Puku ya Bobedi ya Dikoronika 4:1-22
4 Ke moka Solomone a dira aletare ya koporo, botelele bja yona e be e le dimithara tše senyane,* bophara bja yona e le dimithara tše senyane, gomme botelele bja yona go ya godimo e le dimithara tše 4,5.*
2 Ke moka a dira sebjana se segolo sa tšhipi seo se bitšwago Lewatle, e be e le sa nkgokolo. Go tloga lehlakoreng le lengwe la molomo go fihla lehlakoreng le lengwe e be e le dimithara tše 4,5 gomme botelele bja sona go ya godimo e be e le dimithara tše 2,5.* Le gona go be go nyakega thapo ya dimithara tše 13,5* gore e se dikologe.
3 Ka tlase ga sona go be go na le dikgabiši tša sebopego sa maraka, gomme disenthimithareng tše 45* tša sebjana seo go be go na le dikgabiši tše lesome di dikologile sebjana seo ka moka. Dikgabiši tšeo tša sebopego sa maraka e be e le dilaene tše pedi, di bopeletšwe sebjaneng seo.
4 Se be se dutše godimo ga diswantšho tša dipoo tše 12. Dipoo tše tharo di be di lebeletše ka leboa, tše tharo di lebeletše ka bodikela, tše tharo di lebeletše ka borwa gomme tše tharo di lebeletše ka bohlabela. Sebjana seo se be se dutše godimo ga tšona, gomme dipoo tšeo ka moka di be di furalelane.
5 Bokoto bja sona bo be bo lekana le bophara bja seatla.* Molomo wa sona o be o bopegile go swana le molomo wa komiki le go swana le lepolomo leo le bitšwago lili le le thuntšego. Sebjana seo se be se ka tšhela meetse ao a lekanago dilithara tše 66 000 (dikete tše masome tshelatshela).*
6 Go oketša moo, o ile a dira dibjana tše lesome tša go hlapela, a tšea tše hlano a di bea ka go le letona gomme tše hlano a di bea ka go le letshadi. Baperisita ba be ba diriša dibjana tšeo go hlwekiša dilo tšeo di dirišwago ge go neelwa dibego tša go fišwa. Eupša baperisita ba be ba hlapela ka gare ga sebjana se segolo seo se bitšwago Lewatle.
7 Ke moka a dira dihlomelamabone tše lesome tša gauta go ya le kamoo di bego di swanetše go ba ka gona, gomme a di bea ka tempeleng. A bea tše hlano ka go le letona ke moka a bea tše hlano ka go le letshadi.
8 A dira le ditafola tše lesome gomme a di bea ka tempeleng, a bea tše hlano ka go le letona gomme a bea tše hlano ka go le letshadi, a ba a dira le dibjana tše dinyenyane tše 100 tša gauta.
9 Le gona, o ile a dira lapa la baperisita, lapa le legolo le mabati a lapa leo gomme a penta mabati ao ka koporo.
10 O ile a bea sebjana seo se bitšwago Lewatle ka lehlakoreng le letona la ntlo, go yela ka borwabohlabela.
11 Hirama o ile a dira le ditšhitswana tša go olela molora, digarafo le dibjana tše dinyenyane.
Ka gona a fetša go direla Kgoši Solomone mošomo ka moka woo a bego a o dira ntlong ya Modimo wa nnete, e lego:
12 diphilara tše pedi le dihlogwana tše pedi tšeo di bego di bopegile go swana le dibjana tše dinyenyane tšeo di bego di le godimo ga diphilara tšeo, dilaene tše pedi tša diketane tšeo di bego di diretšwe go kgabiša dihlogwana tšeo di bego di le godimo ga diphilara,
13 digarenate tše 400 (makgolo a mane) tšeo di bego di le godimo ga dilaene tše pedi tša diketane tšeo di bopegilego bjalo ka sefo, laene e nngwe le e nngwe ya ketane yeo a e diretšego dilaene tše pedi tša digarenate gore a di bee godimo ga dihlogwana tše pedi tšeo di bego di le godimo ga diphilara,
14 dikoloyana tše lesome le dibjana tše lesome tšeo di bego di le godimo ga dikoloyana tšeo,
15 sebjana se segolo seo se bitšwago Lewatle le dipoo tše 12 tšeo di bego di le ka tlase ga sona,
16 le ditšhitswana tša go olela molora, digarafo, diforoko le dibjana tša tšona ka moka tšeo di dirilwego ka koporo e phadimišitšwego, tšeo Hirama-abibi a di diretšego Kgoši Solomone gore di be ntlong ya Jehofa.
17 Kgoši Solomone o ile a di bopela seleteng sa Noka ya Jorodane, moo go bego go na le letsopa le lekoto, e lego magareng ga Sukothe le Tsereda.
18 Ka gona Solomone o ile a dira dibjana tše dintšhi kudu, e be e le tše dintšhi kudu moo go bego go sa tsebje gore go šomišitšwe koporo e kaakang go di dira.
19 Dilo ka moka tšeo Solomone a bego a di diretše ntlo ya Modimo wa nnete ke tše di latelago: aletare ya gauta, ditafola tšeo go bego go bewa dinkgwa tšeo di neetšwego Modimo,*
20 dihlomelamabone le mabone a tšona ao a dirilwego ka gauta yeo e sa tswakwago le selo, gore a bonege pele ga phapoši ya ka garegare go ya le kamoo go bego go boletšwe ka gona,
21 le diswantšho tša mapolomo ao a thuntšego, mabone le dilo tša go swara dithapo tša mabone, dilo tše ka moka di be di dirilwe ka gauta. E be e le gauta e hlwekilego ebile e se ya tswakwa le selo.
22 Dilo tša go tima mabone, dibjana tše dinyenyane, dikomiki le dibjana tša go swara magala, ka moka di be di dirilwe ka gauta e sa tswakwago le selo. Mojako wa go tsena ka ntlong, mabati a yona a ka gare a go tsena ka Sekgethwakgethweng le mabati a go tsena ka tempeleng ka moka a be a dirilwe ka gauta.
Mengwalo ya tlase
^ Phetolelo ya lentšu ka lentšu e re, “dikubiti tše 20.” Kubiti e tee e lekana le disenthimithara tše 44,5. Bona Dit. B14.
^ Phetolelo ya lentšu ka lentšu e re, “dikubiti tše 20.”
^ Phetolelo ya lentšu ka lentšu e re, “dikubiti tše 5.”
^ Phetolelo ya lentšu ka lentšu e re, “dikubiti tše 30.”
^ Phetolelo ya lentšu ka lentšu e re, “kubiti.”
^ Bophara bja seatla ke mo e ka bago disenthimithara tše 7,4. Bona Dit. B14.
^ Phetolelo ya lentšu ka lentšu e re, “magapa a 3 000.” Legapa le lekana le dilithara tše 22. Bona Dit. B14.
^ Bona Tlhaloso ya Mantšu.
