Diema 21:1-31
21 Pelo ya kgoši e swana le noka yeo e lego ka seatleng sa Jehofa.
O e iša gohle moo a ratago.
2 Motho a ka bona dilo ka moka tšeo a di dirago di lokile,Eupša Jehofa ke yena a hlahlobago dipelo.
3 Jehofa o rata dilo tša go loka le tša tokaGo feta go dira sehlabelo.
4 Boikgogomošo le boikgantšhoDi swana le lebone leo le hlahlago motho yo mobe, gomme dilo tše ke sebe.
5 Maano a motho yo a šomago ka thata a a mo hola,Eupša bohle bao ba kitimelago go dira dilo ba sa nagana, ba tla diila.
6 Go bolela maaka e le gore o hwetše mahumo,Go swana le kgodi yeo e hwelelago le molaba wo o bolayago.*
7 Batho bao ba dirago dilo tše mpe ba tlo fedišwa ka baka la bošoro bjoo ba bo diragoKa gobane ba gana go dira dilo tša toka.
8 Tsela ya motho yo a nago le molato e kgopame,Eupša yo a se nago molato o itshwere gabotse.
9 Go kaone go dula khoneng ya tlhaka ya ntlo,Go e na le go dula ka ntlong e tee le mosadi wa ditshele.
10 Motho yo mobe o kganyoga dilo tše mpe.Ga a kwele wa gabo bohloko.
11 Motho yo a se nago temogo o ba bohlale ge a bona motho yo a ratago go kwera a otlwa.Le gona, ge motho yo bohlale a ithuta dilo tše dintšhi o hwetša tsebo.
12 Modimo yo a lokilego o šetša ntlo ya motho yo mobe,Gomme o dira gore motho yo mobe a welwe ke masetlapelo.
13 Motho yo a thibago ditsebe tša gagwe gore a se kwe sello sa modiidi,Le yena o tla bitša gomme a se arabje.
14 Mpho yeo e newago ka sephiring e fokotša bogale,Gomme pipamolomo ya ka sephiring e fenya bogale.
15 Moloki o thabišwa ke go dira dilo tša toka,Eupša bao ba dirago dilo tše mpe ba hloile dilo tšeo di dirwago ke moloki.
16 Motho yo a tšwago tseleng gomme a dira dilo tšeo di sa kwešišegego,O tla robala gare ga bao ba hwilego.
17 Yo a ratago maipshino o tla diila.Yo a ratago beine le makhura a ka se hume.
18 Motho yo mobe o tla dirišetšwa go lopolla moloki,Gomme motho wa moradia o tla otlwa go e na le gore go otlwe motho wa go tshepega.
19 Go kaone go dula lešokengGo e na le go dula le mosadi wa ditshele, yoo a kwatago ka pela.
20 Ka ntlong ya motho yo bohlale go na le dilo tše bohlokwa le makhura,Eupša setlaela se senya dilo tšeo se nago le tšona.
21 Yo a katanelago go dira se se lokilego le go bontšha lerato,*O tla atlega ge a dira dilo tša go loka, gomme a hwetša bophelo, a ba a hlomphiwa.
22 Motho yo bohlale a ka fenya motse wo o tletšego ka mašole,Gomme a senya maboto a go tia ao mašole ao a a tshepilego.
23 Motho yo a laolago dilo tšeo a di bolelagoO phema go wela mathateng.
24 Motho yo a ratago go ikgogomoša e bile a se na taba ka ditlamorago tša seo a se dirago,O a ikgantšha e bile o rata go bonwa.
25 Sebodu se tla bolawa ke dilo tšeo se di kganyogagoKa gobane se gana go šoma.
26 Letšatši ka moka se hlwa se kganyoga dilo tše dintšhi ka gobane se na le megabaru,Eupša moloki o a nea e bile ga a timane.
27 Modimo o šišimišwa ke dihlabelo tša motho yo mobe.
Di mo šišimiša le go feta ge e ba motho yoo a di dira ka maikemišetšo a mabe.
28 Motho yo a hlatselago maaka o tla fedišwa,Eupša motho yo a theetšago gabotse o tla atlega.
29 Motho yo mobe ga a na dihlong,Eupša dilo tšeo di dirwago ke moloki di tla atlega.
30 Go lwa le Jehofa ke go bontšha go hloka bohlale, temogo le maano.
31 Pere e a tlwaetšwa e le go itokišeletša letšatši la ntwa,Eupša Jehofa ke yena a tlago go re phološa.
Mengwalo ya tlase
^ Goba mohlomongwe, “kgodi yeo e hwelelago go bao ba nyakago go hwa.”
^ Goba, “lerato le le botegago.”
