Genesi 4:1-26
4 Bjale Adama a robala le Efa mosadi wa gagwe gomme yena a ima. Ge a belege Kaine, o ile a re: “Ke belege ngwana wa mošemane ka thušo ya Jehofa.”
2 Ka morago o ile a ima gape gomme a belega ngwanabo Kaine e lego Abele.
Ge Abele a gola o ile a ba modiši, eupša Kaine yena a ba molemi.
3 Ge go fetile nako e itšego, Kaine a tlišetša Jehofa tše dingwe tša dibjalo tša tšhemong ya gagwe gore a mo direle sehlabelo ka tšona.
4 Eupša Abele yena o ile a tliša maitšibulo a mohlapeng wa gagwe le makhura a ona. Le ge Jehofa a ile a amogela Abele le sehlabelo sa gagwe,
5 ga se a ka a amogela Kaine le sehlabelo sa gagwe. Ka gona, Kaine o ile a galefa kudu e bile sefahlego sa gagwe se be se bontšha gore o nyamile.
6 Ke moka Jehofa a re go Kaine: “O re’ng o galefile kudu e bile sefahlego sa gago se bontšha gore o nyamile?
7 Ge e ba o ka fetoga wa dira botse, na nka se go amogele gape? Eupša ge e ba o sa fetoge wa dira botse, tseba gore go na le sebe seo se go laletšego mojako, gomme se nyaka go go laola. Na o tla se fenya?”
8 Ka morago ga moo Kaine a re go Abele ngwanabo: “A re ye kua nageng.” Ya re ge ba le nageng Kaine a hlasela Abele ngwanabo gomme a mmolaya.
9 Ka morago Jehofa a botšiša Kaine a re: “Abele ngwaneno o kae?” Yena a re: “Ga ke tsebe. Na ke nna mohlokomedi wa ngwanešo?”
10 Ke moka Modimo a re: “O dirile’ng? Theetša! Madi a ngwaneno a nkgoeletša a le mobung.
11 Bjale o rogakilwe e bile ke go raka mo lefelong le, ka gobane o tšholletše madi a ngwaneno mo mobung wo ka seatla sa gago.
12 Ge o lema mobu, o ka se tšweletše dibjalo tše di lekanego. O tlo dula o tšhaba e bile o ralala lefaseng.”
13 Ke moka Kaine a re go Jehofa: “Kotlo ya sebe seo ke se dirilego ke e kgolo kudu e bile nka se kgone go e kgotlelela.
14 Lehono o nthaka mo nageng ye, gomme ke tlo ba kgole kudu le wena, le gona ke tlo dula ke tšhaba e bile ke ralala mo lefaseng, e bile motho le ge e le ofe yo a nkhwetšago ruri o tlo mpolaya.”
15 Ke moka Jehofa a re go yena: “Ka baka leo motho le ge e le ofe yo a go bolayago o tla otlwa gašupa.”
Ka gona Jehofa a bea seka sa go lemoša motho le ge e le ofe yo a ka hwetšago Kaine gore a se ke a mmolaya.
16 Kaine a napa a tloga pele ga Jehofa gomme a yo dula nageng ya ka bohlabela bja Edene e le motšhabi.
17 Ka morago ga moo Kaine a robala le mosadi wa gagwe gomme mosadi yoo a ima a belega Henoge. Ke moka a aga motse gomme a o reela ka leina la morwa wa gagwe Henoge.
18 Ka morago Henoge ya ba tatago Iradi. Iradi ya ba tatago Mehuyaele, Mehuyaele ya ba tatago Methushaele gomme Methushaele ya ba tatago Lamege.
19 Lamege a tšea basadi ba babedi. Leina la wa pele e be e le Ada gomme leina la wa bobedi e le Tsila.
20 Ada a belega Jabale. Jabale e bile wa mathomo wa go dula ditenteng le go ba le diruiwa.
21 Leina la ngwanabo e be e le Jubale. Jubale e be e le wa mathomo wa go letša diharepa le dinaka.
22 Ge e le Tsila yena o ile a belega Tubala-kaine, yena o be a dira dilo tša mohuta o mongwe le o mongwe tša koporo le tšhipi. Kgaetšedi ya Tubala-kaine e be e le Naema.
23 Ke moka Lamege a bolela le basadi ba gagwe e lego Ada le Tsila a re:
“Ekwang seo ke se bolelago lena basadi ba ka,Ntheetšeng:
Ke bolaile motho yo a nkgobaditšego,Ee, ke bolaile lesogana leo le mpethilego.
24 Ge e ba Kaine a tla lefeletšwa gašupa,Gona Lamege yena o tla lefeletšwa ga masomešupa-šupa.”
25 Adama a robala gape le mosadi wa gagwe gomme mosadi yoo a ima, a belega morwa a mo reela leina la Sethe, ka gobane o itše: “Modimo o nneile morwa* yo mongwe legatong la Abele, ka gobane Kaine o mmolaile.”
26 Sethe le yena a ba le morwa gomme a mo reela leina a re ke Enoshe. Ka nako yeo batho ba ile ba thoma go bitša leina la Jehofa.
Mengwalo ya tlase
^ Phetolelo ya lentšu ka lentšu e re, “peu.”
