Jesu ga se a laela balatedi ba gagwe gore ba be le bana goba ba se be le bona. Le gona ga go le o tee wa barutiwa ba Jesu yo a ilego a nea taelo e bjalo. Ga go na moo Beibele ka go lebanya e iletšago go laola pelego. Tabeng ye, molao wa motheo wo o lego go Baroma 14:12 o a šoma. O re: “Yo mongwe le yo mongwe wa rena o tla ikarabela go Modimo.”

 Ka baka leo, banyalani ba lokologile go itirela phetho ya ge e ba ba nyaka go ba le bana goba ba sa nyake. Le gona ba ka itirela phetho ya gore ba tla ba le bana ba bakae le gore ba tla ba le bona neng. Ge e ba monna le mosadi ba kgetha go diriša mokgwa wa go thibela pelego wo o sa akaretšego go ntšha mpa bakeng sa go phema go ima, yeo ke phetho ya bona le boikarabelo bja bona. Ga go yo a swanetšego go ba ahlola.—Baroma 14:4, 10-13.