Psalme 89:1-52
Maskile.* Koša ya Ethane wa Moetsera.
89 Ke tla opela ka mediro ya Jehofa ya go bontšha lerato le le botegago go ya go ile.
Ke tla tsebiša meloko ka moka ka go botega ga gago.
2 Ka gobane ke itše: “Lerato la gago le botegago le tla dula le le gona go ya go ile.Le gona go botega ga gago go dula go le gona magodimong.”
3 Wena wa re: “Ke dirile kgwerano le motho yo ke mo kgethilego.Ke enetše Dafida mohlanka wa ka ka re:
4 ‘Ke tla dira gore ditlogolo tša gago di dule di le gona go ya go ile,Gomme ka dira gore sedulo sa gago sa bogoši se be gona melokong ka moka.’” (Selah)
5 Wena Jehofa, magodimo a reta mediro ya gago e makatšago,Phuthego ya bakgethwa e tla go reta ka baka la go botega ga gago.
6 Ke mang yo a ka bapišwago le Jehofa kua magodimong?
Ke mang yo a swanago le Jehofa gare ga barwa* ba Modimo?
7 Sehlopha sa bakgethwa se boifa Modimo e bile se a mo hlompha.Ke yo mogolo e bile o a boifiša go bohle bao ba mo dikologilego.
8 Wena Jehofa Modimo wa madira,Ke mang yo a nago le matla go swana le wena, wena Jah?
O botega dilong tšohle.
9 O laola lewatle leo le galefilego.Ge maphoto a lona a rotoga, wena o a a theoša.
10 O fentše Rahaba* go etša motho yo a bolailwego gasehlogo.
O gašantše manaba a gago ka letsogo la gago le matla.
11 Magodimo ke a gago le lefase ke la gago.Naga le dilo ka moka tšeo di lego go yona, di dirilwe ke wena.
12 Ke wena o dirilego gore go be le leboa le borwa.Thaba ya Thabora le ya Heremone di tumiša leina la gago di thabile.
13 Letsogo la gago le na le matla,Seatla sa gago se tiile,Seatla sa gago sa le letona se a fenya.
14 O buša ka toka le ka go loka.O a tshepega e bile lerato la gago le a botega.
15 Go thaba batho bao ba go tumišago ba thabile.
Wena Jehofa, ba tšwela pele ba sepela le wena* e bile o a ba amogela.
16 Ba thaba letšatši ka moka ka baka la leina la gagoE bile ba a hlomphiwa ka baka la go loka ga gago.
17 O dira gore batho ba gago ba be le matla e bile o ba nea seriti.Matla a rena a a oketšega ka gobane o a re šegofatša.
18 Kotse ya rena re e filwe ke Jehofa,Gomme kgoši ya rena, e tšwa go Mokgethwa wa Isiraele.
19 Ka nako yeo, o dirišitše pono go bolela le batho ba gago bao ba go botegelago, gomme wa re:
“Motho yo a nago le matla, ke mo file matla.Motho yo ke mo kgethilego ke mo phagamišitše gare ga batho.
20 Ke kgethile Dafida mohlanka wa ka,Gomme ka mo tlotša* ka makhura a ka a makgethwa,
21 Ke tla mo thekga ka seatla sa ka,Gomme ka mo matlafatša ka letsogo la ka.
22 Manaba a gagwe a ka se mo gapeletše gore a ntšhe lekgetho,E bile ga go na motho yo mobe yo a tlago go mo gatelela.
23 Ke tla pšhatlaganya manaba a gagwe pele ga gagwe,Gomme ka bolaya bao ba mo hloilego.
24 Ke tla dula ke mmotegela le go mmontšha lerato la ka le le botegago.Ke tla mo okeletša matla ka baka la leina la ka.
25 Ke tla dira gore a laole lewatle,Ka ba ka dira gore a laole le dinoka.
26 Yena o tla re go nna: ‘O Tate,O Modimo wa ka le Leswika leo le mphološago.’
27 Le gona, ke tla mo dira gore e be leitšibulo,Ka mo dira gore e be yo mogolo kudu go feta dikgoši ka moka tša lefase.
28 Ke tla dula ke mmontšha lerato la ka le le botegago go ya go ile,Le kgwerano yeo ke e dirilego le yena e tla dula e le gona.
