Modimo ka nako ka moka. Mo re ya gaye, o yitseri, “Ke nabela go ya mahlong ke le mošupatsela, mara nka sa di kgone go maka tsotsone ka boya ka pasopa mutši waka.” O butsisiye gore ayitsano re ka mo gelepa. Re yitseri, eya, byalo o yye a neya ye mongwana le ye mongwana dikamara ka dipedi gore a di yedise mo re so ko ja tsa go ja tsa ka bošego. Mo re tšwile sekolo, ne a libelela gore ntlo yi sa yediye, mo a fetsa ne a ya tšhomong. Ke mo a dula a na le mmereko, mara a sanka a re teyisa ka moya. Mo re ya gaye ka ledhina le mo sekolo se šele se tšwile, ke mo a fo dula a le gona. Ka matšatši ya mangwana mo re tšwile sekolo, ke mo re ya naye tšhomong, sosone se re gelepiye gore re thogo kwisisa mmereko wa gore wo maka ke mašupatsela.

Ke thomisiye go phayona mo ke na le 16 ya mengwaga. Le mo nkare papa ne a soko bane a ba Hlatse, ke mo a wo tseyela gedimo mmereko waka wa go tšhomayela. Ka malobana ya mangwana, ke mmutsiye gore le mo ke karakara ka matla, a ke soko kraya ye nka tšhutang naye Bhayibele. Ka nthago ga  gore ke yemenyana, ke yye ka mmutsisa gore, “Ayitsano o ka di jabolela gore ke go tšhutise Bhayibele?” O yye a yemanyana ke mokane a re, “A ke na lebaka la go gana.” Byalo, motho wa mathomo wa gore ke mo tšhutisiye Bhayibele ke mo go le papaka. Sowa ne se njabodisa ka matla!

Re berekisiye puku ya “The Truth Shall Make You Free.” Ka nthagonyana, ke di bonne gore papa ne a n’gelepa gore ke lokotše ka mokgo ne ke titšhutisa Bhayibele le ka mokgo ne ke tšhutisa ba bangwana. Mo ke beyisa, ka malobana ya mangwana ka nthago ga gore re bale serele, o yitseri: “Ke ya di kwa tso di hlayang ke puku yowa. Mara o tšiba byang gore tso yi di hlayang ke mong tsona?” Ne ke se na phetolo ya putsiso yone, byalo ka re: “Gana byalo a ke na phetolo, mara mo re tšhuta fote, ke nyoko ba ke krayye phetolo.” Go f’lo ba ka mokgonone. Ke krayye ditemanyana tsa gore ne di yema le taba yo ne re bolabola ka yona. Ka nthago ga hone, ke yye ka thoma go nyakolla gore ke be ke tilukiselele gabutši mo re tšhuta. Sosone se n’gelepiye gore ke ye mahlong ke tšhuta Bhayibele, se yye sa gelepa le papa. O yye a berekisa tso ne a di tšhuta ke mokane a kolobetsiwa ka 1952.

Ke tlugiye gaye mo ke na le 17 ya mengwaga. Jetha a o yye a ba moromiwa, ke mokane Don, a ya Bethele. Ka mokana ga bona ke mo ba kwana ka matla le mmereko wa bona, sone se yye sa ntiyisa. Byalo, ke yye ka kgopela go ya Bethele le ga sekolo sa Ghiliyade ke mokane ka lisetsa dilo matsogong ya Jehova. Go yye gwa makega ying? Ba yye ba mpitsa Bethele ka 1946.

Mo mengwaga yi kene yi takamela, ke yye ka bereka mebereko ya go sa tshwane hala Bethele, byalo ke yye ka kgona go tšhuta dilo tsa go tlala tsa nyuwane. Ke na le 75 ya mengwaga ke le Bethele fote ka nako yone, ba ntšhutisiye mmereko wa go maka dipuku, ba boya ba ntšhutisa le mmereko wa tso tsa ditšheleta. Ke tšhutiye le go reka dilo tsa gore ne di nyakega Bethele, le go romela dilo ga dinaga tse dingwana. Ga dilo ka mokana ga tsona, ke jabodisa ke tso re di tšhutang tsa go tšwa Bhayibeleng tsa gore re di kraya ga morapelo wa ka bošego le ga matheto ya mangwana.

Ke tšhutiye le ga monyananaka ye ba reng ke Karl wa gore o segele Bethele ka 1947. Bhayibele ko mo a sa yi kganisi. Ke yye ka mo kgopela gore a n’gelepe ka polabolo ya gore ne ba nneyye yona. Ke yye ka botsa Karl gore ne ke kgobaketsiye ditaba tsa go tlala mara ne ke sa tšibi gore ke di berekisi byang. O yye a n’gelepa ka go mputsisa putsiso ka yyoši, o yitseri, “Joel, hlogotaba ya polabolo yago yi re king?” Ke yye ka yakgoswa ka mo tshwara—berekisa tsa gore di sipidisana le hlogotaba, tse dingwana o di lisetse. A sanka ka lebala so a ntšhutisiyeng sona.

