Modimo o bopile batho gore e be feela monna le mosadi bao ba nyalanego bao ba ka bago le thobalano. (Genesi 1:27, 28; Lefitiko 18:22; Diema 5:18, 19) Beibele e iletša thobalano ya magareng ga batho bao ba sa nyalanago, go akaretša ba bong bjo bo swanago goba bjo bo sa swanego. (1 Bakorinthe 6:18) Se se akaretša thobalano, go phophola ditho tša motho yo mongwe tša pelego, go hupa setho sa botona goba go se tsenya ka morago.

 Le ge Beibele e iletša ditiro tša batho bao ba kgahlegelago batho ba bong bjo bo swanago le bja bona, ga e kgothaletše gore re hloye batho ba bjalo. Go e na le moo, Bakriste ba laelwa gore ba “hlomphe motho yo mongwe le yo mongwe.”—1 Petro 2:17, Good News Translation.

 Na motho a ka belegwa a kgahlegela batho ba bong bjo bo swanago le bja gagwe?

Beibele ga e hlalose tsela yeo batho bao ba kganyogago batho ba bong bjo bo swanago le bja bona ba bopilwego ka yona, eupša e a dumela gore ka moka ga rena re belegwe re na le tshekamelo ya go roba melao ya Modimo. (Baroma 7:21-25) Go e na le go tshwenyega kudu ka dilo tšeo di bakago dikganyogo tša batho bao ba kgahlegelago batho ba bong bjo bo swanago le bja bona, Beibele e ganetša ditiro tša batho ba bjalo.

 Kamoo o ka kgahlišago Modimo gaešita le ge o kganyoga batho ba bong bjo bo swanago le bja gago.

Beibele e re: “O se ke wa laolwa ke mmele wa gago. Bolaya kganyogo e nngwe le e nngwe ya thobalano e fošagetšego.” (Bakolose 3:5, Contemporary English Version) Gore o bolaye dikganyogo tše di fošagetšego tšeo di lebišago ditirong tše di fošagetšego, o swanetše go laola tsela yeo o naganago ka yona. Ge e ba ka mehla o fepa monagano wa gago ka dikgopolo tše dibotse, go ka ba bonolo gore o rake dikgopolo tše di fošagetšego. (Bafilipi 4:8; Jakobo 1:14, 15) Le ge mathomong go ka ba thata, go tla ba bonolo ge nako e dutše e eya. Modimo o holofetša go go thuša gore o ‘mpshafatšwe matleng a tutuetšago monagano wa gago.’—Baefeso 4:22-24.

 Batho ba dimilione bao ba nago le dikganyogo tša tlhago bao ba nyakago go dumelelana le ditekanyetšo tša Beibele le bona ba lebeletšane le tlhohlo yeo. Ka mohlala, bao ba sego lenyalong gomme go sa bonagale ba ka tsena lenyalong goba bao ba nyalanego le motho yo ditho tša gagwe tša pelego di sa šomego gabotse ba kgetha go itshwara go sa šetšwe diteko le ge e le dife tšeo ba ka lebeletšanago le tšona. Ba kgona go dula ba thabile, ka gona bao ba kgahlegelago batho ba bong bjo bo swanago le bja bona le bona ba ka dira seo ge e ba ba tloga ba nyaka go kgahliša Modimo.—Doiteronomio 30:19.