Puku ya Pele ya Dikgoši 18:1-46
18 Ka morago ga nako e itšego, ka ngwaga wa boraro, lentšu la Jehofa le ile la re go Eliya: “Eya go Ahaba gomme nna ke tlo neša pula mo lefaseng.”
2 Ka gona Eliya a ya go Ahaba, nakong ya ge tlala e be e iphile matla Samaria.
3 Ka nako yeo, Ahaba a bitša Obadia yo a bego a okametše mošate. (Bjale Obadia o be a boifa Jehofa kudu.
4 Ge Isebele a be a bolaya baporofeta ba Jehofa, Obadia o ile a tšea baporofeta ba 100 a ba arola ka dihlopha tše pedi. Sehlopha se sengwe le se sengwe se be se na le baporofeta ba 50. A khutiša sehlopha se sengwe ka leweng le lengwe, se sengwe le sona a se khutiša ka leweng le lengwe gomme a ba nea dijo le meetse.)
5 Ke moka Ahaba a re go Obadia: “Sepelasepela le naga ye gomme o lebelele didiba ka moka le meedi ka moka yeo e lego mo. Mohlomongwe re ka hwetša bjang bjo bo lekanego bjoo dipere tša rena le dimeila* tša rena di ka bo fulago e le gore di tšwele pele di phela.”
6 Ke moka ba arolelana naga yeo ba swanetšego go sepelasepela go yona. Ahaba a ya ka lehlakoreng le lengwe gomme Obadia le yena a ya ka lehlakoreng le lengwe.
7 Ge Obadia a dutše a sepelasepela, o ile a bona Eliya a etla go mo gahlanetša a napa a mo tseba gomme a khunama sefahlego sa gagwe se kgwathile fase go bontšha gore o a mo hlompha, a re: “Eliya mong wa ka, na motho yo ke wena?”
8 Ge a realo, a re go yena: “Ee, ke nna. Sepela o yo botša mong wa gago o re: ‘Eliya o tlile.’”
9 Eupša yena a re: “Ke dirile sebe sefe moo o bilego o nyaka gore nna mohlanka wa gago ke ye go Ahaba gore a mpolaye?
10 Ke ikana ka Jehofa Modimo wa gago yo a phelago gore mong wa ka o romile batho gore ba go nyake dinageng ka moka le mebušong ka moka. Ka morago ga gore ba re ga o gona, mong wa ka o ile a dira gore ba ene gore ka nnete ga se ba go hwetša.
11 Bjale wena o re: ‘Sepela o yo botša mong wa gago o re: “Eliya o tlile.”’
12 Ka gona ge ke tloga go wena moya wa Jehofa o tla go tšea wa go iša lefelong leo nna ke sa le tsebego. Le gona ge ke yo botša Ahaba gore ke go bone ke moka yena a tla eupša a se go hwetše, ruri o tlo mpolaya. Eupša nna mohlanka wa gago ke be ke dutše ke boifa Jehofa go tloga bosweng bja ka.
13 Mong wa ka, na ga se wa kwa ka seo ke se dirilego nakong ya ge Isebele a be a bolaya baporofeta ba Jehofa le kamoo ke ilego ka arola baporofeta ba 100 ba Jehofa ka dihlopha tše pedi gomme ka khutiša sehlopha setee sa baporofeta ba 50 ka leweng letee mola se sengwe ke ile ka se khutiša ka go le lengwe, gomme ka dula ke ba išetša dijo le meetse?
14 Eupša gona bjale o re: ‘Eya go botša mong wa gago o re: “Eliya o tlile.’” Bjale ge a ka se go hwetše, ke a tseba gore o tlo mpolaya.”
15 Lega go le bjalo, Eliya a re: “Ke ikana ka Jehofa wa madira yo a phelago yoo ke mo hlankelago gore lehono ke tla ya go yena.”
16 Ke moka Obadia a ya go Ahaba gomme a mmotša molaetša wo o tšwago go Eliya. Ke moka Ahaba a ya go Eliya.
17 Ge Ahaba a se na go bona Eliya, a re go yena: “Ka ba ka go hwetša. O dirile gore Isiraele e welwe ke mathata a magolo.”
