Ka morago ga gore Zarina a kolobetšwe gore e be yo mongwe wa Dihlatse tša Jehofa, o ile a tloga nageng ya Russia a boela ga gabo Central Asia. O be a ikemišeditše go godiša barwedi ba gagwe ba babedi gore e be Dihlatse tša Jehofa. Ka ge a be a se na tšhelete, o be a dula le batswadi ba gagwe, moratho wa gagwe le mosadi wa gagwe ka ntlong ya kamora e tee. Batswadi ba gagwe ba ile ba mmotša tsebe-go-kwa gore a se ke a ruta barwedi ba gagwe Beibele. Ba ile ba botša le bana ba gagwe gore ba se ke ba boledišana le mmago bona ka Beibele.

 Zarina o ile a nagana gore a ka thuša bjang barwedi ba gagwe go ithuta ka Jehofa. (Diema 1:8) Ke moka o ile a rapela Jehofa go tšwa pelong, a mo kgopela gore a mo thuše le go mo fa bohlale. Zarina ga se a no rapela feela, eupša o ile a dira ka go dumelelana le dithapelo tša gagwe. O be a fela a itšhidulla le barwedi ba gagwe ka go sepelasepela le bona ke moka a boledišana le bona ka bobotse bja tlholo. Go dira bjalo go thušitše barwedi ba gagwe go nyaka go tseba ka mo go oketšegilego ka Mmopi.

 Zarina o ile a tla ka leano le lengwe gape gore a kgone go tšwela pele a ruta bana ba gagwe ka Modimo a diriša puku ya Ke Eng Seo ge e le Gabotse Beibele e se Rutago? a O be a ngwalolla dipotšišo le dirapa go tšwa ka pukung yeo godimo ga matlakalana. Gape o be a tlaleletša ka go ngwala mantšu ao a tlago go thuša barwedi ba gagwe go kwešiša gakaone seo ba se balago. Ke moka o be a uta matlakalana ao le phensele ka fase ga motšhene wa go hlatswa wo o bego o le ka kamoraneng ya go hlapela. Ge bana bao ba hwetša matlakalana ao ba be ba a bala ke moka ba ngwala dikarabo tša bona.

 Zarina o ile a kgona go ithuta dikgaolo tše pedi tša puku yeo le barwedi ba gagwe a diriša mokgwa woo, pele ga ge ba ka hwetša lefelo le lengwe leo ba ka dulago go lona. Mo ba ilego ba hudugela gona, o be a kgona go godiša barwedi ba gagwe go se na motho yo a mo kgethelago gore a ba godiše bjang. Ka October 2016, barwedi ba Zarina ba ile ba kolobetšwa. Ba be ba thabišitšwe kudu ke tsela yeo mmago bona a ilego a diriša bohlale gore a ba rute ka Modimo.