Diema 19:1-29
19 Go kaone gore motho e be modiidi eupša a dira se se lokilego,Go e na le gore e be setlaela gomme a bolele maaka.
2 Ga go botse gore motho a hloke tsebo.Le gona, yo a kitimelago go dira dilo o dira sebe.
3 Motho o arošwa ke bošilo bja gagwe,Ke moka pelo ya gagwe ya galefela Jehofa.
4 Go huma go dira gore motho a be le bagwera ba bantšhi,Eupša modiidi o lahlwa le ke mogwera wa gagwe.
5 Hlatse ya maaka e tla otlwa,E bile yo a dulago a bolela maaka a ka se phonyokge.
6 Ba bantšhi ba nyaka go thabiša motho yo a hlomphegago,E bile motho yo mongwe le yo mongwe o nyaka go ba mogwera wa motho yo a ratago go fa ba bangwe dimpho.
7 Banababo yo a diilago ba mo hloile ka moka ga bona.Bagwera ba gagwe le bona ga ba sa na taba le yena!
O dula a ba kgopela gore ba mo thuše, eupša ga go na yo a mo thušago.
8 Yo a ikemišeditšego go dira se sebotse o rata bophelo bja gagwe.
Yo a dulago a bontšha gore o na le temogo o tla atlega.
9 Hlatse ya maaka e tla otlwa,E bile yo a dulago a bolela maaka o tla hwa.
10 Go no swana le ge go sa kgonege gore setlaela se phele bophelo bja maemo,Ga go kgonege gore mohlanka le yena a buše baetapele!
11 Motho yo a nago le temogo ga a kwate ka pela.Le gona, ge e ba a sa latišiše molato o tla hlomphiwa.
12 Kgoši yeo e galefilego e swana le tau yeo e rorago,Eupša kgoši yeo e bontšhago botho e swana le phoka yeo e lego dibjalong.
13 Morwa wa setlaela o bakela tatagwe mathata,Le gona mosadi wa ditshele o swana le tlhaka ya ntlo yeo e dulago e dutla.
14 Ntlo le lehumo ke bohwa bjo bo tšwago go botate,Eupša mosadi wa temogo o tšwa go Jehofa.
15 Sebodu se phela se robetše.Le gona, motho wa go tšwafa o tla bolawa ke tlala.
16 Yo a kwago molao wa Modimo o tla dula a phela,Eupša motho yo a se nago taba le ditlamorago tša dilo tšeo a di dirago o tla hwa.
17 Yo a swarago modiidi ka botho, go bjalo ka ge eka o adima Jehofa,Gomme yena o tla mo putsa ka baka la seo a se dirago.
18 Laya morwa wa gago go sa na le nako,E le gore o se ke wa latofatšwa ka baka la lehu la gagwe.
19 Sefelapelwana se tla lebana le ditlamorago.Go se thuša ga go hole selo ka gobane se tla dula se bušeletša.
20 Theetša keletšo gomme o amogele tayo,Gore o tle o hlalefe.
21 Motho a ka ba le maano a mantšhi pelong ya gagwe,Eupša keletšo ya Jehofa ke yona e tla atlegago.
22 Ke mo go botse ge motho a bontšha ba bangwe gore o a ba rata.*E bile go kaone go ba modiidi go feta go ba le maaka.
23 Yo a boifago Jehofa o tla dula a phela.O tla robala boroko gomme a se boife selo.
24 Motho wa go tšwafa o tsentše seatla sa gagwe sekotlelong seo se nago le dijo,Eupša o tšwafa go se bušetša molomong wa gagwe.
25 Betha motho yo a ratago go kwera e le gore batho bao ba se nago temogo ba tle ba hlalefe,Gomme o kgalemele yo a nago le kwešišo e le gore a hlalefe le go feta.
26 Morwa yoo a sa swarego tatagwe gabotse e bile a raka mmagwe,O a swabiša e bile o leša dihlong.
27 Morwa wa ka, ge o ka lesa go theetša tayo,O tla ba o gana tsebo.
28 Hlatse ya maaka e hloile toka,E bile motho yo mobe o rata go dira dilo tše mpe go swana le ka mokgwa wo a ratago dijo.
29 Batho ba go rata go kwera ba tla otlwa,Gomme ba ditlaela ba bethwa ka mekokotlong.
Mengwalo ya tlase
^ Goba, “lerato le le botegago.”