18 Eliya a mo araba a re: “Ga se nna ke dirilego gore Isiraele e welwe ke mathata, eupša ke wena le ba ntlo ya tatago le dirilego bjalo, ka gore le tlogetše go kwa melao ya Jehofa gomme la hlankela Bobaali.
19 Bjale botša Baisiraele ka moka gore ba tle go nna mo Thabeng ya Karamele, o be o bitše le baporofeta ba Baali ba 450 (makgolonne-masomehlano) le baporofeta ba 400 (makgolonne) bao ba hlankelago kota e kgethwa, bona bao ba jelago tafoleng ya Isebele.”
20 Ahaba a romela molaetša go setšhaba ka moka sa Isiraele ke moka a kgobokeletša baporofeta Thabeng ya Karamele.
21 Eliya a batamela setšhaba ka moka, a re: “Le tla hlotšetša ka mahlakoreng a mabedi go fihlela neng? Ge e ba Jehofa e le Modimo wa nnete, mo lateleng. Eupša ge e ba Baali e le yena modimo wa nnete, mo lateleng.” Eupša setšhaba sa palelwa ke go mo araba.
22 Ke moka Eliya a re go setšhaba: “Ke nna feela moporofeta wa Jehofa yo a šetšego mola baporofeta ba Baali e le banna ba 450 (makgolonne-masomehlano).
23 Anke setšhaba se re fe dipowana tše pedi gomme baporofeta ba ikgethele powana e tee ba e ripelele ke moka ba e bee godimo ga dikgong, eupša ba se ke ba e goletša mollo. Le nna ke tla lokiša powana yeo e nngwe gomme ka e bea godimo ga dikgong, eupša nka se e goletše mollo.
24 Ke moka lena baporofeta le bitše leina la modimo wa lena, gomme le nna ke tla bitša leina la Jehofa. Modimo yo a tlago go tšhuma sehlabelo ka mollo o tla be a bontšha gore ke yena Modimo wa nnete.” Ge a realo setšhaba ka moka sa re: “Seo o se bolelago se a kwagala.”
25 Bjale Eliya a bolela le baporofeta ba Baali a re: “Ikgetheleng powana e tee gomme go thome lena go e lokiša, ka gobane le ba bantšhi. Ke moka le bitše leina la modimo wa lena, eupša le se ke la e goletša mollo.”
26 Ke moka baporofeta ba tšea powana yeo ba ikgethetšego yona, ba e lokiša gomme ba dulela go bitša leina la Baali go tloga mesong go fihlela mosegare, ba re: “Wena Baali, re arabe!” Eupša go be go se na lentšu leo le ba arabago goba motho yoo a ba arabago. Ba ile ba dulela go tshelatshela ba dikologa aletare yeo ba e dirilego.
27 Ge e eba mosegare wa sekgalela Eliya a thoma go ba kwera a re: “Goeletšang kudu! Akere le re ke modimo! Mohlomongwe o sa naganišiša goba o ile go ithoma.* Goba mohlomongwe o sa ile ka boroko gomme motho yo mongwe o swanetše go mo tsoša!”
28 Ba be ba goeletša kudu e bile ba itshega ka dithipa le ka marumo go ya ka setlwaedi sa bona go fihlela ge ba elela madi.
29 Mosegare wa sekgalela o ile wa feta gomme bona ba tšwela pele ba dira dilo tše di gakantšhago* go fihlela ka nako ya go neelwa ga sebego sa mabele, eupša go be go se na lentšu leo le kwagetšego goba motho yoo a ilego a araba. Baali o be a sa ba kwe.
30 Mafelelong Eliya a re go setšhaba ka moka: “Mpatameleng.” Ka gona, setšhaba ka moka sa mmatamela. Ke moka a lokiša aletare ya Jehofa yeo e bego e sentšwe.
31 Ka morago Eliya a tšea maswika a 12 go ya ka palo ya meloko ya barwa ba Jakobo, yena yoo Jehofa a ilego a re go yena: “Leina la gago e tla ba Isiraele.”
32 A aga aletare ka maswika ao gore go tumišwe leina la Jehofa. Ke moka a dira le mokero go dikologa aletare yeo. Lefelo leo a dirilego mokero go lona le be le lekana le lefelo leo go ka bjalwago peu yeo e lekanago dikhilokgerama* tše lesome.
