Ka letšatši le lengwe Osman le mosadi wa gagwe gotee le morwedi wa bona bao ba dulago nageng ya Chile, ba be ba ruta batho Beibele ba diriša teroli kgauswi le mabitla. Ba sa eme moo, go ile gwa tšwelela lešaba la batho bao ba bego ba eya ka mabitleng le bapalela mmino godimo. Ba bangwe ba ile ba nagana gore Osman e be e le moruti wa kereke ya bona. Ke moka ba ile ba ya go yena ba fihla ba mo gokarela, gomme ba mmotša ba re: “Moruti, re leboga ge o kgonne go fihla ka nako, re be re go letile!”

 Osman o ile a leka go ba hlalosetša gore ga se yena moruti wa kereke ya bona, eupša lešaba leo le be le tladitše lešata kudu moo le ilego la se kgone go kwa gore o reng. Ka morago ga nakonyana lešaba le šetše le tsene ka mabitleng batho ba bangwe ba ile ba boa go yena gomme ba re: “Moruti re eme ka wena.”

 Ka morago ga ge lešaba leo le homotše, Osman o ile a kgona go ba hlalosetša gore ke yena mang le gore o be a dira eng moo. Ka ge ba be ba nyamišitšwe ke gore moruti wa bona ga se a tla, ba bangwe ba ile ba kgopela Osman gore: “Na o ka ya le rena ka kua mabitleng gomme wa re balela ditema tša Beibele?” Osman o ile a dumela.

 Ge ba le tseleng ya go tsena kamoo mabitleng, Osman o ile a ba botšiša dipotšišo ka mohu yoo ke moka a nagana gore a ka ba balela ditemana dife. Ge ba fihla ka mabitleng, Osman o ile a itsebiša gore ke yena mang, le go hlalosa gore ka ge e le yo mongwe wa Dihlatse tša Jehofa o ruta batho ditaba tše dibotse tša ka Beibeleng.

 O ile a bala Kutollo 21:3, 4 le Johane 5:28, 29, ke moka a diriša ditemana tšeo go hlalosa gore e be e se morero wa Modimo gore batho ba hlokofale. A ba a hlalosa gore kgauswinyana Modimo o tla tsoša batho bao ba hlokofetšego, ke moka ba tla phela mo lefaseng ka mo go sa felego. Ge Osman a fetša, batho ba bantši ba ile ba tla go yena ba mo leboga kudu gore o ba kgothaditše ka “molaetša wo o lego ka Beibeleng.” Ge a fetša o ile a boela teroling.

 Ge ba fetša ka mabitleng, ba bangwe ba batho bao ba bego ba kwele bohloko ba ile ba ya go Osman le lapa la gagwe kua teroling ke moka ba ba botšiša dipotšišo tša mabapi le Beibele. Ba ile ba boledišana le bona nako e teletšana, ke moka ge ba fetša ba tšea tše dintši tša dikgatišo tšeo di bego di le moo teroling.