Gore motho a thogo jabola mo a le Bethele, di nyaka a karakare ka matla tšhomong, fote sosone se ka maka gore a tiyise ke tso a gahlanang natso.  Tso di makegiyeng tsa gore ke sa di gopola di makegiye mo le kgwalala ku New York City. Nna le mogageru ye mongwana ne re ye vakašela mosadi ye mongwana wa gore ne a tsere Sewkamelo le Hlahlama! Re yye ra mmotsa gore ke rune bomang, ke mokane ra re, “Ka malobana yawa re gelepa batho gore ba tšhute dilo tsa gore di nyoko ba berekela tsa go tšwa Bhayibeleng.” O yitseri, “Mo nkare le nyoko bolabola ka Bhayibele, kenaneng.” Re badiye ra boya ra petapeta ka ditemanyana tsa go bolabola ka Mmušo wa Modimo le lefase la nyuwane la gore le sa tla. Tsone di yye dya mo tikisa ka matla, ka taba la gore o yye a mema mašaga yage ya go tlalanyana gore ma tle ka beke ya go latela. Ka nthago, yene le monnage ba yye ba ba malata ya Jehova ya go tshepega.

Ke yye ka segelela sepheto sa gore ke šadhe. Ka nthago ga lesome la mengwaga, ke yye ka kraya mogageru wa mosadi wa gabutši. King sa gore se n’gelepiye gore ke kraye mosadi wa gabutši? Ke yye ka rapela Jehova ka boya ka rapela ka tso ne ke nyaka go di maka le mosadi waka ka nthago ga gore re šadhe.

Ka nthago ga mogahlano wo mogolo wa 1953 ku Stediyamo sa Yankee, ke yye ka gahlana le sesi ye mongwana ye ba reng ke Mary Aniol. Yene le Jetha ke mo ba le ga tlelase ya mabedi ya Ghiliyadhe, fote Mary ke mo a bereka ggoši le sesi waka go le baromiwa. Ka gore ke mo a na le matšato, Mary o yye a mpotsa ka mmereko wage wa boromiwa ku Caribbean le batho bo a tšhutiyeng nabo Bhayibele mo mengwaga yi kene yi takamela. Mo re kene re tšibana, re di bonne gore ne re nyoko segelela dilo tsa go tshwana ga tso tsa Modimo. Re yye mahlong re nyakanana ka matla, ke mokane ra fetsa re šadhiye ka April ya 1955. Mary o yye a šupetsa gore Jehova o nrufiye ka yene, fote ne go le mošupetso wa gabutši wa gore motho a ka wo yekisela. Ke mo a jabodisa ke mmereko wo mongwana le wo mongwana wo ne ba mo neya wona. Ke mo a karakara ka matla, a gelepa ba bangwana di tšwa pelong fote a yetisa tso tsa Mmušo wa Modimo mahlong. (Mat. 6:33) Re fetsiye kararo ya mengwaga re le bapotulugi, ke mokane ka 1958, ba yye ba re mema gore re tle Bethele.

Ke tšhutiye tsa go tlala ga Mary. Mo ke beyisa, ka nthago ga gore re šadhe, re yye ra fetsa ka gore re bale Bhayibele re le ggoši, ke mo re bala 15 ya ditemanyana ka nako ka yyoši. Mo re fetsa go bala, ke mo re bolabola ka ditemanyana tsone le gore re ka di berekisa byang mo re kene re phela. Mary ke mo a fela a mpotsa ka dilo tso a di tšhutiyeng Ghiliyadhe kela nawela go le moromiwa. Tso ke di tšhutiyeng gage di n’gelepiye gore ke lokotše ka mokgo ke beyang dipolabolo le gore ke di tšibe gore magageru ya basadi ke ma tiyise ka mokgo mang.—Diy. 25:11.

Mary wa gore ke mo nyaka ka matla o yye a hlokofala ka 2013. Ke lebelele mahlong ka maahlo ya makhebedu gore ke mmone lefaseng la nyuwane! Mara gana byalo, ke tikemisele go ya mahlong ke tšhuta, fote ke tshepela ga Jehova ka pelo yaka ka mokana ga yona. (Diy. 3:​5, 6) Di ntiyisa ka matla fote di ya njabodisa mo ke nagana ka tso batho ba Jehova ba nyoko di makang ga lefase la nyuwane. Gana hone go kena le taba ya go tšhuta dilo tsa nyuwane ga Ye Mogolo ye a re Tšhutisang, fote re nyoko tšhuta ka yene! Eya, a ke tšibi le gore ke thomise kaye ke re ke ya mo leboga ka taba la tso a ntšhutisiyeng tsona go segela gana byalo le ka mokgo a nšupetsang gore o nkwela go baba.