33 Ka morago ga moo a paka dikgong gabotse, a ripelela powana yeo gomme a e bea godimo ga dikgong. Ke moka a re: “Tlatšang dibjana tše dikgolo tše nne ka meetse ke moka le a tšhollele godimo ga sebego sa go fišwa le godimo ga dikgong.”
34 Ke moka a re: “Bušeletšang.” Ka gona ba bušeletša. A ba botša gape a re: “Bušeletšang la boraro.” Ke moka ba bušeletša la boraro.
35 Ka gona meetse ao a elela go dikologa aletare gomme Eliya a tlatša le mokero ka meetse.
36 Ka nako ya go neelwa ga sebego sa mabele, moporofeta Eliya a batamela aletare gomme a re: “Wena Jehofa, Modimo wa Aborahama, Isaka le Isiraele, anke lehono batho ka moka ba tsebe gore o Modimo Isiraeleng le gore nna ke mohlanka wa gago e bile ke dirile dilo tše ka moka ka ge o ntaetše gore ke di dire.
37 Nkarabe hle Jehofa! Nkarabe e le gore setšhaba se se tsebe gore wena Jehofa o Modimo wa nnete le gore o se thuša gore se boele go wena.”*
38 Ge a realo mollo wa Jehofa wa tla o etšwa legodimong gomme wa tšhuma sebego sa go fišwa, dikgong, maswika le lerole, wa pšheša le meetse ao a bego a le ka mokerong.
39 Ge setšhaba ka moka se bona seo, sa napa sa khunama difahlego tša sona di kgwathile fase go bontšha tlhompho gomme sa re: “Jehofa ke Modimo wa nnete! Jehofa ke Modimo wa nnete!”
40 Ke moka Eliya a re go sona: “Swarang baporofeta ba Baali! Le se ke la tlogela le o tee wa bona a phonyokga!” Ka yona nako yeo setšhaba sa ba swara ke moka Eliya a ya le bona moeding wa Kishoni gomme a ba bolaela moo.
41 Ke moka Eliya a bolela le Ahaba a re: “Rotoga, o ye o je o be o nwe ka gobane go kwagala modumo wa pula e kgolo.”
42 Ka gona, Ahaba a rotoga a ya a ja le go nwa, mola Eliya yena a ile a ya godimo ga thaba ya Karamele gomme a khunama hlogo ya gagwe e le kgauswi le dikhuru tša gagwe.
43 Ke moka Eliya a re go mohlanka wa gagwe: “Hle rotoga. O lebelele ka thoko ya lewatleng.” Ke moka mohlanka yoo a rotoga a lebelela ka thoko ya lewatleng gomme a re: “Ga go na selo.” Ke moka Eliya a bolela le yena ga šupa a re: “Boela gape.”
44 Ge mohlanka wa gagwe a boa ka lekga la bošupa o ile a re: “Go na le leru le lenyenyane leo le lekanago le seatla sa motho le rotoga le etšwa ka lewatleng.” Ke moka Eliya a re: “Eya go Ahaba o mmotše o re: ‘Lokiša kariki ya gago ya dipere! Theoga e le gore pula e se ke ya go nela!’”
45 Ka yona nako yeo, maru ao a lego legodimong a thoma go swifala, gwa ba le phefo le pula e kgolo. Ahaba a tšwela pele a otlela kariki ya gagwe ya ntwa go fihlela a fihla Jeseriele.
46 Eupša Jehofa a fa Eliya matla, ke moka a itlema matheka ka seaparo sa gagwe gomme a kitima pele ga Ahaba a ba a fihla Jeseriele.
Mengwalo ya tlase
^ Meila ke ngwana wa tonki le pere.
^ Goba mohlomongwe, “o tšere leeto.”
^ Goba, “ba itshwara bjalo ka baporofeta.”
^ Phetolelo ya lentšu ka lentšu e re, “dikelo tše pedi tša mabele goba korong.” Bona Dit. B14.
^ Phetolelo ya lentšu ka lentšu e re, “o bušetša dipelo tša sona go wena.”