29 Ke tla dira gore ditlogolo tša gagwe di dule di le gona go ya go ile,E bile ke tla dira gore sedulo sa gagwe sa bogoši se dule se le gona go swana le magodimo.
30 Ge e ba barwa ba gagwe ba ka tlogela molao wa kaGomme ba se kwe ditaelo tša ka,
31 Ge e ba ba ka tshela melao ya kaGomme ba se phele ka ditaelo tša ka,
32 Gona ke tla ba otla ka kgati ka ge ba sa nkwe,Ka ba ka ba betha ka thupa ke ba bethela melato ya bona.
33 Eupša nka se kgaotše go mmontšha lerato la ka le le botegago,Goba ka tlogela go phetha seo ke mo tshepišitšego sona.
34 Nka se tshele kgwerano ya ka,Goba ka fetoša seo ke se boletšego.
35 Ka ge ke le yo mokgethwa, ke enne gatee ya ba moka,Nka se botše Dafida maaka.
36 Ditlogolo tša gagwe di tla ba gona go ya go ile,Sedulo sa gagwe sa bogoši se tla dula se le gona go swana le letšatši.
37 Se tla dula se tiile go ya go ileGo swana le ngwedi wo o dulago o le gona* leratadimeng.” (Selah)
38 Eupša ge e le wena o lahlile motlotšwa wa gago e bile o mo tlogetše.O mo galefetše o šoro.
39 Ga se wa phetha kgwerano yeo o e dirilego le mohlanka wa gago.O nyaditše mphapahlogo wa gagwe ka go o lahlela fase.
40 O phušotše maboto a gagwe ka moka ao a agilwego ka maswika.O sentše mafelo a gagwe ao a šireletšegilego.
41 Batho ka moka bao ba fetago ka tsela ba mo tšeetše dilo tša gagwe.Baagišane ba gagwe ba a mo kwera.
42 O dirile gore manaba a gagwe a mo fenye.Wa dira le gore manaba a gagwe ka moka a thabe.
43 O dirile gore tšhoša ya gagwe e se šome,Gomme wa dira le gore a fenywe ntweng.
44 O dirile gore a se sa hlomphiwa,Wa dira le gore a se sa buša.
45 O dirile gore a tšofale ka pela,Wa ba wa dira gore a lewe ke dihlong. (Selah)
46 Wena Jehofa, o tla dula o se na taba le rena go fihla neng? Na e tla ba go ya go ile?
Na o tla tšwela pele o galefile go swana le mollo wo o tukago?
47 Gopola gore bophelo bja ka ke bjo bokopana gakaakang!
Na batho ka moka o ba bopetše lefeela?
48 Na go na le motho yo a ka dulago a phela gomme a se hlokofale?
Na a ka iphološa gore a se tsene Lebitleng?* (Selah)
49 Wena Jehofa, di kae dilo tše dibotse tšeo o bego o re direla tšona peleng ge o be o re bontšha gore o a re rata,*Tšeo o di tshepišitšego Dafida ka baka la ge o tshepega?
50 Wena Jehofa, gopola kamoo bahlanka ba gago ba bego ba kwerwa ka gona,Le kamoo ke ilego ka kgotlelela ge batho ka moka ba be ba ba kwera.
51 Wena Jehofa gopola kamoo manaba a gago a ilego a roga motlotšwa wa gago ka gona,Le kamoo a bego a mo roga ka gona kae le kae moo a bego a eya gona.
52 Anke Jehofa a retwe go ya go ile. Amene, Amene.
Mengwalo ya tlase
^ Bona Tlhaloso ya Mantšu.
^ Goba, “barongwa.”
^ Mohlomongwe e šupa go Egepeta goba Farao wa yona.
^ Phetolelo ya lentšu ka lentšu e re, “ba dula ba sepela seetšeng sa sefahlego sa gago.”
^ Bona Tlhaloso ya Mantšu.
^ Phetolelo ya lentšu ka lentšu e re, “Go swana le hlatse yeo e botegago.”
^ Bona Tlhaloso ya Mantšu.
^ Goba “ge o be o re bontšha lerato le le botegago.”
