Doiteronomio 17:1-20
17 “O se ke wa direla Jehofa Modimo wa gago sehlabelo ka poo goba nku yeo e babjago goba yeo e solegago, ka gobane seo e tla ba selo se se šišimišago go Jehofa Modimo wa gago.
2 “Ge e ba go o mongwe wa metse yeo Jehofa Modimo wa gago a go neago yona go ka hwetšwa monna goba mosadi yo a dirago dilo tše mpe pele ga Jehofa Modimo wa gago e bile a sa botegele kgwerano ya gagwe,
3 gomme a aroga a rapela medimo e mengwe a ba a e khunamela, a khunamela letšatši goba ngwedi goba selo le ge e le sefe se sengwe sa magodimong, le ge ke le laetše gore le se ke la dira seo,
4 ke moka wa botšwa ka taba yeo goba wa kwa ka yona, gona o e nyakišiše gabotse. Ge e ba go ka hlatselwa gore ke nnete gore selo se se šišimišago se dirilwe Isiraeleng,
5 gona o tliše monna goba mosadi yo a dirilego selo se sebe dikgorong tša motse, ke moka a kgatlwe ka maswika a hwe.
6 Motho yoo a bolawe ge go na le batho ba babedi goba ba bararo bao ba hlatselago taba yeo. A se ke a bolawa ge go na le hlatse e tee feela.
7 Dihlatse tše pedi goba tše tharo e be tšona tša mathomo di mo kgatlago ka maswika gore a hwe, ke moka ka morago setšhaba ka moka le sona se mo kgatle ka maswika. Le gona le tlošeng motho yo mobe mo gare ga lena.
8 “Ge e ba go o mongwe wa metse ya lena go ka ba le molato wo le thatafalelwago ke go o ahlola, e ka ba e le molato wa ge motho a bolaile yo mongwe goba molato wa ge motho a begile yo mongwe kgorong, bošoro bjo bo dirilwego goba taba le ge e le efe, gona le ye lefelong leo Jehofa Modimo wa lena a tlago go le kgetha.
9 Le ye go baperisita bao e lego Balefi, le go motho yo e tla bago e le moahlodi ka nako yeo, le ba botše ka taba yeo gomme bona ba tla le ahlolela yona.
10 Le dire go ya ka mokgwa wo ba tlago go le botša ka gona ba le lefelong leo Jehofa a tlago go le kgetha. Le netefatše gore le dira dilo ka moka go ya le ka mokgwa wo ba le laelago ka gona.
11 Le dire go ya ka molao wo ba tlago go le bontšha wona le ka phetho yeo ba tlago go le botša yona. Le netefatše gore le latela phetho yeo ba tlago go le nea yona.
12 Motho yo a ikgogomošago ka go se kwe seo moahlodi goba moperisita yo a hlankelago Jehofa Modimo wa lena a mmotšago sona, o swanetše go bolawa. Le tlošeng motho yo mobe mo Isiraeleng.
13 Ka morago setšhaba ka moka se tla kwa ka taba yeo gomme sa tšhoga, ke moka se ka se sa ikgogomoša.
14 “Ge le tsena nageng yeo Jehofa Modimo wa lena a le neago yona, gomme le e tšere e le ya lena le dula go yona, gomme la re: ‘E re re ipeele kgoši go swana le ditšhaba tše dingwe ka moka tšeo di dulago kgauswi le rena,’
15 gona le bee kgoši yeo Jehofa Modimo wa lena a tlago go e kgetha. Le kgethe kgoši yeo e lego Moisiraele. Le se ke la kgetha kgoši go batho bao e sego Baisiraele.
16 Eupša e se ke ya nyaka go ba le dipere tše dintšhi goba ya dira gore batho ba boele Egepeta e le gore e tle e be le dipere tše dintšhi, ka ge Jehofa a le boditše a re setšhaba ga se sa swanela go boela Egepeta gape.
17 Le gona e se ke ya ba le basadi ba bantšhi e le gore e se ke ya aroga, e bile e se ke ya ba le silifera le gauta e ntšhi.
18 Ge motho yoo a thoma go ba kgoši a ngwale Molao wo ka pukung, a o ngwalolle go tšwa koping yeo e bego e beilwe ke baperisita bao e lego Balefi.
19 “A dule a e swere, a e bale letšatši le letšatši bophelo bja gagwe ka moka, e le gore a ithute go hlompha Jehofa Modimo wa gagwe kudu, le go latela mantšu ka moka le ditaelo tšeo di lego Molaong wo.
20 Ge a ka dira seo a ka se nagane gore o kaone go feta Baisiraele ba bangwe, e bile o tla dula a latela molao wo e le gore yena le barwa ba gagwe ba tle ba buše Isiraele ka nako e telele.
